ដោយ ដែន ចែងចាំង
ភ្នំពេញៈ សមាគមទីភ្នាក់ងារទេសចរណ៍កម្ពុជា និងមជ្ឈមណ្ឌលវបប្បធ៌មចិនប្រចាំខេត្តកានស៊ូ បាននិងកំពុងធ្វើការរួមគ្នា ដើម្បីលើកកំពស់ការផ្សព្វផ្សាយសក្តានុពលទេសចរណ៍ពីគ្នាទៅវិញទៅមក។
ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីនបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៩ ឧសភានេះថា ប្រតិភូខេត្តកានស៊ូ ប្រទេសចិនបានមកផ្សព្វផ្សាយសក្តានុពលទេសចរណ៍នៅកម្ពុជា ហើយឆ្លៀតឳកាសនេះសមាគមទីភ្នាក់ងារទេសចរណ៍កម្ពុជា ក៏បានផ្សព្វផ្សាយពីសក្តានុពលទេសចរណ៍ទៅកាន់ប្រទេសចិនផងដែរ ដើម្បីទាក់ ទាញភ្ញៀវទេសចរណ៍ចិន កាន់តែច្រើនថែមទៀតមកទស្សនាកម្ពុជា។
-->
លោកស្រីបន្តថា “បច្ចុប្បន្នភ្ញៀវទេសចរណ៍ចិន មកទស្សនាកម្ពុជាកំពុងកើនឡើងខ្លាំងដដែល ហើយយើងរំពឹងថានឹងកើន ឡើងបន្ថែមទៀតនៅឆ្នាំនេះ”។ លោកបន្តថា “នាពេលអនាគត សមាគមរំពឹងថានឹងមានការហោះហើរត្រង់ពីខេត្តកានស៊ូមកម្ពុជា ដោយប្រតិភូមកពីខេត្តនេះកំពុងជំរុញការងារនេះ”។
បច្ចុប្បន្នមានក្រុមហ៊ុនអាកាសចរណ៍ជាតិ និងអន្តរជាតិជាង ៤០កំពុងប្រតិបត្តិការហោះហើរត្រង់មកកាន់កម្ពុជា។
ប្រធានផ្នែកបង្កើនជើងហោះហើរនៃក្រុមហ៊ុនអាកាសយានដ្ឋាកម្ពុជា លោកពេជ្រ សុប៉ុនតារាបានមានប្រសាសន៍ថា កាលពីឆ្នាំមុនព្រលានយន្តហោះអន្តរជាតិ ខេត្តសៀមរាបបានទទួលអ្នកដំណើរឆ្លងកាត់ប្រមាណ ៤,៥លាននាក់ និងរំពឹងទទួលបានចំនួនភ្ញៀវដដែលនៅឆ្នាំនេះ ដោយសារមានបញ្ហាមួយចំនួនទាក់ទង នឹងការធ្លាក់ចុះចំនួនភ្ញៀវទេសចរណ៍ពីប្រទេសជាច្រើន ហើយភ្ញៀវទេសចរណ៍ចិនមានកំនើនដដែល ប៉ុន្តែអត្រាកំនើនទាបជាងឆ្នាំមុន។
លោកបន្តថា “ខេត្តសៀមរាបគួរមានផលិតផលទេសចរណ៍ច្រើន ក្រៅពីអង្គរ ព្រោះបច្ចុប្បន្នក្រៅពីទស្សនារមណីយដ្ឋានអង្គរ ពួកគេមិនដឹងទៅទស្សនានៅកន្លែងណាទៀតនៅឡើយ”៕
