ដោយៈ គង់ សូរិយា
ភ្នំពេញៈ សក្តានុពលទេសចរណ៍កម្ពុជា នឹងត្រូវផ្សព្វផ្សាយយ៉ាងទូលំទូលាយ តាមរយៈក្រុមហ៊ុនអាកាសចរណ៍ លំដាប់ពិភពលោក Etihad Airways នេះជាការលើកឡើងរបស់រដ្ឋមន្រ្តីក្រសួងទេសចរណ៍ លោកហួត ហាក់។
តបតាមការស្នើសុំរបស់ក្រុមហ៊ុន ផលិតស្ប៉តពាណិជ្ជកម្មពីសហរដ្ឋអាមេរិក Jacob Media United States នារសៀលថ្ងៃទី២៩ ខែសីហា ឆ្នាំ២០២៥ លោកហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនតំណាងក្រុមហ៊ុន និងក្រុមការងារថត ចូលជួបសម្តែងការគួរសម ពិភាក្សាការងារអំពីដំណើរការថត និងស្នើសុំអនុសាសន៍ណែនាំដ៏ខ្ពង់ខ្ពស់ ពីសំណាក់ឯកឧត្ដមរដ្ឋមន្ត្រី លើការងារថតឃ្លីបវីដេអូផ្សព្វផ្សាយសក្តានុពលទេសចរណ៍ របស់កម្ពុជាជូនក្រុមហ៊ុនអាកាសចរណ៍Etihad Airways នាទីស្តីការក្រសួង។
ក្នុងឱកាសនៃជំនួបកាលពីថ្ងៃទី២៩ សីហាកន្លងមកនេះ លោករដ្ឋមន្ត្រី បានថ្លែងអំណរគុណ កោតសរសើរ និងវាយតម្លៃខ្ពស់ដល់គំនិតផ្តួចផ្តើមដ៏ល្អ និងមានសារៈសំខាន់ ដល់ក្រុមហ៊ុនអាកាសចរណ៍ Etihad Airways និងក្រុមហ៊ុន Jacob Media United States ដែលបានសហការគ្នា ថតវីដេអូផ្សព្វផ្សាយពីសក្តានុពលទេសចរណ៍កម្ពុជាដល់ប្រជាជនក្នុងតំបន់មជ្ឈឹមបូព៌ា និងពិភពលោកទាំងមូល។
លោកហួត ហាក់ បានផ្ដល់អនុសាសន៍ណែនាំដល់ក្រុមផលិតករ ជួយផលិតវីដេអូ ឱ្យមានកម្រិតគុណភាពខ្ពស់ និងជួយសំរិតសំរាំងលើខ្លឹមសារ និងរូបភាព ហើយត្រូវសហការជាប់ជាប្រចាំ ជាមួយស្ថាប័នមានសមត្ថកិច្ចរបស់កម្ពុជា ជាពិសេសក្រសួងទេសចរណ៍ ដើម្បីអាចសម្រេចគោលដៅការងារដោយរលូន និងប្រកបដោយគុណភាពខ្ពស់។
ជាមួយគ្នានេះ លោករដ្ឋមន្រ្តី ក៏បានស្នើដល់ក្រុមការងារក្រុមហ៊ុន ជួយផ្សព្វផ្សាយ ពីស្ថានភាពសុខសន្តិភាព ស្ថិរភាពនយោបាយ សង្គម និងសុខសុវត្ថិភាព ដែលកម្ពុជាផ្តល់ជូនដល់ភ្ញៀវទេសចរទាំងអស់អញ្ជើញមកកម្ពុជា ដូចដែលក្រុមការងារបានឃើញផ្ទាល់នាពេលនេះ។
តំណាង និងក្រុមការងាររបស់ក្រុមហ៊ុន Jacob Media United States បានធ្វេីការថ្លែងអំណរគុណជូនលោករដ្ឋមន្រ្តី ដែលបានឆ្លៀតពេលវេលាដ៏មមាញឹក អនុញាតជូនក្រុមការងារផលិតឃ្លីបបានចូលជួបសម្តែងការគួរសមនាពេលរសៀលនេះ និងបេ្តជ្ញាផ្សព្វផ្សាយពីព៍ត៌មានពិតពីប្រទេសកម្ពុជាដែលបានជួបផ្ទាល់ ជាពិសេសបដិសណ្ឋារកិច្ចដ៏កក់ក្តៅរបស់កម្ពុជា ដូចបានទទួលពីសំណាក់ឯកឧត្តមរដ្ឋមន្រ្តី ដល់ក្រុមគ្រួសារ មិត្តភក្តិ មិត្តរួមការងារ និងfollowers របស់ខ្លួនទាំងអស់។
តាមរយៈប្រភពព័ត៌មានផ្សព្វផ្សាយជាសាធារណៈ ក្រុមហ៊ុនអាកាសចរណ៍ Etihad Airways ជាក្រុមហ៊ុនអាកាសចរណ៍ដ៏ធំលំដាប់ទី២ នៃប្រទេសអេមីរ៉ាតអារ៉ាប់រួម (UAE) ដែលមានទីស្នាក់ការកណ្តាលរបស់ខ្លួននៅរដ្ឋធានីអាប៊ុយដាប៊ី “Abu Dhabi” មានយន្តហោះជាង១១០គ្រឿង និងហោះហើរទៅកាន់គោលដៅជាង១២០កន្លែង ក្នុងពិភពលោក ដោយបានដឹកអ្នកដំណើរជាង២០លាននាក់ក្នុងរយៈពេល១២ខែចុងក្រោយនេះ។
ក្រុមហ៊ុន នឹងចាប់ផ្តើមជើងហោះហើរត្រង់ ពីរដ្ឋធានីអាប៊ុយដាប៊ី “Abu Dhabi” មករាជធានីភ្នំពេញចាប់ពីថ្ងៃទី៣ ខែតុលា ឆ្នាំ២០២៥ ខាងមុខនេះ៕
