ដោយៈ គង់ សូរិយា
ភ្នំពេញៈ ការកើនឡើងនៃការអនុម័តគម្រោងវិនិយោគថ្មីៗកាន់តែច្រើន ត្រូវបានគេមើលឃើញថា វាជាកំលាំងចលករជំរុញឧស្សាហកម្មសំណង់របស់កម្ពុជា។
របាយការណ៍របស់realestate.com.kh បានបញ្ជាក់ថា ឥណទានដល់វិស័យសំណង់ ត្រូវបានគេរំពឹងថានឹងកើនឡើង ក្នុងអំឡុងឆមាសទី២នៃឆ្នាំនេះ ដែលផ្តល់នូវកម្លាំងរុញច្រាន ដល់ឧស្សាហកម្មនេះ។
ប្រភពដដែលបានបន្តថា ឧស្សាហកម្មសំណង់របស់កម្ពុជា នឹងមានកំណើន៥.២ភាគរយ នៅនៅឆ្នាំ២០២៥ ដោយការកើនឡើងនៃការអនុម័តគម្រោងសំណង់ថ្មី និងការកើនឡើងនៃឥណទានដល់ឧស្សាហកម្មសំណង់។
របាយការណ៍បានបន្តថា កំណើនវិស័យសំណង់ ក៏នឹងត្រូវបានគាំទ្រ ដោយផែនការរបស់ក្រសួងសេដ្ឋកិច្ច និងហិរញ្ញវត្ថុ ដែលបានប្រកាសក្នុងខែមករា ឆ្នាំ២០២៥ ដែលនឹងបោះផ្សាយសញ្ញាបណ្ណរដ្ឋនៅចុងឆ្នាំ២០២៥ ដើម្បីកៀរគរថវិការចំនួន៤៩៣.៣ពាន់លានរៀល (១២០លានដុល្លារ) ក្នុងការផ្តល់មូលនិធិ ដើម្បីជំរុញឧស្សាហកម្មសំណង់។
ជាមួយការរីកចម្រើននៃឧស្សាហកម្មសំណង់ ធនាគារជាតិនៃកម្ពុជា បានផ្តល់ឥណទានធនាគារសរុប ដល់វិស័យឧស្សាហកម្មមានចំនួន ២២,២២ទ្រីលានរៀល (៥,៤ ពាន់លានដុល្លារ) នៅចុងខែវិច្ឆិកា ឆ្នាំ ២០២៤ កើនឡើង១០ភាគរយ បើធៀបនឹងប្រាក់រៀល២០,២ ទ្រីលានរៀល (៤,៩ ពាន់លានដុល្លារ) នៅចុងខែវិច្ឆិកា ឆ្នាំ ២០២៣។
របាយការណ៍បានបន្ថែមទៀតថា ឧស្សាហកម្មសំណង់របស់កម្ពុជាត្រូវបានគេរំពឹងថា នឹងមានកំណើនជាមធ្យមចំនួន៧.៧ភាគរយរវាងឆ្នាំ២០២៦ ដល់ឆ្នាំ២០២៩ ដែលគាំទ្រដោយការវិនិយោគលើវិស័យដឹកជញ្ជូន ថាមពលកកើតឡើងវិញ វិស័យភស្តុភារ និងលំនៅដ្ឋាន រួមជាមួយនឹងការវិនិយោគ ដែលជាផ្នែកមួយនៃផែនការមេគ្រប់ជ្រុងជ្រោយស្ដីពី ប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣។
ផែនការមេនេះ បានកំណត់គម្រោងអាទិភាពចំនួន១៧៤ ដែលត្រូវការវិនិយោគប្រហែល១៥០.៩ ទ្រីលានរៀល(៣៦.៧ ពាន់លានដុល្លារ) ក្នុងរយៈពេល១០ឆ្នាំខាងមុខ។
បន្ថែមពីលើនេះ កំណើននេះក៏នឹងត្រូវបានគាំទ្រ ដោយការអនុម័ត ពីក្រុមប្រឹក្សាអភិវឌ្ឍន៍កម្ពុជា លើគម្រោងថ្មីចំនួន១១២ ក្នុងរយៈពេលពីរខែដំបូងនៃឆ្នាំ២០២៥ ដែលមានតម្លៃសរុបចំនួន៤.១ ទ្រីលានរៀល(១០០០លានដុល្លារ)។
“ក្នុងចំណោមចំនួនសរុប កញ្ចប់ថវិកាចំនួន១.២ ទ្រីលានរៀល (២៨៨លានដុល្លារ) ត្រូវបានបែងចែក នៅក្នុងវិស័យឧស្សាហ៍កម្ម ហើយនៅសល់ ត្រូវបានបែងចែកទៅជាវិស័យហេដ្ឋារចនាសម្ព័ន្ធ និងវិស័យផ្សេងៗទៀត។
គម្រោងសំខាន់ៗមួយចំនួន ដែលត្រូវបានអនុម័តរួមមាន រោងចក្រអគ្គិសនីដើរ ដោយថាមពលពន្លឺព្រះអាទិត្យចំនួន១៣៥,៧ ពាន់លានរៀល (៣៣លានដុល្លារ) ក្នុងស្រុកទឹកផុស ខេត្តកំពង់ឆ្នាំង រោងចក្រកែច្នៃដែក១២៧,៤ពាន់លានរៀល (៣១ លានដុល្លារ) នៅស្រុកជុំគីរី ខេត្តកំពត និង៩០,៤ពាន់លានរៀល (២២ លានដុល្លារ) នៃរោងចក្រដែក និងឧបករណ៍ប្លាស្ទិកពិសេស នៅតំបន់សេដ្ឋកិច្ចពិសេសខេត្តកោះកុង។
លោក Kem Lim ទីប្រឹក្សាផ្នែកសំណង់នៃកម្ពុជា បានមានប្រសាសន៍ថា វិស័យនេះកំពុងស្ថិតនៅលើផ្លូវរីកចម្រើន បន្ទាប់ពីបញ្ហាប្រឈមផ្សេងៗ ដែលបណ្តាលមកពីជំងឺរាតត្បាត និងការធ្លាក់ចុះនៃអចលនទ្រព្យ។
វិស័យសំណង់ និងទេសចរណ៍ នៅតែមានសារៈសំខាន់សម្រាប់កំណើនសេដ្ឋកិច្ចរបស់ប្រទេសកម្ពុជា។ វិស័យទាំងនេះត្រូវបានគូសបញ្ជាក់ដោយការពិត ដែលថាប្រឈមមុខនឹងបញ្ហា តិចជាងបើធៀបនឹងវិស័យផ្សេងទៀតដូចជាវិស័យផលិតកម្ម។
លោកបានបន្ថែមថា “ការកើនឡើងនៃឥណទាន ដល់វិស័យសំណង់ ពិតជាសញ្ញាវិជ្ជមាន ដែលធ្វើអោយមានតុល្យភាព និងទទួលបានទុនល្អជាងមុន ដែលកំពុងត្រូវបានអនុវត្តនៅកម្ពុជា”៕
