សេដ្ឋកិច្ចកម្ពុជាសម្រេចបានកំណើនជិត៦ភាគរយនៅឆមាស ទី១ឆ្នាំនេះ

ដោយៈ គង់ សូរិយា

    ភ្នំពេញៈ សេដ្ឋកិច្ចកម្ពុជានៅសម្រេចបានកំណើន៥,៩ភាគរយ នៅក្នុងឆមាសទី១ឆ្នាំ២០២៥នេះ។ នេះបើយោងតាមរបាយការណ៍ប្រចាំឆមាសទី១ឆ្នាំ២០២៥ របស់ធនាគារជាតិនៃកម្ពុជា(NBC) ។

របាយការណ៍ខាងលើបានបញ្ជាក់ថា កំណើននេះត្រូវបានគាំទ្រដោយការកើនឡើងនៃវិស័យកម្មន្តសាល ទេសចរណ៍ និងវិស័យកសិ​កម្ម ខណៈវិស័យសំណង់និងអចលនទ្រព្យ​ បន្តមានភាពទន់ខ្សោយ។

របាយការណ៍ឆមាសទី១របស់ធនាគារជាតិនៃកម្ពុជា ដែលចេញផ្សាយនៅថ្ងៃទី៣១ ខែកក្កដា បានបង្ហាញថា ​វិស័យកម្មន្តសាលបន្តដើរតួនាទីយ៉ាងសំខាន់ ក្នុងការទ្រទ្រង់កំណើនសេដ្ឋកិច្ចកម្ពុជា ដោយមានកំណើន៩,៥ភាគរយ។ អនុវិស័យកម្មន្តសាលកាត់ដេរ ត្រូវបានប៉ាន់ស្មានថាកើនឡើងក្នុងអត្រា​១០,៤ភាគរយ ស្របពេលដែលអនុវិស័យកម្មន្តសាល មិនមែនកាត់ដេរកើនឡើង៨,៥ភាគរយ។

NBCបានបញ្ជាក់ថា ការនាំចេញផលិតផលកម្មន្តសាល គឺបានកើនឡើងគួរឱ្យកត់សម្គាល់ ក្នុងអត្រា១៥,៣ភាគរយ​ នៅឆមាសទី១ ធៀបនឹងគ្រាដូចគ្នាកាលឆ្នាំ២០២៤ មានត្រឹម៨,៧ភាគរយ។ កំណើនេះ បានដោយសារការសម្រុកនាំចេញ យ៉ាងគំហុកមុនពេលពន្ធគយបដិការរបស់សហរដ្ឋអាម៉េរិក ត្រូវបានអនុវត្ត ចាប់ពីថ្ងៃទី១ ខែសីហា តទៅ។ បើតាមរបាយការណ៍ដដែល បានឲ្យដឹងថា កំណើននេះគាំទ្រចម្បងដោយការនាំចេញផលិតផលកាត់ដេរ និងផលិតផលដែលកំពុងលិចឡើង ដូចជា សំបកកង់រថយន្ត អំពូលភ្លើង និងខ្សែភ្លើង និងបង្គុំខ្សែភ្លើង។​

ចំណែកវិស័យទេសចរណ៍ បន្តមានកំណើនដែលឆ្លុះបញ្ចាំងតាមរយៈការកើនឡើងនៃភ្ញៀវ អន្តរជាតិនិងទេសចរក្នុងស្រុក។ កំណើននេះ ត្រូវបានគាំទ្រដោយការអភិវឌ្ឍហេដ្ឋារចនា -សម្ព័ន្ធសំខាន់ៗ និងការតភ្ជាប់ជើងហោះហើរ ត្រង់ជាមួយបណ្តាប្រទេសនានា ក៏ដូចជាការរៀបចំព្រឹត្តិការណ៍ធំៗ ដែលចូលរួមទាក់ទាញអ្នកទេសចរជាតិ។

ភ្ញៀវអន្តរជាតិកើន៦,២ភាគរយ ដល់៣,៤លាននាក់ ដែលក្នុងនោះ ភ្ញៀវថៃឈរនៅលំដាប់ទី១ ស្មើនឹង២៧,៦ភាគរយ នៃភ្ញៀវទេស​ចរអន្តរជាតិសរុបមកកម្ពុជា ក្នុងឆមាសទី១។​ បន្ទាប់មក វៀតណាម និងទេសចរជនជាតិចិន។

