ដោយ វុត្ថា
ភ្នំពេញៈ សិង្ហបុរីជាប្រទេសមានមហាសេដ្ឋី ផ្នែកអចលនទ្រព្យច្រើនជាងគេ ក្នុងតំបន់អាស៊ាន ប៉ុន្តែតើអ្នកណាជាអ្នកគ្រប់គ្រងមកុដ ជាអ្នកមានលុយច្រើនជាងគេក្នុងវិស័យអចលនទ្រព្យ?។
ការពិតអ្នកមានជាងគេក្នុងវិស័យនេះ គឺលោក Robert Ng Chee Sion ដែលកើតនៅក្នុងឆ្នាំ១៩៥២ ជាជនជាតិសិង្ហបុរី ដែលសព្វថ្ងៃរស់នៅក្នុងទីក្រុងហុងកុង និងជាប្រធានក្រុមហ៊ុនអភិវឌ្ឍនអចលនទ្រព្យ Hong Kong Sino Group ដែលលោកបានកាន់តំណែងតាំងពីឆ្នាំ ១៩៨១។ លោកគឺជាកូនប្រុសច្បងរបស់លោក Ng Teng Fong ជាមហាសេដ្ឋីអចលនទ្រព្យជនជាតិប្រទេសិង្ហបុរី។
យោងតាមទស្សនាវដ្ដីសារព័ត៌មាន Forbes ដ៏ល្បីល្បាញរបស់សហរដ្ឋអាមេរិក បានចុះផ្សាយថា អ្នកទាំងពីរគឺជាអ្នកមានច្រើនបំផុតលំដាប់ទី៣០ នៅក្នុងពិភពលោកនៅក្នុងឆ្នាំ១៩៩៩ ។ តែកាលពីឆ្នាំ២០១៧ កន្លងមកនេះ លោក Robert និងប្អូនប្រុសរបស់លោក Philip Ng ត្រូវបានគេដឹងថា មានលុយប្រហែល៩.៧ពាន់លានដុល្លារអាមេរិក។
លោកជាម្ចាស់សណ្ឋាគារ Empire នៅសិង្ហបុរី ដែលទទួលមរតកពីឪពុករបស់លោក និងគំរោងអចលនទ្រព្យ មជ្ឈមណ្ឌលពាណិជ្ជកម្មនៅតាមបណ្តាប្រទេសជាច្រើននៅលើពិភពលោកផងដែរ។
មហាសេដ្ឋីបងប្អូនប្រុសទាំងពីរនេះ បានទទួលកេរ្តិ៍មរតកអចលនទ្រព្យច្រើនពីឪពុករបស់ខ្លួន លោក Ng Teng Fong។ លោក Philip Ng គឺជានាយកប្រតិបត្តិនៃអង្គការ Far East Organization (FEO) និងជានាយកនៃ ក្រុមហ៊ុន Sino Group ដែលជាក្រុមហ៊ុនបុត្រសម្ព័របស់ ក្រុមហ៊ុនFEO ដែលមានមូលដ្ឋាននៅក្នុងទីក្រុងហុងកុង។ ចំណែកលោក Robert Ng គឺជាប្រធានក្រុមហ៊ុន Sino Group។
យោងទៅតាមប្រភពជាច្រើនបានចុះផ្សាយថា ប្រាក់ចំណូលរបស់ក្រុមហ៊ុនទាំងពីរនេះបានធ្លាក់ចុះពី២០ ទៅ២៥០ ភាគរយនៅចន្លោះឆ្នាំ២០១២ និងឆ្នាំ២០១៥ ដោបង្ខំឲ្យអ្នកទាំងពីរស្វែងរកទីផ្សារថ្មី ដោយក្នុងនោះក៏បានសម្លឹងមើលទីផ្សារ ក្នុងប្រទេសអូស្ត្រាលីដែលគ្រួសាររបស់ក្រុមក្រសារទាំងពីរ បានកាប់ទ្រព្យសម្បត្តិថ្មីរាប់រយលានដុល្លារនៅទីនោះ៕
