ដោយគង់ សូរិយា
បាត់ដំបងៈ ក្រោយពីដើរលេងកម្សាន្តតាមរមណីយដ្ឋានផ្សេងៗ នៅពេលព្រឹក និងពេលរសៀល ភ្ញៀវទេសចរណ៍នានា ពិសេសភ្ញៀវអន្តរជាតិនៅម៉ោង៤រសៀល មានអ្នកខ្លះជិះរឺម៉កកង់បី រថយន្តក្រុង និងជិះកង់ជាដើម សំដៅទៅកាន់ភ្នំសំពៅ ដើម្បីរងចាំមើលការចេញរកចំណីរបស់ហ្វូងសត្វប្រចៀវរាប់លានក្បាល ចេញពីល្អាងភ្នំ នៅម៉ោងជិត៦ល្ងាច។
ហ្វូងសត្វប្រចៀវនៅល្អាងភ្នំសំពៅ បានធ្វើឲ្យមានការទាក់ទាញយ៉ាងខ្លាំងដល់ភ្ញៀវទេសចរបរទេស ទៅទស្សនាកាន់តែច្រើនឡើងៗពីមួយថ្ងៃទីមួយថ្ងៃ សម្រាប់ខេត្តបាត់ដំបង។
ប្រជាពលរដ្ឋរស់នៅជើងភ្នំសំពៅ ដែលកំពុងទទួលផលពីការលក់ដូរចំណីអាហារ ភេសជ្ជៈ វត្ថុអនុស្សាវរីយ៍ និងការដឹកភ្ញៀវឡើងមើលល្អាងលើខ្នងភ្នំសំពៅ បានមានប្រសាសន៍ឲ្យដឹងថា នៅដើមឆ្នាំនេះ មានភ្ញៀវទេសចរណ៍មកលេងកម្សាន្តនៅភ្នំសំពៅច្រើន ពិសេសពេលល្ងាច គឺមានភ្ញៀវបរទេសមកអង្គុយចាំមើលសត្វប្រចៀវ។ ការមកទស្សនាសត្វប្រចៀវនេះ មានកំណើន កាន់តែច្រើនឡើងជាលំដាប់។
ប្រជាពលរដ្ឋបានបន្តថា កំណើននៃភ្ញៀវទេសចរណ៍អន្តរជាតិ ស្របពេលដែលអាជ្ញាធរខេត្តបានសង់ផ្លូវនៅជើងភ្នំសំពៅកាន់តែល្អ និងស្រួលជាងមុន ហើយគ្រោងនឹងដាក់ភ្លើងបំភ្លឺផ្លូវនេះផងដែរ។
តាមភ្ញៀវបរទេសមកចាំមើលសត្វប្រចៀវនៅភ្នំសំពៅ បានលើកឡើងថា វាពិតជាប្លែកណាស់សម្រាប់ពួកគេ ដោយពីមុនមកមិនដែលឃើញហ្វូងសត្វប្រចៀវច្រើនដូចនេះទេ ដោយនៅប្រទេសរបស់ពួកគេធ្លាប់ឃើញត្រឹមតែប្រមាណ ១០ក្បាលអីតែប៉ុណ្ណោះ។
ភ្នំសំពៅ ស្ថិតក្នុងឃុំភ្នំសំពៅ ស្រុកបាណន់ និងមានរយៈចម្ងាយប្រមាណជាង១២គីឡូម៉ែត្រ ពីក្រុងបាត់ដំបង។ ភ្នំនេះមានកំពស់ប្រមាណ១០០ម៉ែត្រ មានកាំជណ្តើរឡើងចំនួន១០៣០កាំ។
នៅលើកំពូលភ្នំដ៏ល្បីនេះ មានវត្តមួយឈ្មោះថា វត្តគិរីរម្យ និងមានល្អាង រូងភ្នំជាច្រើន សរុបទាំងអស់ចំនួន១២ ដែលបច្ចុប្បន្ន បានក្លាយជាគោលដៅទេសចរណ៍ដ៏ធំមួយ ក្នុងខេត្តបាត់ដំបង៕
