ដោយៈ គង់ សូរិយា
ភ្នំពេញៈ ក្រុមការងារអន្តរក្រសួងបានបើកកិច្ចប្រជុំស្តីពី ការរៀបចំបង្កើត និងកំណត់ និងបែងចែកតំបន់គ្រប់គ្រង តំបន់ការពារទេសភាពភ្នំឈ្ងោក ភ្នំក្បាលរមាស ភ្នំកំពង់ត្រាច-ភ្នំស និងភ្នំដំរី-ភ្នំផ្អាវ នៅក្រសួងបរិស្ថាន។
ការរៀបចំនេះ ដើម្បីផ្តល់យោបល់លើផែនទី តំបន់ការពារទេសភាពទាំងបួនខាងលើ និងផ្តល់យោបល់ទៅលើ សេចក្តីព្រាងអនុក្រឹត្យបង្កើតតំបន់ការពារទេសភាព និងកំណត់ និងបែងចែកតំបន់គ្រប់គ្រង។
កិច្ចប្រជុំនេះមានការចូលរួមពីមន្រ្តីជាច្រើន រួមមានលោក ជា សំអាង រដ្ឋលេខាធិការក្រសួងបរិស្ថាន ដោយមានការចូលរួមពីលោក ប៉ែន សុផល រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ លោកសាន ចំរើន អគ្គនាយករង និងជាតំណាងក្រសួងមហាផ្ទៃ លោកលី វណ្ណា អនុរដ្ឋលេខាធិការក្រសួងវប្បធម៌ និងវិចិត្រសិល្បៈ តំណាងក្រសួងរ៉ែ និងថាមពល ក្រសួងទេសចរណ៍ ក្រសួងធនធានទឹក និងឧតុនិយម រដ្ឋបាលខេត្តកំពត អគ្គនាយកដ្ឋានតំបន់ការពារធម្មជាតិ និងតំណាងអគ្គនាយកដ្ឋាន សហគមន៍មូលដ្ឋាន មន្រ្តីជំនាញមកពីនាយកដ្ឋានអភិរក្ស តំបន់ការពារធម្មជាតិដីគោកខាងត្បូងបឹងទន្លេសាប និងមន្ទីរពាក់ព័ន្ធ នៃរដ្ឋបាលខេត្តកំពត សរុបចំនួន ៣៤នាក់។
កិច្ចប្រជុំនេះ ធ្វើឡើងក្នុងគោលបំណងដូចជា ទី១ ផ្តល់យោបល់ទៅលើផែនទីតំបន់ ការពារទេសភាពទាំងបួនខាងលើ និងទី២ ផ្តល់យោបល់ទៅលើសេចក្តីព្រាងអនុក្រឹត្យ បង្កើតតំបន់ការពារទេសភាព និងការកំណត់ និងបែងចែកតំបន់គ្រប់គ្រង៕
