ដោយ វុត្ថា
ភ្នំពេញៈ ទស្សនាវដ្តីដ៏ល្បីរបស់អាមេរិក FORBES នៅតែចាត់ទុកលោក Aliko Dangote ជាមហាសេដ្ឋីស្បែកខ្មៅ ដែលមានលុយច្រើនជាងគេបំផុតនៅក្នុងពិភពលោកនៅក្នុងបញ្ជីរបស់ខ្លួននៅក្នុងឆ្នាំ២០១៩នេះ ក្នុងចំណោមមហាសេដ្ឋីស្បែកខ្មៅ ១៣រូប ក្នុងប្រទេសអាហ្វ្រិក។
លោក Aliko Dangote កើតនៅក្នុងឆ្នាំ១៩៥៧ ជាអ្នកជំនួញ អ្នកវិយោគនិងជាម្ចាស់ក្រុមហ៊ុន Dangote Group របស់ប្រទេសនីហ្សេរីយ៉ាតំបន់អាហ្រ្វិក។ កាលពីខែមីនា ដើមឆ្នាំ ២០១៩ ទស្សនាវដ្តី Forbes បានប៉ាន់ប្រមាណថា លោក Aloko មានលុយ ១០.៦ ពាន់លានដុល្លារអាមេរិក។
មហាសេដ្ឋីស្បែកខ្មៅរូបនេះ បានជាប់លេខរៀងទី១០០ នៅក្នុងភិពភលោកនៃបញ្ជីរបស់ទស្សនាវដ្តីសារព័ត៌មាន Forbes និងមានលុយច្រើនបំផុតនៅក្នុងតំបន់អាហ្វ្រិក ហើយក៏បានជាប់នៅក្នុងចំណាត់ថ្នាក់លេខរៀងទី២៣ ក្នុងតារាង ឆ្នាំ២០១៤ នៃអ្នកដែលលុយច្រើនជាងគេបំផុងនៅក្នុងពិភពលោក។
លុយរបស់សេដ្ឋីស្បែកខ្មៅរូបនេះ ច្រើនជាងមហាសេដ្ឋីរបស់ប្រទេស Saudi-Ethiopian លោក Mohammed Hussein Al Amoudi កាលពីឆ្នាំ២០១៣ ដែលមានលុយប្រហែល២.៦ពាន់លានដុល្លារអាមេរិក ដែលបានក្លាយជាអ្នកមានលុយច្រើនជាងគេបំផុតនៅក្នុងតំបន់អាហ្វ្រិក។
លោក Aliko Dangote គឺជាជនជាតិភាគតិចមូស្លីម Hausa មកពីរដ្ឋ Kano ; លោកស្ថិតក្នុងត្រកូលអ្នកមានជនជាតិមូស្លីមក្នុងតំបន់អាហ្វ្រិក ដែលជីតារបស់គាត់ក៏ជាអ្នកមានម្នាក់ផងដែរគឺលោក Alhassan Dantata ។ លោកបានទទួលបានបរិញ្ញាបត្រផ្នែកជំនួញ និងរដ្ឋបាលយ ពីសាកលវិទ្យាល័យ Al-Azhar University ។
លោកបាននិយាយថា “ខ្ញុំបានចាប់ផ្តើមធ្វើជំនួញ ដោយលក់ស្កគ្រាប់តាំងពីលោករៀន នៅក្នុងសាលារៀនមកម្លេះ ដោយកាលពីពេលនោះគឺលក់ គ្រាន់តែចង់បានលុយចាយប៉ុណ្ណោះ”។
ក្រុមហ៊ុន Dangote Group ត្រូវបានបង្កើតឡើង ជាក្រុមហ៊ុនពាណិជ្ជកម្មតូចមួយនៅឆ្នាំ១៩៧៧ ហើយនៅឆ្នាំដដែលនោះក៏បានផ្លាស់ប្តូរទៅតំបន់ Lagos ដើម្បីពង្រីកក្រុមហ៊ុនឲ្យបានទំលំទូលាយ។ សព្វថ្ងៃនេះ វាជាក្រុមហ៊ុនមានលុយរាប់ពាន់លាន ដែលមានប្រតិបត្តិការជាច្រើននៅក្នុងប្រទេសបេនីន ប្រទេសហ្គាណា ប្រទេសនីហ្សេរីយ៉ា និងប្រទេសតូហ្គោ។
លោក Dangote ក៏បានពង្រីកអាជីវកម្ម ទៅលើការកែច្នៃម្ហូបអាហារ ការផលិតស៊ីម៉ងត៍ និងការដឹកជញ្ជូនទំនិញជាច្រើន។
ក្រុមហ៊ុន Dangote Group ក៏បានគ្រប់គ្រងទីផ្សារស្ករនៅប្រទេសនីហ្សេរីយ៉ា និងជាអ្នកផ្គត់ផ្គង់ដ៏សំខាន់ដល់ក្រុមហ៊ុនភេសជ្ជៈស្រាបៀរ និងអ្នកផលិតគ្រឿងស្រវឹង។ ក្រុមហ៊ុន Dangote Group បានក្លាយជាក្រុមហ៊ុនពាណិជ្ជកម្មមួយ ដែលជាក្រុមឧស្សាហកម្មធំបំផុតនៅក្នុងប្រទេសនីហ្សេរីយ៉ា រួមមានក្រុមហ៊ុន Dangote Sugar Refinery, Dangote Cement និង Dangote Flour៕
