ដោយៈ ម៉ាណា
ប្រទេសចិនៈ ក្រុមហ៊ុន Guilin Junda Transporation Co., Ltdរបស់ចិន គ្រោងចូលរួមអភិវឌ្ឍម័ស្ទឹងសៀរាបឲ្យចេញជាផ្លែផ្កា និងមានភាពទាក់ទាញជាពិសេសដល់ភ្ញៀវទេសចរណ៍ជាតិ និងអន្តរជាតិ។
ព័ត៌មាននេះត្រូវបានលើកឡើង ក្នុងពេលរដ្ឋមន្រ្តីទេសចរណ៍លោកហួត ហាក់ បានអនុញ្ញាតជូនលោកMA Tieqiao ប្រធានក្រុមប្រឹក្សាភិបាលក្រុមហ៊ុនGuilin Junda Transporation Co., Ltd. និងសហការី ចូលជួបពិភាក្សាការងារ និងរាយការណ៍ជូនអំពីលទ្ធផលនៃការចុះពិនិត្យសិក្សាផ្ទាល់ លើគម្រោងអភិវឌ្ឍន៍ស្ទឹងសៀមរាប កាលពីខែកញ្ញា ឆ្នាំ២០២៥ កន្លងមក។
ក្នុងជំនួបដ៏សំខាន់ និងប្រកបដោយផ្លែផ្កានេះ លោករដ្ឋមន្រ្តី បានថ្លែងអំណរគុណ កោតសរសើរ និងវាយតម្លៃខ្ពស់ចំពោះគំនិតផ្តួចផ្តើមបោះទុនវិនិយោគ រាប់រយលានដុល្លារអាម៉េរិករបស់ក្រុមហ៊ុន ដែលបានចាប់អារម្មណ៍ លើសក្តានុពលទេសចរណ៍ ប្រកបដោយថាមពលរបស់កម្ពុជា ដែលជាទីផ្សារទើបនឹងរះ ព្រមទាំការជឿជាក់ដ៏មុតមាំលើការដឹកនាំប្រកបដោយគតិបណ្ឌិតត្រឹមត្រូវ និងចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា ដែលបន្តធានានូវកត្តាសុខសន្តិភាព ស្ថិរភាពនយោបាយ សេដ្ឋកិច្ច និងសង្គម ជួយឱ្យមានការអភិវឌ្ឍឥតឈប់ឈរលើគ្រប់វិស័យ ជាពិសេសហេដ្ឋារចនាសម្ព័ន្ធគាំទ្រ ដល់វិស័យទេសចរណ៍ និងការធានាសុខសុវត្ថិភាពដល់អ្នកទេសចរជាតិ និងអន្តរជាតិ។
លោកហួត ហាក់បញ្ជាក់ថា ក្នុងជំនួបលើកទី២ នាពេលនេះ ពិតជាការបោះជំហានមួយកម្រិតទៀត ដើម្បីឈានដល់ការអនុវត្តជាក់ស្តែងនៃគម្រោងវិនិយោគដ៏ធំ និងមានសារៈសំខាន់ដល់វិស័យវិនិយោគ។
ជាកិច្ចឆ្លើយតប លោកអគ្គនាយកក្រុមហ៊ុន បានគោរពថ្លែងអំណរគុណយ៉ាងជ្រាលជ្រៅជូនឯកឧត្ដមរដ្ឋមន្ត្រី និងថ្នាក់ដឹកនាំក្រសួងទេសចរណ៍ ដែលបានអនុញ្ញាតផ្ដល់ឱកាស ចូលជួបសម្តែងការគួរសម ពិភាក្សាការងារ ព្រមទាំងរាយការណ៍ពីលទ្ធផលសិក្សារបស់ក្រុមហ៊ុន។ ជំហានបន្ទាប់គឺក្រុមហ៊ុន នឹងរៀបចំបែបបទផ្លូវការស្នើសុំការអនុញ្ញាតពីរាជរដ្ឋាភិបាលកម្ពុជា។
ក្រុមហ៊ុន Guilin Junda Transportation Co., Ltd បានបង្កើតឡើងក្នុងឆ្នាំ១៩៨២ មានស្ថានីយ១២ផ្លូវដឹកជញ្ជូន៣០០ខ្សែ បុគ្គលិកចំនួន៣៨០០នាក់ ដែលមានសេវាកម្មជាច្រើនដូចជា ដឹកជញ្ជូនផ្លូវអាកាស ផ្លូវគោក Logistic សណ្ឋារគារ និងសេវាកម្មជាច្រើនទៀតផងដែរ៕
