ដោយ វុត្ថា
ភ្នំពេញ៖ អាជ្ញាធរខេត្តក្រចេះតាមរយៈមន្ទីរទេសចរណ៍ខេត្តបាននឹងកំពុងសិក្សា និងរៀបចំរមណីយដ្ឋានទេសចរណ៍ដោយផ្សារភ្ជាប់ជាមួយគម្រោងបង្កើតសហគមន៍ទេសចរណ៍ថ្មីចំនួន ២កន្លែង។
លោក ជួប រតនា ប្រធានមន្ទីរទេសចរណ៍ខេត្តក្រចេះបានឱ្យដឹងតាមរយៈទូរស័ព្ទនៅព្រឹកថ្ងៃទី ៤ ខែឧសភា ឆ្នាំ ២០១៩ នេះថា ក្រុមការងារមន្ទីរទេសចរណ៍ខេត្តបានចុះទៅពិនិត្យ និងសិក្សាសក្តានុពលទេសចរណ៍ក្នុងការបង្កើត សហគមទេសចរណ៍២កន្លែង នៅក្នុងស្រុកព្រែកប្រសព្វដោយសហគមន៍ទី១ ឱ្យមានការបង្កើតអាហារដ្ឋាននៅលើឆ្នេរខ្សាច់ដូចនៅកោះទ្រុង ហើយមួយទៀត គ្រោងបង្កើតនៅក្នុងកោះព្រហ្មចារី ។
យោងតាមការចុះផ្សាយហ្វេសបុករបស់មន្ទីរទេសចរណ៍ខេត្តក្រចេះ បានឱ្យដឹងថា ក្នុងស្មារតីជំរុញបង្កើតផលិតផលទេសចរណ៍ថ្មីៗ ជាពិសេសសហគមន៍អេកូទេសចរណ៍ មន្ទីរទេសចរណ៍ខេត្តក្រចេះ បានសហការជាមួយអង្គការ WWF បានចុះត្រួតពិនិត្យ និងសិក្សាសក្តានុពលទេសចរណ៍ ២កន្លែង ក្នុងស្រុកព្រែកប្រសព្វ រួមមានដែនជំរកសត្វព្រៃព្រែកប្រសព្វ (ការអភិរក្សសត្វក្តាន់) និងកោះព្រហ្មចារីយ៍ ដើម្បីអភិវឌ្ឍឱ្យទៅជារមណីយដ្ឋានទេសចរណ៍ ដោយផ្សារភ្ជាប់ជាមួយគម្រោងបង្កើតសហគមន៍ទេសចរណ៍២កន្លែង ដែលបង្វែររបរប្រជាពលរដ្ឋមូលដ្ឋានពីការកាប់ឈើ និងបរបាញ់ក្តាន់ មកបម្រើសេវាកម្មទេសចរណ៍។
លោក ជូប រតនា បានបញ្ជាក់ថា “នៅឆ្នាំនេះ យើងនឹងរៀបចំចងក្រងសហគមន៍ឲ្យមានការរៀបចំកញ្ចុះផ្សេងៗ ដើម្បីទទួលភ្ញៀវទេសចរណ៍ ហើយរាល់ការចំណាយផ្សេងៗគឺជាបន្ទុករបស់សហគមន៍ ហើយអង្គការ WWF ជាអ្នករៀបចំហេដ្ឋារចនសម្ព័ន្ធជូនសហគមន៍”។
លោកបន្តថា នៅក្នុងខេត្តក្រចេះ មានសហគមន៍ទេសចរណ៍ចំនួន ៣កន្លែង រួមមានកោះទ្រុង កោះផ្តៅ សហគមន៍អេកូទេសចរណ៍កោះសាមសិប នៅពេលរៀបចំសហគមន៍ពីរនេះរួចហើយ នឹងកើនដល់ ៥សហគមន៍ និងមានរមណីយដ្ឋានទេសចរណ៍ចំនួន ១៦ កន្លែងរួមមាន ក្នុងនោះមានតែ ៤ ទៅ ៥ កន្លែងប៉ុណ្ណោះដែលពេញនិយមសម្រាប់ភ្ញៀវទេសចរណ៍ទៅលេងកម្សាន្ត។
បើតាម ប្រធានមន្ទីរទេសចរណ៍រូបនេះ បានឱ្យដឹងថា ខេត្តក្រចេះ បានទទួលភ្ញៀវទេសចរណ៍ដែលមកលេងកម្សាន្តនៅក្នុងខែមេសាឆ្នាំ ២០១៩ កន្លងមកនេះ មានចំនួន ១៤ម៉ឺននាក់ និង ភ្ញៀវបរទេសជិត ២០០០ នាក់ ៕
