ដោយៈ គង់ សូរិយា
ភ្នំពេញៈ គម្រោងស្ថាបនាសាងសង់ស្ពានមិត្តភាពកម្ពុជា-ជប៉ុន តភ្ជាប់ពីតំបន់ផ្លូវជាតិលេខ១ នៃរាជធានីភ្នំពេញ ឆ្លងកាត់ទន្លេមេគង្គឆ្ពោះទៅតំបន់ក្រុងអរិយក្សត្រ ខេត្តកណ្តាល បាននិងកំពុងសិក្សាដោយអ្នកជំនាញអន្តរជាតិនៃអង្គការJICA។
គម្រោងស្ថាបនាសាងសង់ស្ពានបេតុង ខ្សែកាបតភ្ជាប់ពីតំបន់ផ្លូវជាតិលេខ១ ឆ្លងកាត់ទន្លេមេគង្គ ឆ្ពោះទៅតំបន់ក្រុងអរិយក្សត្រ (ស្ពានក្ដីតាកុយ-អរិយក្សត្រ) គ្រោងសាងសង់ដោយមិត្តជប៉ុន ដែលអតីតនាយករដ្ឋមន្រ្តី នៃកម្ពុជាសម្តេចតេជោហ៊ុន សែន បច្ចុប្បន្នជាប្រធានព្រឹទ្ធសភា ស្នើសុំភាគីជប៉ុន (ទីភ្នាក់ងារសហប្រតិបត្តិការអន្តរជាតិជប៉ុន (JICA) ក្រុមហ៊ុនទីប្រឹក្សាបច្ចេកទេស(OCG) ជួយសិក្សា ពិនិត្យលើលទ្ធផលបឋម នៃការសិក្សាសមិទ្ធិលទ្ធភាព និងផ្តល់ជំនួយតាំងពីអំឡុងឆ្នាំ២០១៩មកម៉្លេះ តែដោយសារតំបន់នោះ មិនទាន់មានការអភិវឌ្ឍន៍នៃទីក្រុងរណប របស់អ្នកឧកញ៉ាឃុនសៀរ ទើបស្ពាននេះបានក្រសួងទុកសិន។
ថ្នាក់ដឹកនាំក្រសួងសាធារណការ និងដឹកជញ្ជូនបានបើកកិច្ចប្រជុំជាមួយភាគីជប៉ុនជាច្រើនលើករួចហើយ លើគំរោងសាងសង់ស្ពាននេះ និងធ្វើឲ្យប្រសើរឡើងនូវផ្លូវជាតិលេខ១។
ជាមួយគ្នានេះ ក្រុមហ៊ុនOCIC និងអ្នកអភិវឌ្ឍន៍គំរោងMekong Quay នៅទីក្រុងអរិយក្សត្រ ក៏បានចាប់ផ្តើមសិក្សាសាងសង់ស្ពានយោងដោយខ្សែកាបថ្មីមួយផងដែរ។
សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា សម្រេចឱ្យក្រុមការងារ បច្ចេកទេសសិក្សាប្លង់លម្អិតឡើងវិញ មុនប្រកាសសម្ពោធបើក ការដ្ឋានសាងសង់ជាផ្លូវការនាពេលខាងមុខនេះ៕
