ដោយ វុត្ថា
ភ្នំពេញ៖ សមាគមអ្នកវិនិយោគអន្តរជាតិថ្មីមួយក្រុមនៃក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម ដែលមានក្រុមហ៊ុនខ្មែរនិងបរទេសបានបោះទុន ៧០លានដុល្លារអាមេរិរួមគ្នាចាប់ផ្ដើមការសាងសង់ ជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វដ៏ធំ និងសណ្ឋាគារលំដាប់ពិភពលោរបស់ខ្លួននៅលើទំហំដី ១០០ហិកតា ក្នុងខេត្តសៀមរាប។
យោងតាមសេចក្តីប្រកាសព័ត៌មានរបស់ក្រុមហ៊ុនដែលបានចេញផ្សាយនៅថ្ងៃទី ៣០ ខែមេសា ឆ្នាំ ២០១៩នេះថា ការសាងសង់នឹងត្រូវសាងសង់ជា ៣ដំណាក់កាល ពោលគឺដំណាក់កាលទី១ នៃគម្រោងអភិវឌ្ឍន៍នឹងចាប់ផ្ដើមក្នុងខែឧសភា ឆ្នាំ ២០១៩ និងគ្រោងបញ្ចប់ក្នុងខែឧសភា ឆ្នាំ ២០២១។
សេចក្តីប្រកាសព័ត៌មានដដែលបន្តថា ក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម ត្រូវបានបង្កើតឡើងក្នុងទម្រង់ជាដៃគូរវាងវិនិយោគិនកម្ពុជា និងវិនិយោគិនជប៉ុនក្រោមកិច្ចសហការជាមួយ ICM Inc. (International Concept Management Inc.) ពីសហរដ្ឋអាមេរិកដែលរៀបចំរចនាប្លង់ គ្រប់គ្រងគម្រោង និងប្រតិបត្តិជលវប្បដ្ឋាន និងឧទ្យានសមុទ្រនៅទូទាំងពិភពលោក។
ប្រភពដដែលបន្តថា ពីមុន ICM បានចាប់ដៃគូជាមួយនឹង Disney(ឌីនី), the San Francisco Academy of Sciences (បណ្ឌិត្យសភាវិទ្យាសាស្ត្រសាន់ហ្វ្រាន់ស៊ីស្កូ), the Baltimore Aquarium (ជលវប្បដ្ឋានបាលទីមល) , the Osaka Aquarium (ជលវប្បដ្ឋានអូសាកា), Xcaret Park (ជលវប្បដ្ឋានអិចស្ការេត) នៅម៉ិកស៊ីកូ និង Loro Park (ឧទ្យានឡូរូ) នៃកោះកាណារី Canary Islands ។ល។
លោក Roger R. Reynolds, ប្រធានក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម និងជាស្ថាបនិករបស់ ICM ឲ្យដឹងនៅក្នុងពិធីបើកសម្ពោធសាងសង់នូវគម្រោងកាលពីថ្ងៃទី ២៩ ខែមេសាម្សិលមិញនេះថា ជារួម គម្រោងក្រោមភាពជាដៃគូនេះមានបំណងវិនិយោគទឹកប្រាក់ ៧០ លានដុល្លារសហរដ្ឋអាមេរិក នៅក្នុង ៣ដំណាក់កាល - ដំណាក់កាលទី១ នឹងចំណាយទឹកប្រាក់ ១៨ លានដុល្លារសហរដ្ឋអាមេរិក ខណៈដែល (ដំណាក់កាលទីII) បន្ថែមភាពទាក់ទាញ ដោយបង្កើតនូវ សួនរុក្ខសាស្រ្ត សាលតាំងពិព័រណ៍ ជម្រកល្មូន និង ចុងបញ្ចប់ គឺការអភិវឌ្ឍសណ្ឋាគារលំដាប់ពិភពលោក (ដំណាក់កាលទី III) ក្នុងបំណងធ្វើឲ្យ ជលវប្បដ្ឋានក្រុងអង្គរ និងអាណាចក្រជម្រកសត្វ (Angkor Aquarium & Animal Kingdom) ក្លាយជាគោលដៅបង្កើននូវការស្នាក់នៅក្រុងសៀមរាបបានយូរថ្ងៃផងដែរ។
លោកបន្ត ថា ត្រឹមតែដំណាក់កាលទីមួយប៉ុណ្ណោះ ការបង្កើតភាពទាក់ទាញថ្មី នឹងធ្វើឲ្យមានសក្ដានុពលជម្រុញឲ្យភ្ញៀវទេសចរមកកាន់ខេត្តសៀមរាបបន្តការស្នាក់នៅជាមធ្យមពាក់កណ្ដាលថ្ងៃទៅហើយ។
លោកថា «យោងតាមការពិភាក្សាដំបូងបំផុតរបស់ខ្ញុំជាមួយលោក ម៉េង ហៀង ពួកយើងទាំងពីរយល់ស្របគ្នាថា មានលទ្ធភាពអស្ចារ្យគួរជាទីរំភើបក្នុងការនាំមកនូវ មជ្ឈមណ្ឌល ជលវប្បដ្ឋាន ត្រីទឹកសាប ទឹកប្រៃ និងព្រមទាំងជម្រកអភិរក្សសត្វ ក្នុងការម្រើនូវសេចក្តីតម្រូវការ និងការសិក្សាអប់រំ ដល់ប្រជាជនក្នុងមូលដ្ឋាន និងភ្ញៀវទេសចរអន្តរជាតិដែលទស្សនាខេត្តសៀមរាប»៕