ដោយ វុត្ថា
ប៉េកាំង៖ កម្ពុជា តាមរយៈទូរគមនាគមន៍កម្ពុជា(ទ.ក.) បានចុះហត្ថលេខាលើអនុស្សរណៈយោគយល់គ្នា ស្តីពីភាពជាដៃគូ ក្នុងការរួមគ្នាអភិវឌ្ឍ និងដាក់ឱ្យប្រើប្រាស់បច្ចេកវិទ្យាទូរគមនាគមន៍ជំនាន់ទី៥ (5G) ក្នុងប្រទេសកម្ពុជា របស់ក្រុមហ៊ុន Huawei Technologies (Cambodia) Co., Ltd ។
លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានក្រុមប្រឹក្សាភិបាលទូរគមនាគមន៍កម្ពុជា នៅក្នុងពិធីចុះហត្ថលេខាលើអនុស្សរណៈយោគយល់គ្នារថ្ងៃទី២៨ ខែមេសា ឆ្នាំ២០១៩ ម្សិលមិញនេះ នៅទីក្រុងប៉េកាំង សាធារណរដ្ឋប្រជាមានិតចិន បានឲ្យដឹងថា ក្នុងកិច្ចសហប្រតិបត្តិការនេះ ប្រទេសកម្ពុជានឹងក្លាយជាអ្នក ត្រួសត្រាយផ្លូវ និងប្រើប្រាស់បច្ចេកវិទ្យានេះមុនគេនៅក្នុងតំបន់អាស៊ាន។
លោកបន្តថា ដើម្បីអនុវត្តតាមយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ក្រសួងប្រៃសណីយ៍និងទូរគមនាគមន៍បានតម្រង់ទិសឱ្យទូរគមនាគមន៍កម្ពុជាដែលជាក្រុមហ៊ុនរដ្ឋ ឱ្យមានសមត្ថភាពខ្ពស់លើការងារដឹកនាំ និងគ្រប់គ្រងទៅលើវិស័យទូរគមនាគមន៍និងបច្ចេកវិទ្យាគមនាគមន៍និងព័ត៌មាន ក្នុងការត្រៀមខ្លួនសម្រាប់សេដ្ឋកិច្ចឌីជីថល និងបដិវត្ដន៍ឧស្សាហកម្មជំនាន់ទី៤.០។
សម្ដេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានមានប្រសាសន៍ថា ការអភិវឌ្ឍអ៊ិនធឺណិតល្បឿនលឿនពិតជាមានសារ:សំខាន់ហើយសម្តេចតេជោ ចង់ឃើញអ៊ីនធឺណិតល្បឿនលឿន គ្របដណ្តប់ទៅដល់ជនបទ។ ព្រះរាជាណាចក្រកម្ពុជាត្រូវការនូវបច្ចេកវិទ្យាថ្មីៗ ទំនើបៗសម្រាប់អភិវឌ្ឍវិស័យនេះ។
លោក Li Jinge អនុប្រធានក្រុមហ៊ុន Huawei បានជម្រាបជូនសម្តេចតេជោនាយករដ្ឋមន្ត្រីថា ប្រទេសកម្ពុជាជាប្រទេសទីមួយនៅក្នុងតំបន់អាស៊ានដែលបានចុះហត្ថលេខាលើកិច្ចព្រមព្រៀងអភិវឌ្ឍទៅលើបច្ចេកវិទ្យាថ្មី 5G ជាមួយក្រុមហ៊ុន ហើយលោកសូមគាំទ្រ និងប្តេជ្ញាចិត្តរួមគ្នាក្នុងសម្រេចនូវសមិទ្ធផលនានា សំដៅចូលរួមសម្រេចនូវទស្សនវិស័យនៃរាជរដ្ឋាភិបាលកម្ពុជា៕
Rathanorsoem08@gmail.com