ដោយ វុត្ថា
ភ្នំពេញ៖ ឯកអគ្គរដ្ឋទូតហ្វីលីពីនចប់អាណត្តិនៅកម្ពុជា លោក Christopher B. Montero បានសន្យាថា នឹងនៅតែជួយពង្រឹងកិច្ចសហប្រតិបត្តិការលើវិស័យទេសចរណ៍ និងវិស័យកីឡារវាងកម្ពុជា-ហ្វីលីពីន ទោះបីលោកត្រូវរដ្ឋាភិបាលហ្វីលីពីនប្ដូរទៅធ្វើអគ្គរដ្ឋទូតនៅប្រទេសផ្សេងទៀតក៏ដោយ។
លោក Montero នៅក្នុងជំនួបជាមួយលោក ថោង ខុន នៅទីស្ដីការក្រសួងទេសចរណ៍ នៅថ្ងៃទី១០ ខែឧសភា ឆ្នាំ២០១៩ ម្សិលមិញ បានលើកឡើងថា ក្នុងពេលបំពេញបេសកកម្មនៅកម្ពុជាជាង៤ឆ្នាំមកនេះ បានមើលឃើញពីភាពរីកចម្រើនរបស់កម្ពុជា ក្រោមម្លប់សុខសន្តិភាព ស្ថិរភាពនយោបាយ ហើយអគារខ្ពស់ៗក៏កាន់តែផុសត្រដែតឡើងច្រើនទៅៗ។
លោកក៏បានកោតសរសើរពីការរីកចម្រើនលើវិស័យទេសចរណ៍កម្ពុជាផងដែរ ដោយកម្ពុជា-ហ្វីលីពីនបានពង្រីកកិច្ចសហប្រតិបត្តិការជាមួយគ្នាកាន់តែជិតស្និទ្ធ ក្នុងនោះកម្ពុជា-ហ្វីលីពីនក៏បានភ្ជាប់ជើងហោះហើរត្រង់ជាមួយគ្នា តាមរយៈក្រុមហ៊ុនអាកាសចរណ៍ Philippines Airline ដែលបាននិងកំពុងហោះត្រង់ទៅមក ភ្នំពេញ-ម៉ានីល ក្នុងមួយអាទិត្យ ៥ជើង បន្ថែមពីលើកិច្ចប្រតិបត្តិការហោះហើរមួយអាទិត្យ ៤ជើង ម៉ានីល-សៀមរាប របស់ក្រុមហ៊ុនអាកាសចរណ៍សេប៊ូប៉ាស៊ីហ្វិក។
លោករដ្ឋមន្ត្រី ថោង ខុន បានស្នើដល់លោក Montero ជួយជំរុញកិច្ចសហប្រតិបត្តិការរវាងកម្ពុជា-ហ្វីលីពីនឱ្យកាន់តែខ្លាំងក្លាបន្ថែមទៀត ពិសេសលើវិស័យទេសចរណ៍ និងវិស័យកីឡា។ ពាក់ព័ន្ធនឹងវិស័យកីឡានេះ លោក រដ្ឋមន្ត្រីក៏បានផ្ដាំតាមរយៈលោកអគ្គរដ្ឋទូត Montero អញ្ជើញកីឡាករពិភពលោករបស់ហ្វីលីពីន ម៉ានី ប៉ាហ្គីអ័វ ដែលបច្ចុប្បន្នជាសមាជិកព្រឹទ្ធសភាហ្វីលីពីនផងនោះមកទស្សនកិច្ចនៅប្រទេសកម្ពុជាសាជាថ្មី ដើម្បីពង្រឹងកិច្ចសហប្រតិបត្តិការលើវិស័យកីឡាជាមួយគ្នាបន្ថែមទៀត។
ពិសេសជាងនេះទៅទៀត លោករដ្ឋមន្ត្រី ថោង ខុន ក៏បានស្នើដល់លោកអគ្គរដ្ឋទូត Montero ជួយផ្សព្វផ្សាយពីគោលដៅទេសចរណ៍កម្ពុជាដល់ភ្ញៀវទេសចរនៅប្រទេសទីបី ដែលលោកនឹងផ្លាស់ទៅបំពេញបេសកកម្មជាឯកអគ្គរដ្ឋទូតថ្មី នាពេលអនាគតនោះ។
លោកអគ្គរដ្ឋទូតហ្វីលីពីនបានកត់សម្គាល់ឃើញថា ក្នុងរយៈពេលបំពេញបេសកកម្មនៅកម្ពុជាជាង ៤ឆ្នាំមកនេះ គឺការរីកចម្រើនរបស់កម្ពុជាទាំងផ្នែកសង្គម-សេដ្ឋកិច្ច និងតំបន់ទេសចរណ៍ដ៏ល្បីល្បាញរបស់កម្ពុជា ព្រមទាំងពេញចិត្តនឹងការទទួលបដិសណ្ឋារកិច្ច និងទំនាក់ទំនងរបស់ថ្នាក់ដឹកនាំ មន្ត្រីរាជការ និងប្រជាពលរដ្ឋកម្ពុជាទៀតផង៕
