ដោយៈ ចំណាន
ប្រទេសចិនៈ ការសិក្សាបានបង្ហាញថា សេដ្ឋកិច្ចរបស់ប្រទេសចិននៅឆ្នាំ២០២៦នេះ មិនស្ថិតក្នុងវិបត្តិទេ ប៉ុន្តែវាកំពុងប្រឈមមុខនឹងការផ្លាស់ប្តូរដ៏លំបាកមួយ។
អ្នកសេដ្ឋកិច្ចភាគច្រើនរំពឹងថា កំណើននឹងធ្លាក់ចុះមកនៅត្រឹមប្រហែល៤,៤ ទៅ៤,៨ភាគរយ ដែលយឺតជាងឆ្នាំដែលមានកំណើនខ្ពស់កាលពីអតីតកាល។
តើមានបញ្ហាអ្វីខ្លះកំពុងកើតឡើង? មានសូចនាករមួយចំនួនដែលគេមើលឃើញដូចជា ទី១ ទីផ្សារអចលនទ្រព្យនៅតែខ្សោយ បញ្ហាធំបំផុតនៅតែជាវិស័យអចលនទ្រព្យ។ ការវិនិយោគលើលំនៅដ្ឋាននៅតែបន្តធ្លាក់ចុះ តម្លៃផ្ទះនៅតែស្ថិតនៅក្រោមសម្ពាធ ហើយអ្នកអភិវឌ្ឍន៍ជាច្រើនកំពុងជួបការលំបាក។
“អចលនទ្រព្យជាប្រភពសំខាន់នៃទ្រព្យសម្បត្តិគ្រួសារ នេះធ្វើឱ្យប៉ះពាល់ដល់ទំនុកចិត្តរបស់អ្នកប្រើប្រាស់”។
ទី២ អ្នកប្រើប្រាស់កំពុងចំណាយដោយប្រុងប្រយ័ត្ន គ្រួសារចិនកំពុងសន្សំប្រាក់បានច្រើន និងចំណាយតិចជាងអ្វី ដែលអ្នកធ្វើគោលនយោបាយចង់បាន។ ការលក់រាយបានចុះខ្សោយនៅឆ្នាំ២០២៦នេះ ដែលឆ្លុះបញ្ចាំង ពីការព្រួយបារម្ភអំពីការងារ កំណើនប្រាក់ចំណូល និងតម្លៃលំនៅដ្ឋាន។
ទី៣. ការនាំចេញមានភាពរឹងមាំគួរឱ្យភ្ញាក់ផ្អើល ចំណុចភ្លឺមួយគឺការនាំចេញ។ តម្រូវការសម្រាប់ផលិតផលចិន ដូចជា គ្រឿងអេឡិចត្រូនិច ឧបករណ៍ទាក់ទងនឹងAI ឧបករណ៍អេឡិចត្រូនិច ថ្ម និងផលិតផលថាមពលកកើតឡើងវិញ បានជួយដល់ការផលិត និងទិន្នផលឧស្សាហកម្ម។
ទី៤. រដ្ឋាភិបាលកំពុងផ្លាស់ប្តូរ ទៅរកឧស្សាហកម្មបច្ចេកវិទ្យាខ្ពស់ ដោយប្រទេសចិនកំពុងវិនិយោគយ៉ាងច្រើន លើការផលិតទំនើប បញ្ញាសិប្បនិម្មិត ស៊ីមីកុងដុកទ័រ ថាមពលកកើតឡើងវិញ និងហេដ្ឋារចនាសម្ព័ន្ធឌីជីថល។
ទីក្រុងប៉េកាំងមើលឃើញវិស័យទាំងនេះ “ជាម៉ាស៊ីនកំណើននាពេលអនាគត”។
តើ IMF និងOECD និយាយអ្វីខ្លះពីសេដ្ឋកិច្ចរបស់មហាយក្សមួយនេះ? មូលនិធិរូបិយវត្ថុអន្តរជាតិ (IMF)និងអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍(OECD)ជាទូទៅរំពឹងថាសេដ្ឋកិច្ចប្រទេសចិន នឹងមានកំណើនប្រហែល៤.៥%ក្នុងឆ្នាំ ២០២៦ ដែលគាំទ្រដោយការនាំចេញ និងគោលនយោបាយរបស់រដ្ឋាភិបាល ប៉ុន្តែត្រូវបានរារាំង ដោយការប្រើប្រាស់ខ្សោយ និងការធ្លាក់ចុះនៃអចលនទ្រព្យ។
លើសពីនេះ បញ្ហាប្រឈមចម្បងសម្រាប់ប្រទេសចិន គឺការផ្លាស់ប្តូរពីគំរូដែលជំរុញដោយ ការសាងសង់អចលនទ្រព្យ ការវិនិយោគលើហេដ្ឋារចនាសម្ព័ន្ធ និងការនាំចេញផលិតកម្ម។
ប្រទេសនេះ កំពុងឆ្ពោះទៅរកគំរូដែលជំរុញដោយ ការប្រើប្រាស់ក្នុងគ្រួសារ សេវាកម្ម ការច្នៃប្រឌិតបច្ចេកវិទ្យាខ្ពស់។
អ្នកសេដ្ឋកិច្ចអះអាងថា សុខុមាលភាពសង្គមកាន់តែរឹងមាំ ការគាំទ្រពីអ្នកប្រើប្រាស់ និងស្ថេរភាពវិស័យអចលនទ្រព្យ នឹងជួយដល់ការផ្លាស់ប្តូរនេះ៕
