ដោយ: គង់ លាងហួរ
អន្តរជាតិ: តម្លៃជួលអចលនទ្រព្យឧស្សាហកម្មក្នុងប្រទេសចិនបានបន្តដាំក្បាលចុះនៅក្នុងឆមាសទីមួយ ឆ្នាំនេះ ខណៈបណ្តាក្រុមហ៊ុនជាច្រើនផ្លាស់ប្តូរមូលដ្ឋានផលិតកម្មចេញពីប្រទេសចិន ក្នុងបរិបទនៃការកើនឡើងភាពតានតឹងពាណិជ្ជកម្មរវាងសហរដ្ឋអាមេរិក និងចិន។
ក្រុមហ៊ុនប្រឹក្សាយោបល់អចលនទ្រព្យ Knight Frank បានបញ្ជាក់នៅក្នុងរបាយការណ៍មួយថា តម្លៃជួលអចលនទ្រព្យឧស្សាហកម្មនៅប្រទេសចិនបានដាំក្បាលចុះ១២,៨ភាគរយនៅក្នុងរយៈពេល៦ខែដំបូង ឆ្នាំ២០២៥ បើប្រៀបធៀបនឹងរយៈពេលដូចគ្នាកាលពីឆ្នាំមុន។
តម្រូវការអចលនទ្រព្យឧស្សាហកម្មនៅទីក្រុងប៉េកាំង និងទីក្រុងសៀងហៃ បានធ្លាក់ចុះ ខណៈតម្លៃជួលបានដាំក្បាលចុះក្នុងអត្រា១៧,២ភាគរយ និងអត្រា១១,៣ភាគរយរៀងគ្នា។ អត្រាអចលនទ្រព្យឧស្សាហកម្មទំនេរ(Vacancy Rate)បានកើនឡើងដល់អត្រា២៨,៩ភាគរយនៅទីក្រុងប៉េកាំង និងអត្រា២៦,៨ភាគរយនៅទីក្រុងសៀងហៃ។
ស្ថានភាពអាក្រក់បំផុតអាចនឹងកើតមានឡើងនៅពេលខាងមុខ ដោយសារសង្គ្រាមពន្ធគយរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ ដែលបាននាំឱ្យបណ្តាក្រុមហ៊ុនជាច្រើនធ្វើពិពិធកម្មមូលដ្ឋានផលិតកម្មចេញពីប្រទេសចិន។
លោកស្រី Christine Li ប្រធានផ្នែកស្រាវជ្រាវអចលនទ្រព្យប្រចាំតំបន់អាស៊ីប៉ាស៊ីហ្វិកនៅក្រុមហ៊ុន Knight Frank បានលើកឡើងថា ភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិន ជាកត្តាជំរុញដ៏សំខាន់នៃការផ្លាស់ប្តូរទីតាំងផលិតកម្ម។
លោកស្រីរំពឹងថា “តម្លៃជួលអចលនទ្រព្យឧស្សាហកម្មនៅក្នុងប្រទេសចិននឹងមិនអាចដាំក្បាលចុះដល់បាតក្នុងរយៈពេល១២ខែខាងមុខនោះឡើយ។ លើសពីនេះ ក្រុមអ្នកវិនិយោគកំពុងប្រកាន់យកវិធីសាស្ត្ររង់ចាំមើលស្ថានការណ៍ (Wait and see) និងវាស់ស្ទង់ឥទ្ធិពលនៃគោលនយោបាយពន្ធរបស់លោក ត្រាំ”៕ប្រភព: SCMP៕
