ដោយ វុត្ថា
ភ្នំពេញ៖ ឯកអគ្គរដ្ឋទូតបង់ក្លាដេសប្រចាំកម្ពុជាឲ្យដឹងថា ក្រុមអ្នកជំនួញរបស់ខ្លួន គ្រោងមកវិនិយោគបន្ថែមទៀតនៅកម្ពុជា លើវិស័យកាត់ដេរសម្លៀកបំពាក់ និងស្បែកជើង ខណៈដែលវិស័យមានផល ចំណូលច្រើនសម្រាប់ការជំរុញកំណើនសេដ្ឋកិច្ចជាតិ។
លោក Nazmul Quaunine ឯកអគ្គរដ្ឋទូតបង់ក្លាដេសប្រចាំកម្ពុជា នៅក្នុងជំនួបពិភាក្សាការងារជាមួយ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃទី ២៥ ខែមេសា នេះ បានឲ្យដឹងថា ក្រុមអ្នកជំនួញបង់ក្លាដែសជាច្រើនបានមើលឃើញពីសក្តានុពលវិនិយោគជាច្រើននៅកម្ពុជា ពិសេសលើវិស័យកាត់ដេរសម្លៀកបំពាក់។
ឯកអគ្គរាជទូតរូបនេះបានបន្តថា ការចាប់អារម្មណ៍របស់ក្រុមអ្នកជំនួញមកកាន់ប្រទេសកម្ពុជានេះដោយសារការមើលឃើញថាកម្ពុជាមានសន្តិភាពស្ថិរភាព សម្បូរកម្លាំងពលកម្ម និងមានការសម្រួលដល់ការវិនិយោគជាដើម។
លោក អិត សំហេង រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញការស្វាគមន៍យ៉ាងកក់ក្ដៅចំពោះអ្នកវិនិយោគបង់ក្លាដែស ដែលមានបំណងចង់មកវិនិយោគនៅកម្ពុជា។
លោករដ្ឋមន្រ្តីបានបញ្ជាក់ថា រាជរដ្ឋាភិបាលកម្ពុជាមានគោលនយោបាយគាំពារអ្នកវិនិយោគមកពីក្រៅប្រទេស និងជួយសម្រួលគ្រប់មធ្យោបាយដល់ពួកគេ ដើម្បីទាក់ទាញអ្នកវិនិយោគឱ្យមកវិនិយោគនៅកម្ពុជាកាន់តែច្រើន។
លោក ងុយ រិទ្ធ អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍ថា កម្ពុជានិងបង់ក្លាដេស គឺមានស្ថានភាពភូមិសាស្ត្រ កំណើនសេដ្ឋកិច្ច មានចំណូល GDP ការនាំចេញវិស័យកាត់ដេរសម្លៀកបំពាក់ វាយនភណ្ឌដូចគ្នានិងបានបញ្ជួនកម្លាំងពលកម្មទៅក្រៅប្រទេសដូចគ្នាផងដែរ។
លោកអះអាងថា កត្ដាទាំងនេះ ភាគីទាំងពីរ បានសន្យាថា នឹងបង្កើនកិច្ចសហប្រតិបត្ដិការក្នុងការបណ្ដុះបណ្ដាល និងចែករំលែកបទពិសោធន៍ជំនាញមួយចំនួន សម្រាប់បំពេញឲ្យទៅវិញទៅមក ដើម្បីជាផលប្រយោជន៍ដល់ប្រជាពលរដ្ឋ និងអភិវឌ្ឍន៍ប្រទេសទាំងពីរផងដែរ។
