ដោយៈ គង់ សូរិយា
ភ្នំពេញៈ រយៈពេល២ទសវត្សរ៍ចុងក្រោយនេះ មុនជម្ងឺកូវីដ១៩មកដល់ យុគមាសក្នុងវិស័យអចលនទ្រព្យកម្ពុជា មានការលេចត្តដែតឡើង ហើយរាជធានីភ្នំពេញ បានក្លាយជាគោលដៅនៃការវិនិយោគពីអន្តរជាតិ ពិសេសពីប្រទេសចិន។
ប៉ុន្តែជាមួយនឹងមនុញ្ញផល និងភាពមានបានរបស់ប្រជាពលរដ្ឋភាគច្រើន ដែលទទួលបានផលចំណេញពីវិស័យនេះ ហាក់លែងសូវមានឱកាសទៀតហើយ ប៉ុន្តែពួកគេត្រូវសម្លឹងមើលហានិភ័យមួយចំនួនវិញ ប្រសិនជាចង់ឈរជើងនៅក្នុងវិស័យនេះ។
ការសិក្សារបស់អ្នកជំនាញ និងក្រុមហ៊ុនបរទេសមួយចំនួនបានរកឃើញថា ហានិភ័យនៃការផ្គត់ផ្គង់លើសតម្រូវការ ដូចជា ផ្នែកអាផាតមិនសេវាកម្មប្រណីតនៅក្នុងតំបន់មួយចំនួន មានអត្រាកាន់កាប់ទាប ដែលបង្ហាញពីការផ្គត់ផ្គង់លើសនៅក្នុងទីផ្សារ។
ជាមួយគ្នានេះ កំណើនផ្សារទំនើប ឬទីផ្សារលក់រាយ អាគារការិយាល័យ ខុនដូ ក៏កំពុងស្ថិតនៅក្នុងហានិភ័យ ក្នុងទីផ្សារផងដែរ ដោយសារការផ្គង់ផ្គង់លើសតម្រូវការ និងហានិភ័យបំណុលរបស់ប្រជាពលរដ្ឋ។
លើសពីនេះ បញ្ហាបទប្បញ្ញត្តិ/កម្មសិទ្ធិ ច្បាប់កម្មសិទ្ធិបរទេស ការកាន់កាប់ដីធ្លី ការអនុម័តការអភិវឌ្ឍន៍ សុទ្ធតែមានសារៈសំខាន់នៅក្នុងបរិបទរបស់ប្រទេសកម្ពុជា។
ទោះបីជាតម្រូវការកើនឡើងក៏ដោយ ប្រាក់ចំណូលក្នុងស្រុកកំណត់កម្រិតអតិបរមា លើចំនួនលំនៅដ្ឋាន សម្រាប់តម្រូវការទិញ និងជួលបាននៅក្នុងទីផ្សារពិតប្រាកដ។
អ្នកជំនាញបានលើកឡើងថា អ្នកអភិវឌ្ឍន៍គួរផ្តោតលើលំនៅដ្ឋានកម្រិតមធ្យម នៅក្នុងតំបន់ដែលអាចចូលប្រើប្រាស់បាន ជាជាងផ្តោតលើភាពប្រណីត ធានាការតភ្ជាប់ សេវាកម្ម និងការលាយបញ្ចូលគ្នានៃរបៀបរស់នៅ។
សម្រាប់វិនិយោគិន ពួកគេគួរតែស្វែងរកតំបន់ ដែលមានហេដ្ឋារចនាសម្ព័ន្ធប្រសើរឡើង តម្រូវការក្នុងស្រុកកើនឡើង (ការជួល) ជាជាងការប៉ាន់ស្មានតម្លៃខ្ពស់។ ចំណែកអ្នកទិញ ក៏គួរពិចារណាលើស្រុកដែលកំពុងរីកចម្រើន ដែលមានផ្លូវចូលប្រើប្រាស់បានល្អ និងពិនិត្យមើលហេដ្ឋារចនាសម្ព័ន្ធ ភាពជឿជាក់របស់អ្នកអភិវឌ្ឍន៍ និងថាតើផលចំណេញជាក់ស្តែងនឹងទៅជាយ៉ាងណា។
ផ្អែកលើចំណុចដែលបានបង្ហាញខាងលើ វាជាការត្រឹមត្រូវក្នុងការរំពឹងទុកថា អចលនទ្រព្យក្នុងទីក្រុងភ្នំពេញ អាចរីកចម្រើនក្នុងលក្ខខ័ណ្ឌមួយក្នុងរយៈពេលប៉ុន្មានឆ្នាំខាងមុខ ជាពិសេសប្រសិនបើគម្រោងហេដ្ឋារចនាសម្ព័ន្ធដំណើរការបានល្អ ហើយតម្រូវការពីអ្នកស្រុកបន្តកើនឡើង។
លោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានថ្លែងកាលពីពេលថ្មីៗនេះថា ក្រសួងនឹងបញ្ចេញតួលេខជាក់លាក់ ពីតម្រូវការពិតប្រាកដនៃលំនៅដ្ឋាន ដែលអ្នកអភិវឌ្ឍន៍អាចធ្វើបាន ជាជាងការសាងសង់លើសតម្រូវការនៅក្នុងទីផ្សារ។
លោកបញ្ជាក់ថា “ផ្អែកលើសេដ្ឋកិច្ចរបស់ប្រទេស លំនៅដ្ឋាន មានតម្លៃត្រឹម២០,០០០ដុល្លារក្នុងមួយយូនីត មានភាពសមស្របបំផុតសម្រាវ់ជីវភាពប្រជាពលរដ្ឋកម្ពុជា”៕
