ដោយ វុត្ថា
ភ្នំពេញៈ ការជ្រើសរើសមនុស្សមកចូលហ៊ុនរកស៊ីជាមួយគ្នា គឺមិនមែនជារឿងងាយស្រួលប៉ុន្មាននោះទេ ពីព្រោះវាទាមទារនូវចំណេះដឹង និងភាពប៉ិនប្រសប់ខ្លាំងក្នុងការមើលមនុស្ស។ ប្រសិនបើជ្រើសរើសភាគហ៊ុនិក ឬដៃគូភាគហ៊ុនខុស នោះដំណើរការក្រុមហ៊ុននឹងបរាជ័យ ដែលធ្វើឲ្យខាតប្រាក់ចំណូលនិងពេលវេលាយ៉ាងច្រើន។
ជាមួយគ្នានេះ មុននឹងសម្រេចចិត្តរកស៊ីជាមួយមនុស្ស ដែលយើងស្គាល់ឬមិត្តភក្តិមុននឹងយើងសម្រេចចិត្តថាចូលរួមនោះ យើងគួរតែសិក្សានឹងដឹង៣ ចំណុចសំខាន់នេះជាមុនសិន។
ទី១) យើងត្រូវតែមានការពិភាក្សាគ្នាដោយបើកចំហរ
ការពិភាក្សាគ្នានេះ គួរធ្វើមុនពេលដែលយើងសម្រេចចិត្តចូលហ៊ុន នឹងបង្កើតមុខរបរនឹងរបៀបធ្វើការងារ និងគោលដៅឲ្យបានច្បាស់លាស់ជាមុនសិន ពិសេសហានិភ័យដែលនឹងជួបប្រទះ ។ ការពិភាក្សាគ្នានេះអាចធ្វើឲ្យម្ចាស់ហ៊ុនម្នាក់ៗ ដឹងពីចំណុចខ្លាំងនឹងចំណុចខ្សោយរបស់គ្នាទៅវិញមក ងាយស្រួលក្នុងការបែងចែកតួនាទីគ្នាធ្វើ។
ទី២) ត្រូវតែមានផែនការជាក់លាក់ណាមួយ
ជាទូទៅមុននឹងសម្រេចថាបើកមុខរបរមួយ ឬអាជីវកម្មយើងត្រូវមានផែនការច្បាស់លាស់ជាមុនសិន នឹងបែងចែកគ្នាក្នុងការទទួលខុសត្រូវក្នុងតួនាទីម្នាក់ៗ មានកាលវិភាគពេលវេលា ដើម្បីជម្រុញអាជីវកម្មឲ្យដើរទៅមុខកាន់តែលឿន។
ទី៣) ត្រូវរៀបចំលិខិតស្នាមឲ្យបានត្រឹមត្រូវ
យើងធ្វើបែបនេះមិនមែនមានន័យថា យើងមិនទុកចិត្តមិត្តភក្តិ ឬមនុស្សដែលយើងស្គាល់នោះទេ ក៏ប៉ុន្តែវាជួយការពារផលប្រយោជន៍របស់អ្នក និងដៃគូសហការយើងនៅពេលដែលមានរឿងអ្វីមួយកើតឡើង។ ការរត់ការឯកសារគឺត្រូវមានស្នាមមេដៃ ភាគីដែលបានចូលរួមវាជារឿងមួយ ដែលធ្វើឲ្យយើងកាន់តែមានទំនុកចិត្ត ក្នុងការរកស៊ីជាមួយគ្នាមួយកម្រិតទៀត ព្រោះយើងមិនចាំបាច់ខ្វាយខ្វល់ រឿងមិនទុកចិត្តគ្នាជៀសវាងការបាត់បង់មិត្តភាពនឹងខាត់បង់ទ្រព្យជាយថាហេតុ៕
