ដោយ វុត្ថា
ព្រះសីហនុៈ លោកគួច ចំរើន អភិបាលខេត្តព្រះសីនុ បានប្រកាសដាក់់ចេញយុទ្ឋនាការប្រមូលកាកសំណល់ចេញពីខេត្តព្រះសីហនុ នៅថ្ងៃទី១៣ កក្កដាខាងមុខ ដើម្បីលើកស្ទួយមុខមាត់ខេត្តជាប់សមុទ្ររបស់កម្ពុជានេះឡើងវិញ។
លោកអភិបាលខេត្តបានសរសេរនៅក្នុងហ្វេសបុកផ្លូវការ នៅថ្ងៃទី៩ខែកក្កដា នេះថា ក្រោយការប្រជុំពិភាក្សាអំពីការប្រមូលកាកសំណល់ កាលពីព្រឹកមិញនៅសាលាក្រុងព្រះសីហនុ យើងបានកំណត់យកថ្ងៃទី១៣ ខែកក្កដា ឆ្នាំ២០១៩ខាងមុខ បើកយុទ្ធនាការប្រមូលកាកសំណល់ចេញពីខេត្តព្រះសីហនុ។
-->
លោកបន្តថា “នៅថ្ងៃនេះខ្ញុំបានដឹកនាំកិច្ចប្រជុំជាមួយអាជ្ញាធរក្រុង និងក្រុមហ៊ុនប្រមូលសំរាម ដើម្បីពិនិត្យលើវឌ្ឍនភាពរបស់ក្រុមហ៊ុនប្រមូលសំរាម (KSWM) ក្នុងក្រុង និងរៀបចំផែនការយុទ្ធនាការសម្អាតអនាម័យ បរិស្ថានក្នុងក្រុងព្រះសីហនុឱ្យបានល្អស្អាត”។
យោងតាមមន្ទីរបរិស្ថានខេត្តព្រះសីហនុ បច្ចុប្បន្ននេះ សំរាមដែលបានបង្កើតឡើងនៅក្រុងព្រះសីហនុ មួយថ្ងៃមានប្រមាណ៧០០តោន។
បញ្ហាអនាម័យ បរិស្ថាន សោភ័ណ្ឌភាព និងភាពអនាធិបតេយ្យ ក្នុងក្រុងកំពង់សោមត្រូវមហាជនគ្រប់មជ្ឈដ្ឋាននាំរិះគន់យ៉ាងចាស់ដៃ ទៅលើក្រុមហ៊ុនដែលបាន ទទួលសិទ្ធវិនិយោគប្រមូលសំរាម អសមត្ថភាពក្នុងការ ប្រមូលសំរាមដឹកចេញ ជាពិសេសអាជ្ញាធរគ្រប់លំដាប់ថ្នាក់គ្មានវិធានការក្តៅជាបន្ទាន់ណាលើក្រុមហ៊ុន។
ស្របពេលដែលខេត្តព្រះសីហនុ កំពុងមានសន្ទុះអភិវឌ្ឍន៍យ៉ាងលឿននោះ កាកសំណល់រឹង រាវក៏មានកំណើនកើនឡើងផងដែរ។ នេះជាបញ្ហាមួយដែលរដ្ឋបាលខេត្តព្រះសហីនុ កំពុងយកចិត្តទុកដាក់ និងគិតគូរដោះស្រាយជូនប្រជាពលរដ្ឋក្នុងខេត្ត ដើម្បីធ្វើឲ្យខេត្តនេះ ក្លាយជាតំបន់ទេសចរណ៍ប្រកបដោយសោភ័ណភាព បរិស្ថានល្អ និងដើម្បីទាក់ទាញភ្ញៀវទេសចរទាំងជាតិ និងអន្តរជាតិ មកកម្សាន្តក្នុងខេត្តនេះផងដែរ។
ជាក់ស្ដែងរដ្ឋបាលខេត្តព្រះសីហនុ បានអនុវត្តនិងបន្តអនុវត្តន៍វិធានការ និងដំណោះស្រាយនានា ទាក់ទិនទៅនឹងបញ្ហាកាកសំណល់រឹង រាវក្នុងខេត្តជាប់មាត់សមុទ្រមួយនេះ៕
