ដោយៈ ចំណាន
ភ្នំពេញៈ Central Park អតីតអាកាសយានដ្ឋានអន្តរជាតិភ្នំពេញ (ពោធិ៍ចិនតុង) នឹងត្រូវបើកជាសួនសាធារណៈសាកល្បងរយៈពេល៩ថ្ងៃក្នុងឱកាសបុណ្យចូលឆ្នាំថ្មីដោយមិនគិតថ្លៃ។ នេះបើតាមការប្រកាសរបស់អន្តរក្រសួង ដែលគ្រប់គ្រងលើអតីតអាកាសយាន្ដដ្ឋានរបស់កម្ពុជា។
យោងតាមសេចក្ដីជូនដំណឹងថ្ងៃទី៦ ខែមេសាបានឲ្យដឹងថា ក្រុមការងារអន្តរក្រសួង ដើម្បីសិក្សាអំពីការគ្រប់គ្រងនិង ប្រើប្រាស់អាកាសយានដ្ឋានអន្តរជាតិភ្នំពេញ (ក.ស.អ.) បានបញ្ជាក់ថា អនាគតសួនកម្សាន្តសាធារណៈនេះ នឹងបើកដំណើរការសាកល្បង ជូនសាធារណជន ចូលទស្សនា, កម្សាន្ត, ហាត់ប្រាណ និងលេងកីឡា ដោយមិនគិតថ្លៃ ដើម្បីអបអរសាទរឱកាសបុណ្យចូលឆ្នាំថ្មី ប្រពៃណីជាតិខ្មែរផង និងដើម្បីឱ្យសាធារណជនបានឃើញច្បាស់ ពីស្ថាបត្យកម្មនៃអាកាសយានដ្ឋានអន្តរជាតិភ្នំពេញ ដែលមានតម្លៃជាប្រវត្តិសាស្ត្រ។
ការដាក់សាកល្បងនេះ នឹងមានរយៈពេល៩ ថ្ងៃចាប់ពីថ្ងៃទី១១ ដល់ថ្ងៃទី១៩ ខែមេសា ដោយអនុញ្ញាតឱ្យប្រជាពលរដ្ឋចូលចាប់ពីម៉ោង ៥:០០ ព្រឹក ហើយត្រូវចាកចេញនៅម៉ោង ៩:០០ យប់។
ក្រុមការងារដដែលបានឲ្យដឹងទៀតថា ប្រជាពលរដ្ឋអាចចូលទស្សនាជុំវិញតំបន់ និងអគារជាច្រើន ក្នុងនោះរួមមាន អគារផ្ចិត និងប៉មបញ្ជាហោះហើរ (Tower) ដែលត្រូវបានកសាងឡើងនៅអំឡុងទសវត្សរ៍ឆ្នាំ១៩៥០។ តំបន់ជុំវិញបរិវេណអគារចេញ-ចូលអ្នកដំណើរវីអាយភី (VIP) ចំណតយន្តហោះស៊ីវិល និងតំបន់ផ្លូវរត់របស់យន្តហោះ (Runway) ជាដើម ដែលទាំងនេះ គឺទីតាំងប្រវត្តិសាស្ត្រនៃវិស័យអាកាសចរស៊ីវិលកម្ពុជា។
នៅទីតាំងមួយចំនួន ក៏មានការតុបតែងលម្អ និងការដាក់បដាផ្សេងៗ ដែលមានរូបភាពជាល្បែងប្រពៃណីជាតិ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ សម្រាប់ឆ្នាំ២០២៦ ក្នុងបរិវេណព្រលានយន្តហោះនេះផងដែរ។
ក្រុមការងារស្នើឲ្យប្រជាពលរដ្ឋចូលរួមរក្សាអនាម័យ និងសណ្តាប់ធ្នាប់ ដោយប្រើប្រាស់បន្ទប់ទឹកចល័ត និងចោលសំរាមក្នុងធុងឱ្យបានត្រឹមត្រូវ និងមានរបៀបរៀបរយ ព្រមទាំងអនុវត្តតាមស្លាកសញ្ញា និងការណែនាំ សម្រាប់គ្រប់ បរិវេណដែលហាមឃាត់។
សេចក្ដីជូនដំណឹងបញ្ជាក់ថា ហាមដាច់ខាតមិនឱ្យមានការលក់ដូរ មិនឱ្យមានការយកចូលនិងពិសាគ្រឿងស្រវឹង និងមិនឱ្យមានការយកចូល និងប្រើប្រាស់កាំជ្រួចនិងគ្រឿងផ្ទុះនានា នៅក្នុងបរិវេណអាកាសយានដ្ឋានអន្តរជាតិ ភ្នំពេញ។
ការផ្ញើម៉ូតូ ត្រូវបង់កម្រៃ១០០០រៀល សម្រាប់ម៉ូតូមួយគ្រឿង ឡានមួយគ្រឿងត្រូវបង់កម្រៃ២០០០រៀល។ ចំណែកផ្ញើកង់មិនមានការយកកម្រៃទេ។
ក្រុមការងារថ្លែងថា ក.ស.អ.សូមអំពាវនាវដល់បងប្អូនប្រជាពលរដ្ឋទាំងអស់ សូមអញ្ជើញមកចូលរួមទស្សនា កម្សាន្ត ហាត់ប្រាណ និងលេងកីឡា នៅទីតាំងអាកាសយានដ្ឋានអន្តរជាតិភ្នំពេញនេះ ឱ្យបានច្រើនកុះករ ក្នុង ស្មារតីសាមគ្គីភាព ឯកភាព និងភាតរភាព។
អាកាសយានដ្ឋានដំបូងរបស់កម្ពុជា ដែលកសាងតាំងពីសម័យសង្គមរាស្ត្រនិយម បានបិទដំណើរការផ្លូវការកាលពីថ្ងៃទី៨ ខែកញ្ញា ឆ្នាំ២០២៥ ដោយសេវាទាំងអស់ត្រូវប្ដូរ ទៅអាកាសយានដ្ឋានអន្តរជាតិតេជោ។ រដ្ឋាភិបាលបានបញ្ជាក់ថា ទីតាំងប្រវត្តិសាស្ត្រនេះនឹងមិនត្រូវបានលក់ទៅឲ្យក្រុមហ៊ុនឯកជនទេ គឺទុកជាសម្បត្តិរបស់រដ្ឋ ដោយបង្កើតជាសួនសាធារណៈ៕
