ដោយនៅ វឌ្ឈនា
ភ្នំពេញ៖ រដ្ឋាភិបាលតាមរយៈក្រសួងសេដ្ឋកិច្ច ហិរញ្ញវត្ថុ បានចេញសេចក្តីប្រកាសមួយណែនាំដល់ប្រជាពលរដ្ឋឲ្យមានការប្រុងប្រយ័ត្ន និងពិនិត្យឲ្យបានគ្រប់ជ្រុជ្រោយរាល់ព័ត៌មានចំពោះការទិញ-លក់អចលនទ្រព្យនៅក្នុងប្រទេសកម្ពុជា បន្ទាប់ពីមានរឿងឆបោកមួយចំនួនកើតឡើងជាបន្តបន្ទាប។
សេចក្តីប្រកាសព័ត៌មានដែលបានចេញផ្សាយ កាលពីថ្ងៃទី ៣ ខែឧសភា ឆ្នាំ ២០១៩ កន្លមកនេះបានបញ្ជាក់ថា ការចេញសេចក្តីប្រកាសព័ត៌មាននេះ គឺក្នុងគោលបំណងជួយឲ្យការទិញ-លក់អចលនទ្រព្យ (ដីឡូត៍ និងផ្ទះ) អាចប្រព្រឹត្តទៅដោយរូលូន និងអាចជៀសវាងហានីភ័យ ជាយថាហេតុដែលបង្កឡើងដោយជនខិលខូច។
សេចក្តីប្រកាសព័ត៌មានដដែលបានបន្តថា ដូច្នេះមុនធ្វើការសម្រេចចិត្តទិញអចលនទ្រព្យ ក្រសួងសេដ្ឋកិច្ច និងហិរញ្ញវត្ថុ សូមអំពាវនាវដល់សាធារណជនមេត្តាយល់ដឹងនូវព័ត៌មានសំខាន់ៗមួយចំនួនដូចខាងក្រោម ដូចជា
ក.ព័ត៌មានសម្រាប់ការទិញដីឡូត៍
១. ឈ្មោះម្ចាស់អចលនទ្រព្យក្នុងវិសញ្ញាបនប័ត្រសម្គាល់អចលនទ្រព្យ (តើជារបស់អ្នកអភិវឌ្ឍគម្រោងពុះដីឡូត៍លក់ ឬ ជារបស់អ្នកផ្សេង)។
២.វិញ្ញាបនប័ត្រសម្គាល់ម្ចាស់អចលនទ្រព្យ (មានជាប់បន្ទុកឬ អត់)។
៣. លិខិតអនុញ្ញាតអភិវឌ្ឍដីដែលចេញដោយអាជ្ញាធរ ឬអង្គភាពមានសមត្ថកិច្ច (ដូចមានចែងក្នុងប្រកាសលេខ០៨៧ ដ.ន.ស ប្រក/នក ចុះថ្ងៃទី ១១ ខែឧសភា ឆ្នាំ ២០១៨ ស្តីពីការអភិវឌ្ឍដីរបស់ក្រសួងដីដែនដី នគរូបនីយកម្ម និងសំណង់)
៤.ឯកសារបង់ពន្ធអចលនវត្ថុ
៥.បណ្ណបំបែកក្បាលដី
៦.ខ្លឹមសារលម្អិតនៃកិច្ចសន្យាលក់-ទិញ។
ខ.ព័ត៌មានសម្រាប់ការទិញលំនៅឋាន
១.លិខិតអនុញ្ញាសាងសង់ (ចេញដោយក្រសួងដែនដី នគរូបនីយកម្ម និងសំណង់ ឬសាលារាជធានី-ខេត្ត)។
២.វិញ្ញាបនប័ត្រសម្គាល់ម្ចាស់អចលនទ្រព្យ (មានជាប់បន្ទុក ឬ អត់)។
៣.អាជ្ញាប័ណ្ណអភិវឌ្ឍលំនៅដ្ឋាន (ចេញដោយក្រសួងសេដ្ឋកិច្ច និងហិរញ្ញវត្ថុ)
៤.ឯកសារបង់ពន្ធអចលនទ្រព្យ
៥.ប័ណ្ណបំបែកក្បាលដី
៦.ខ្លឹមសារលម្អិតនៃកិច្ចសន្យាលក់-ទិញ៕
[…] ប្រភព៖ Property Area […]