ដោយ វុត្ថា
ភ្នំពេញ៖ នៅប្រទេសកម្ពុជា វិស័យអាជីវកម្មឯកជនមានលក្ខណៈពិសេសខុសប្លែកពីប្រទេសដទៃដោយសារប្រទេសនេះមានប្រជាជនប្រកបមុខរបរតូចៗជាច្រើនដូចជា ការលក់ម្ហូបអាហារតាមដងផ្លូវ និងជួសជុលកង់ ម៉ូតូជាដើម។
តាមច្បាប់រដ្ឋាភិបាលមិនតម្រូវឲ្យអាជីវកម្មតូចៗបែបនេះ ចុះឈ្មោះនោះទេ ពីព្រោះរដ្ឋាភិបាលយល់ថាប្រជាជន ឬម្ចាស់អាជីវកម្មនឹងមិនមានលទ្ធភាព ក្នុងការបំពេញលក្ខខណ្ឌតម្រូវនៃការចុះឈ្មោះក្រុមហ៊ុនបានឡើយ។
ឧទាហរណ៍ ម្ចាស់អាជីវកម្មត្រូវមានប្រព័ន្ធកត់ត្រាគណនេយ្យត្រឹមត្រូវ ដើម្បីធ្វើរបាយការណ៍ពីប្រាក់ចំណូលជូនអគ្គនាយកដ្ឋានពន្ធដារ។ ប៉ុន្តែអ្នកដែលប្រកបមុខរបរតូចៗទាំងនោះគឺមិនមានប្រព័ន្ធបែបនេះទេ ដោយសារពួកគាត់ខ្វះចំណេះដឹងឬធនធានក្នុងការបង្កើតប្រព័ន្ធនេះ។ យ៉ាងណាមិញ អ្នកអាចចុះឈ្មោះក្រុមហ៊ុននៅពេលណាក៏បាន មិនថាវាជាអាជីវកម្មខ្នាតតូចឬធំឡើយ។
សហគ្រិនជាច្រើនរង់ចាំរហូតដល់អាជីវកម្មរបស់ពួកគេ មានភាពរឹងមាំឬរីកចម្រើនខ្លាំងសិន ទើបពួកគេធ្វើការចុះឈ្មោះ។ ផ្ទុយទៅវិញ តាមគោលការណ៍របបពន្ធ ពួកគេមិនចាប់បាច់រង់ចាំបែបនោះឡើយ។ ប្រភេទអាជីវកម្មខ្នាតតូចមិនតម្រូវឲ្យបង់ពន្ធឡើយ ប៉ុន្តែម្ចាស់អាជីវកម្មត្រូវបង់ថ្លៃសេវាសម្រាប់ចុះឈ្មោះក្រុមហ៊ុន។
ប្រសិនបើអាជីវកម្មរបស់អ្នកមានចំណូលប្រចាំឆ្នាំ តិចជាង$62,500 អ្នកមិនតម្រូវឲ្យបង់ពន្ធលើប្រាក់ចំណេញឡើយ។ នេះជាការលើកទឹកចិត្តយ៉ាងធំធេង ដើម្បីជំរុញឲ្យម្ចាស់អាជីវកម្មចុះឈ្មោះក្រុមហ៊ុនរបស់ខ្លួន ពីព្រោះពួកគេមិនត្រឹមតែទទួលបានអត្ថប្រយោជន៍ពីការចុះឈ្មោះប៉ុណ្ណោះទេ ថែមទាំងទទួលបានការអនុគ្រោះលើកាតព្វកិច្ចពន្ធផងដែរ។ ដូច្នេះ ប្រសិនបើអ្នកមានគម្រោងពង្រីកអាជីវកម្មរបស់អ្នក យើងសូមលើកទឹកចិត្តឲ្យអ្នកធ្វើការចុះឈ្មោះក្រុមហ៊ុនរបស់អ្នក កាន់តែឆាប់តាមតែអ្នកអាចធ្វើបាន ពីព្រោះអាជីវកម្មរបស់អ្នកនឹងរីកចម្រើនឆាប់រហ័ស ហើយអ្នកក៏អាចមានឱកាសចូលក្នុងទីផ្សារធំៗផងដែរ។
និតិវិធីនៃការចុះឈ្មោះក្រុមហ៊ុននៅប្រទេសកម្ពុជា ផ្តល់ឱកាសដល់អាជីវកម្មច្រើនប្រភេទ។ អ្នកអាចចុះឈ្មោះជា ក្រុមហ៊ុនទទួលខុសត្រូវមានកម្រិត ក្រុមហ៊ុនឯកកម្មសិទ្ធិឬសហកម្មសិទ្ធិ។ ប្រសិនបើអ្នកចុះឈ្មោះក្រុមហ៊ុន ជាប្រភេទក្រុមហ៊ុនឯកកម្មសិទ្ធិឬសហកម្មសិទ្ធិ កម្រៃសេវាលើការចុះឈ្មោះនិងការបង់ពន្ធនឹងអស់តិចជាង។ សូមកត់ចំណាំផងដែរ ថ្មីៗនេះមានការលើកលែងពន្ធ (ពន្ធលើប្រាក់ចំនេញ) ក្នុងឆ្នាំ2០17 និង 2០18 ចំពោះការចុះឈ្មោះសហគ្រាសខ្នាតតូចនិងមធ្យម។
ផ្ទុយទៅវិញ ប្រសិនបើអ្នកទទួលបានប្រាក់ចំណេញដែលអាចជាប់ពន្ធ ប៉ុន្តែអ្នកមិនបានចុះឈ្មោះក្រុមហ៊ុន នោះអ្នកនឹងជួបហានិភ័យធំ។ អ្នកអាចត្រូវបានគេស៊ើបដឹង និងរាយការណ៍ទៅកាន់អាជ្ញាធរកម្ពុជាគ្រប់ពេលវេលា។ មនុស្សដែលរាយការណ៍អាចជា អតិថិជនរបស់អ្នកដែលខឹងនឹងអ្នក ឬអ្នកផ្គត់ផ្គង់របស់អ្នក ដែលអ្នកមានបញ្ហាជាមួយដោយសារមិនបានទូទាត់ថ្លៃទំនិញឬសេវាកម្ម។ អ្នកអាចប្រឈមមុខនឹងការឡើងតុលាការ ការបង់ថ្លៃសេវាការផាកពិន័យ ឬអាចឈានដល់ការបិទអាជីវកម្មរបស់អ្នកជាដើម។ ដូច្នេះ ដើម្បីជៀសវាងនូវបញ្ហាទាំងអស់នេះ អ្នកគួរតែចុះឈ្មោះក្រុមហ៊ុន។
ជាចុងក្រោយ អ្នកអាចសម្រេចចិត្តថាតើ អ្នកគួរចុះឈ្មោះឬមិនចុះឈ្មោះក្រុមហ៊ុនរបស់អ្នក ដោយធ្វើការពិចារណាឲ្យបានល្អិតល្អន់ទៅលើអត្ថប្រយោជន៍ និងផលវិបាកនៃហានិភ័យ។ យ៉ាងណាមិញ ប្រសិនបើអ្នកចង់ឲ្យអាជីវកម្មរបស់អ្នក មានការរីកចម្រើន អាចចូលក្នុងទីផ្សារធំៗ និងមានការគាំពារតាមផ្លូវច្បាប់ អ្នកគួរតែចុះឈ្មោះក្រុមហ៊ុនរបស់អ្នក៕
