ដោយ: សហសេវិក
អន្តរជាតិ: ប្រទេសអារ៉ាប៊ីសាអូឌីតបានផ្អាកគម្រោងសាងសង់អគាររាងគូបមួយនៅចំកណ្តាលទីក្រុងរីយ៉ាដ ខណៈប្រទេសនេះកំពុងវាយតម្លៃឡើងវិញអំពីហិរញ្ញប្បទាន និងលទ្ធភាពនៃគម្រោងនេះ។នេះបើតាមការលើកឡើងរបស់ប្រភពចំនួន៤ ដែលដឹងពីបញ្ហានេះ។
គម្រោងសាងសង់អគារ Mukaab ជាគម្រោងខ្នាតយក្ស ស្ថិតក្រោមចក្ខុវិស័យឆ្នាំ២០៣០ របស់ប្រទេសអារ៉ាប៊ីសាអូឌីត។ គម្រោងនេះត្រូវបានពន្យារពេល ខណៈរដ្ឋាភិបាលអារ៉ាប៊ីសាអូឌីតព្យាយាមគ្រប់គ្រងថ្លៃដើម និងផ្តល់អាទិភាពដល់ការវិនិយោគលើហេដ្ឋារចនាសម្ព័ន្ធចាំបាច់ផ្សេងទៀត។
ប្រទេសនេះកំពុងងាកចេញពីការវិនិយោគក្នុងទំហំទឹកប្រាក់យ៉ាងច្រើនសន្ធឹកសន្ធាប់លើគម្រោងធំៗ ដូចជា គម្រោង The Line ក្នុងទីក្រុង NEOM ដោយងាកទៅផ្តោតលើគំនិតផ្តួចផ្តើម ដែលមានភាពបន្ទាន់ និងអាចទទួលបានផលចំណេញ។
រដ្ឋាភិបាលអារ៉ាប៊ីសាអូឌីតបានងាកទៅផ្តោតលើគម្រោងហេដ្ឋារចនាសម្ព័ន្ធសម្រាប់ត្រៀមរៀបចំពិព័រណ៍ពិភពលោកឆ្នាំ២០៣០ និងព្រឹត្តិការណ៍បាល់ទាត់ពិភពលោកឆ្នាំ២០៣៤ តំបន់វប្បធម៌ចម្រុះ Diriyah ដែលមានទំហំទឹកប្រាក់៦០ពាន់លានដុល្លារ និងគម្រោងទេសចរណ៍ Qiddiya។
ចំណាត់ការនេះក៏ឆ្លុះបញ្ចាំងពីកំណើននៃសម្ពាធផ្នែកសារពើពន្ធផងដែរ ដោយសារតម្លៃប្រេងឆៅមានកម្រិតទាបជាងមុន ដែលធ្វើឱ្យមូលនិធិវិនិយោគ PIF របស់រដ្ឋាភិបាលអារ៉ាប៊ីសាអូឌីត មិនអាចវិនិយោគច្រើនសន្ធឹកសន្ធាប់លើគម្រោងទីក្រុង និងអគារកប់ពពក៕ប្រភព: Reuters៕
