ដោយ៖ ដួង ចន្ទ្រា
ភ្នំពេញ៖ ស្របពេលសកម្មភាពវិនិយោគលំនៅដ្ឋានតម្លៃមធ្យមនិងតម្លៃទាប សំដៅប្រជាជនមានប្រាក់ចំណូលមធម្យម បានកើនឡើងយ៉ាងគំហុក អ្នកជំនាញបានបង្ហាញវិធីសាស្ត្រវិនិយោគលើលំនៅដ្ឋានទាំងនោះ ដើម្បីបញ្ចៀសហានិភ័យណាមួយកើតឡើង។
អ្នកនាង ហ្គ្រេស រចនីហ្វុង នាយិកាក្រុមហ៊ុន Century21 Cambodia បានថ្លែងឲ្យដឹងកាលពីពេលថ្មីៗនេះថា លំនៅដ្ឋានតម្លៃមធ្យមពិតជាកើនឡើង ដោយសារអ្នកវិនិយោគនានាបានផ្តោតលើការអភិវឌ្ឍ លំនៅដ្ឋានប្រភេទនេះ ព្រោះជាទីផ្សារធំសម្រាប់ប្រជាជនមានប្រាក់ចំណូលមធ្យម។ អ្នកនាងបន្តថា ចំនួនប្រជាជនមានប្រាក់ចំណូលមធម្យម កំពុងកើនឡើងខ្លាំង ហើយការវិនិយោគលំនៅដ្ឋានដែលមានតម្លៃចាប់ពី២ទៅ៣ម៉ឺនដុល្លារ គឺសមស្របសម្រាប់ប្រជាជនក្នុងក្រុមនេះ។
-->
អ្នកនាងបន្តថា ទោះជាយ៉ាងណាអតិថិជន ដែលទិញលំនៅដ្ឋានប្រភេទនេះ ត្រូវប្រាកដថាគំរោងដែលពួកគេបានទិញ ជាគំរោងមានការអភិវឌ្ឍន៍ច្បាស់លាស់ ជាគំរោងដែលមានគុណភាពសំណង់ល្អ ពិសេសគួរទិញជាមួយម្ចាស់បុរី ដែលមានកេរ្ត៍ឈ្មោះល្អ ដើម្បីបញ្ចៀសហានិភ័យ។អ្នកនាងបន្តថា “អ្នកវិនិយោគក៏ត្រូវប្រាកដថា លំនៅដ្ឋានដែលខ្លួនបានទិញ មានច្បាប់សាងសង់ និងច្បាប់អភិវឌ្ឍន៍ត្រឹមត្រូវដែលចេញដោយក្រសួងពាក់ព័ន្ឋដូចជាក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី ណគរូបនីយកម្ម និងសំណង់។
អ្នកនាងហ្គ្រេស រចនីហ្វុងបានបន្តថា មានម្ចាស់គំរោងមួយចំនួនបានប្រកាសលក់លំនៅដ្ឋានរបស់ខ្លួន ដោយមិនទាន់បានចាប់ផ្តើមសាងសង់ ព្រោះពួកគេបានយកប្លង់ដីរបស់ពួកគេដាក់បញ្ចាំនៅធនាគារ ដើម្បីយកមកសាងសង់ ដែលធ្វើឲ្យអ្នកទិញមិនទានកាត់ប្លង់រ៉ឹង ឬប្លង់ដែលទទួលស្គាល់ត្រឹមស្រុកឬខ័ណ្ឌបាន។អ្នកនាងបន្តថា កន្លងមកករណីបែបនេះបានកើតមាន ដោយអ្នកតាំងខ្លួនជាអ្នកអភិវឌ្ឍន៍ បានកក់ដីរបស់គេហើយសាងសង់ ខណៈម្ចាស់ដីបានយកប្លង់ដីនោះដាក់នៅធនាគារ ហើយធនាគារមិនអនុញ្ញាត្តឲ្យមានការសាងសង់សំណង់លើដីនោះ។
អ្វីជាដំណោះស្រាយ អ្នកនាងហ្គ្រេស រចនីហ្វុងបានបញ្ជាក់ថា អតិថិជនគួររកការពិគ្រោះយោបល់ជាមួយក្រុមហ៊ុន អចលនទ្រព្យជំនាញ ដែលមានបទពិសោធន៍និងវិជ្ជាជីវៈត្រឹមត្រូវ ដើម្បីធ្វើឲ្យប្រាកដថាគំរោងដែលពួកគេចាប់អារម្មណ៍ ជាគំរោងដែលមិនមានហានិភ័យ ជាគំរោងអភិវឌ្ឍន៍ច្បាស់លាស់ និងម្ចាស់គំរោងជាអ្នកអភិវឌ្ឈន៍មានក្រមសីលធ៌មវិជ្ជាជីវៈ៕
