ដោយ រ៉ាណេត
ភ្នំពេញ៖ សមាគមទេសចរណ៍អាស៊ាន (ASEAN Tourism Association)កាលពីថ្ងៃទី២៥ មេសាកន្លងមកបានប្រគល់ពានរង្វាន់ដល់បេក្ខភាពចំនួន៣រូប ទទួលបានរង្វាន់ឆ្នើមទៅលើវិញ្ញាសារ៣ប្រភេទផ្សេងគ្នា ដែលជាការបង្ហាញឱ្យឃើញពីភាពល្អប្រសើរនៃវិស័យទេសចរណ៍នៅកម្ពុជា។
បេក្ខភាព ៣រូបរបស់កម្ពុជាត្រូវបានជ្រើសរើសដោយគណៈកម្មការទាំង១០ប្រទេសរបស់សមាគទេសចរណ៍ អាស៊ាន ដើម្បីទទួលរង្វាន់ល្អបំផុតឆ្នាំ២០១៩ របស់សមាគមទេសចរណ៍អាស៊ាន (ASEAN Award for Excellence 2019) ។
ពិធីប្រគល់រង្វាន់ត្រូវបានធ្វើឡើងនៅថ្ងៃទី២៥ ខែមេសា ឆ្នាំ២០១៩ នៅប្រទេសម៉ាឡេស៊ី ដោយមានការចូលរួម ពីថ្នាក់ដឹកនាំនៃក្រុមប្រឹក្សាទេសចរណ៍របស់ប្រទេសម៉ាឡេស៊ី ប្រធានសមាគមទេសចរណ៍នៃបណ្តាប្រទេសអាស៊ាន និងក្រុមហ៊ុនអាកាសចរណ៍។
រង្វាន់ដែលកម្ពុជាទទួលបានពីសមាគមទេសចរណ៍អាស៊ាន រួមមាន៖
1. រង្វាន់សម្រាប់ការសរសេរអត្ថបទទេសចរណ៍ល្អបំផុត (Best ASEAN Travel Article) ដែលបានទៅលើទស្សនាវដ្តីទេសចរណ៍កម្ពុជា (Cambodia Tourism Magazine)។
2. រង្វាន់សម្រាប់ការថតរូបល្អបំផុត (Best ASEAN Tourism Photo) ដែលបានទៅលើ លោកសួង ម៉ារឌី អ្នកថតរូបអាជីព។
3. រង្វាន់ល្អបំផុតសម្រាប់កិច្ចខិតខំប្រឹងប្រែងថែរក្សាវប្បធម៌ (Best ASEAN Cultural Preservation Effort) ដែលបានទៅលើ លោក ម៉ៅ សុខនី ស្ថាបត្យករនៃជាអាជ្ញាធរជាតិអប្សរា។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា (CATA) បានមានប្រសាសន៍ថា ជារៀងរាល់ឆ្នាំកម្មវិធីនៃការប្រកួតប្រជែងនេះតែងរៀបចំឡើងជាប្រចាំ ក្រោមការចូលពីបណ្តាប្រទេសនានា ដែលស្ថិតនៅក្នុងសហគមទេសចរណ៍អាស៊ាន។
ដោយឡែកចំពោះការទទួលបានចំណាត់ថ្នាក់ និងរង្វាន់ទាំង ៣ប្រភេទខាងលើនេះ ក៏ជាការបង្ហាញឱ្យឃើញពីភាពល្អប្រសើរនៃវិស័យទេសចរណ៍នៅកម្ពុជា ដែលវាមិនត្រឹមតែជាការបង្កើនកេរ្តិ៍បុគ្គលដែលទទួលបានរង្វាន់នោះទេ ប៉ុន្តែក៏ចូលរួមជួយផ្សាព្វផ្សាយពីកេរ្តិ៍ឈ្មោះរបស់កម្ពុជាទៅកាន់សាកលលោកផងដែរ។
ជាមួយគ្នានេះ លោកក៏បានកើតសរសើរ ចំពោះកិច្ចប្រឹងប្រែងរបស់បេក្ខភាពទាំង៣រូប ដែលបានព្យាយាបញ្ចេញសមត្ថភាពរហូតទទួលបានរង្វាន់ឆ្នើមទាំង៣ប្រភេទខាងលើនេះ ៕
