ដោយ ស៊ីវ ម៉េង
សៀមរាបៈ ងាកចេញពីវិស័យទេសចរណ៍ ខេត្តសៀមរាបបាននិងកំពុងទាក់ទាញការវិនិយោគពីអ្នកវិនិយោគជាតិ អន្តរជាតិ ដើម្បីចាប់ផ្តើមអភិវឌ្ឍន៍គំរោងលំនៅដ្ឋាន និងវិស័យអចលនទ្រព្យដែលកំពុងរីកចម្រើននៅកម្ពុជា។
កំនើនប្រជាសាស្ត្រ និងទេសចរណ៍កំពុងទាក់ទាញអ្នកវិនិយោគជាច្រើនទៅកាន់ខេត្តសៀមរាប
ជាមួយនឹងការមកដល់នូវភ្ញៀវទេសចរណ៍ចម្រុះជាតិសាសន៍ ខេត្តសៀមរាបក៏បាននិងកំពុងទាក់ទាញប្រជាពលរដ្ឋក្នុងស្រុកចូលទៅរស់នៅ និងប្រកបអាជីវកម្មនានាតាមជំនាញរបស់ពួកគេផងដែរ។
អភិបាលក្រុងសៀមរាប លោកនួន ពុទ្ឋារ៉ាបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី៨ ឧសភាកន្លងមកថា រហូតមកទល់ពេលនេះ ប្រជាពលរដ្ឋរស់នៅក្នុងក្រុងសៀមរាបបានកើនឡើងដល់ប្រមាណ២៦០,០០០នាក់ហើយ និងកំពុងមានកំនើនថែមទៀត ដែលជាប្រចាំតង់ស៊ីតេប្រជាពលរដ្ឋចូលមករស់នៅ ក្នុងក្រុងសៀមរាបកើនឡើងចន្លោះពី៣ទៅ៥ភាគរយជាប្រចាំ។
លោកបន្តថា “ការកើនឡើងនូវវត្តមានប្រជាពលរដ្ឋនៅក្នុងទីក្រុង ដោយសារការរីកចម្រើនផ្នែកវិស័យទេសចរណ៍ និងកត្តាជាច្រើនទៀត”។
ក្រុងសៀមរាប បច្ចុប្បន្នមានភូមិចំនួន៩៩ និងសង្កាត់ចំនួន១២ ខណៈខេត្តនេះមានស្រុកនិងក្រុងសរុបចំនួន១២។
ប្រធានសមាគមទេសចរណ៍អាស៊ីប៉ាស៊ីហ្វិក លោកធួន ស៊ីណានបានមានប្រសាសន៍ថា ដីនៅក្នុងទីក្រុងសៀមរាបមាននៅសល់ទំនេរច្រើន ហើយការអភិវឌ្ឍក្នុងទីក្រុងត្រូវតែមានការវិវត្តពីមួយថ្ងៃទៅមួយថ្ងៃជារឿងធម្មតា។ លោកបន្តថា ការកើនឡើងនូវចំនួនភ្ញៀវទេសចរណ៍ជាតិ អន្តរជាតិនឹងទាក់ទាញការវិនិយោគពីបរទេស កាន់តែច្រើនថែមទៀតមកកាន់ខេត្តសៀមរាបកាន់តែកើនឡើងថែមទៀត។ លោកបន្តថា នៅខេត្តសៀមរាបចំនួនសណ្ឋាគារមិនខ្វះទេ តែក្រៅពីប្រាសាទបុរាណ មានរមណីយដ្ឋានធម្មជាតិកែច្នៃនៅមានកម្រិត ហើយការគ្រប់គ្រងក៏មិនទាន់បានល្អប្រសើរនៅឡើយ ដូចជារមណីយដ្ឋានភ្នំគូលែនជាដើម។
លោកបន្តថា “ទាក់ទងការវិនិយោគបុរីលំនៅដ្ឋានក្នុងខេត្តនេះ ខ្ញុំមិនបានច្បាស់ទេ តែអាចមានការសិក្សាពីអ្នកវិនិយោគច្បាស់លាស់ហើយ ទើបពួកគេវិនិយោគទឹកប្រាក់រាប់លានដុល្លារអាមេរិក”។
យោងតាមរបាយការណ៍ពីគ្រឹះស្ថានអង្គរ ដែលចេញផ្សាយថ្មីៗនេះបានបង្ហាញថា កាលពីឆ្នាំ២០១៨ចំនួនភ្ញៀវទេសចរណ៍អន្តរជាតិ ចូលទស្សនារមណីយដ្ឋានអង្គរមានប្រមាណ២,៥លាននាក់ កើនឡើង៥,៤ភាគរយធៀបនឹងឆ្នាំ២០១៧។ ចំណែករយៈពេល៤ខែដើមឆ្នាំ២០១៩នេះ ចំនួនភ្ញៀវទេសចរអន្តរជាតិ ចូលទស្សនារមណីយដ្ឋានអង្គរមានចំនួន៩៧៣,៣០៥ នាក់រយៈពេល៤ខែដើមឆ្នាំ ២០១៩។
លោកពេជ្រ សុប៉ុនតារាប្រធានផ្នែកបង្កើនជើងហោះហើរនៃក្រុមហ៊ុនអាកាសយានដ្ឋានកម្ពុជាបានមានប្រសាសន៍ថា ព្រលានយន្តហោះអន្តរជាតិខេត្តសៀមរាបកាលពីឆ្នាំមុនទទួលភ្ញៀវឆ្លងកាត់ចំនួន៤,៥លាននាក់ និងដោយមានក្រុមហ៊ុនអាកាសចរណ៍ចំនួន៣៧កំពុងហោះហើរឡើងចុះជាប្រចាំនៅព្រលានយន្តហោះនេះ។លោកបន្តថា សំរាប់ឆ្នាំ២០១៩នេះ យើងរំពឹងថាចំនួនភ្ញៀវឆ្លងកាត់ព្រលានយន្តហោះនេះ នឹងនៅតែមានភាពល្អប្រសើរ បើទោះជាអាចស្ថិតក្នុងស្ថានភាពទ្រឹងក៏ដោយ។
លោកបន្តថា “ខេត្តសៀមរាប គួរមានផលិតផលទេសចរណ៍ថ្មីបន្ថែមទៀត ក្រៅពីតំបន់រមណីយដ្ឋានអង្គរ ដើម្បីបង្កើនការទាក់ទាញភ្ញៀវទេសចរណ៍ឲ្យមកទស្សនា និងស្នាក់នៅកាន់តែយូរនៅកម្ពុជា”។
បច្ចុប្បន្នក្រុមហ៊ុនអង្គរលែនដ៏ម៉ាក បាននិងកំពុងសហការជាមួយក្រុមហ៊ុនថៃ និងកូរ៉េចំនួន៣ ដើម្បីសាងសង់រមណីយដ្ឋាន និងផ្សារបណ្តែងទឹកជាលើកដំបូងនៅក្នុងស្រុកបន្ទាយស្រី ដែលស្ថិតនៅលើផ្ទៃដី៥០ហិកតា និងគ្រោងបោះទុនវិនិយោគ២០០លានដុល្លារអាមេរិក៕
