ដោយៈ និស្ស័យ
ពោធិ៍សាត់ៈ ជាព័ត៌មានដ៏រំភើបមួយ សម្រាប់អ្នកចូលចិងត្តទេសចរណ៍បែបផ្សងព្រេង ដោយមន្ទីរទេសចរណ៍ខេត្តពោធិ៍សាត់ នឹងរៀបចំព្រឹត្តិការណ៍ដំណើរ ទេសចរណ៍ផ្សងព្រេងឡើង “ភ្នំតាក្រហម ក”។
ភ្នំនេះ ស្ថិតនៅសហគមន៍រាំងខ្វាវ ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ ដែលដំណើរផ្សងព្រងនេះ នឹងចាប់ផ្ដើមនៅថ្ងៃទី៥-៦-៧ ខែធ្នូ ឆ្នាំ២០២៥ ដោយចេញដំណើរពីសហគមន៍រាំខ្វាវ។
យោងតាមការជូនដំណឹងរបស់ មន្ទីរទេសចរណ៍ខេត្តពោធិ៍សាត់ នៅថ្ងៃទី១៧ ខែវិច្ឆិកា ឆ្នាំ២០២៥ បានឱ្យដឹងថា បើភ្ញៀវទេសចរមានបំណងចង់ចូលរួមដំណើរផ្សងព្រេងនេះ សូមធ្វើការទំនាក់ទំនងសាកសួរព័ត៌មានបន្ថែមមកកាន់លេខទូរស័ព្ទ 088 510 6352។
ភ្នំខ្វាវ ហៅភ្នំតាក្រហមក មានទីតាំងក្នុងដែនជម្រកសត្វព្រៃឱរ៉ាល់ ភូមិសាស្រ្តខេត្តពោធិ៍សាត់។ កំពូលភ្នំខ្វាវ ឬភ្នំលោកតាក្រហមក ដែលមានកម្ពស់១,២០០ម៉ែត្រ អណ្ដូងត្រាំស្បែកគង់ និងទឹកហូរស្ទឹងសេនាធិការ យ៉ាងស្រស់ស្អាត។
ដើម្បីធ្វើដំណើរទៅលេងភ្នំខ្វាវ ហៅភ្នំតាក្រហមកនេះ អ្នកទេសចរណ៍ អាចមានជ្រើសរើសផ្លូវធ្វើដំណើរចំនួនបីផ្សេងគ្នា ដោយចេញពីភ្នំពេញទៅដល់ផ្លូវទី១ គឺចូលតាមបំណក់ (ច្រកល្អៀង) ដែលមានចម្ងាយផ្លូវប្រវែងប្រហែល៣០គីឡូម៉ែត្រ។ ផ្លូវទី២ ចូលតាមព្រងឹលស្រុកភ្នំក្រវាញ ដែលមានចម្ងាយប្រហែល៤៧គីឡូម៉ែត្រ និងផ្លូវទី៣ ចូលតាមក្លោងទ្វាវត្តកណ្ដាល (ទីរួមស្រុកក្រវាញ) កាត់តាមភូមិមុលដែលមានប្រវែង៣៧គីឡូម៉ែត្រ៕