ភ្ញៀវអន្តរជាតិដែលចូលមកតាមផ្លូវអាកាស (សមាមាត្រ ៤២,៣ភាគរយ នៃភ្ញៀវអន្តរជាតិ សរុប) កើនឡើង២៣,៧ភាគរយ និងតាមផ្លូវគោកនិងផ្លូវទឹក (សមាមាត្រ ៥៧,៧ភាគរយ​) ថយ៣,៧ភាគរយ​។ ទន្ទឹមនេះ កម្ពុជារំពឹងទទួលបានភ្ញៀវអន្តរជាតិប្រមាណ៧,២ ទៅ ៧,៥លាននាក់ នៅដំណាច់ឆ្នាំ២០២៥។

សិទិដ្ឋិនិមបែបនេះ ដោយសារការគាំទ្រជាចម្បងដោយវិធានការសំខាន់ៗរបស់រាជរដ្ឋាភិបាល ជាពិសេសការដាក់ឱ្យដំណើរការ អាកា​សយានដ្ឋានអន្តរជាតិតេជោ ដែលនឹងអាចទទួលអ្នកដំណើរបានរហូតដល់១៣លាននាក់ ក្នុងមួយឆ្នាំក្នុងដំណាក់កាលទី១។

ចំណូលពីភ្ញៀវទេសចរណ៍អន្តរជាតិ ត្រូវបានប៉ាន់ស្មានថា ទទួលបាន១,៩ពាន់លានដុល្លារអាម៉េរិក កើន៩,១ភាគរយ ធៀបនឹងឆមាសទី១កាលឆ្នាំ២០២៤ ខណៈចំណូលពីការលក់បណ្ណ ចូលទស្សនារមណី​យដ្ឋានអង្គរទទួលបាន២៦,៣ លានដុល្លារអាម៉េរិក។ ជាមួយគ្នានេះ ទេសចរក្នុងស្រុកបន្តកើន៥០,៣ភាគរយ ដល់១៤,៦លាននាក់​។ រាជធានីភ្នំពេញ ឈរនៅលំដាប់ទី១ ជាតំបន់ដែលទទួលទេសចរច្រើនជាងគេ ដែលមានសមាមាត្រ ៣៨,៤ភាគរយនៃទេសចរ ក្នុងស្រុកសរុប។ ទី២ តំបន់ឆ្នេរ កើនឡើង៣៦,៦ភាគរយ ខណៈខេត្តសៀមរាបឈរនៅលំដាប់ទី៣ ជាមួយកំណើន១៦ភាគរយ និងតំបន់អេកូទេសចរណ៍ឈរនៅលំដាប់ទី៤ សម្រេចបានកំណើន១,៩ភាគរយ​។

លើសពីនេះ វិស័យកសិកម្មបន្តទទួល បានកំណើន១,២ភាគរយ។ កំណើននេះគាំទ្រដោយកំណើនផលដំណាំ និង ធនធានជលផល។ បើរបាយការណ៍ធនាគារជាតិនៃកម្ពុជា ផលស្រូវរដូវប្រាំងបានកើន១០,៩ភាគរយ ធៀបនឹងគ្រាដូចគ្នាឆ្នាំ២០២៤ (កើន ១២,១ភាគរយ) ដល់៤,៣លានតោន ។ ការណ៍នេះ ដោយសារ ភាពអំណោយផលនៃអាកាសធាតុ និងការអភិវឌ្ឍប្រព័ន្ធធារាសាស្ត្រ។

ទន្ទឹមនេះ ការកើនឡើងនៃតម្លៃស្រូវ នាឆ្នាំ២០២៣-២០២៤ ក៏បានរួមចំណែកជំរុញការដាំដុះផងដែរ។ លើសពីនេះ ផ្ទៃដីដាំដុះស្រូវ  រដូវវស្សាក៏បានកើន៤,៤ភាគរយ ធៀបនឹងឆមាសទីឆ្នាំមុន គឺធ្លាក់ចុះ៧,៥ភាគរយ៕