ដោយ វុត្ថា
អាមេរិក៖ គណៈកម្មាធិការពាណិជ្ជកម្មសហព័ន្ធអាមេរិក (FTC) បានអនុម័ត លើការដាក់ពិន័យឱ្យក្រុមហ៊ុន Facebook បង់ចំនួន ៥ពាន់លានដុល្លារអាមេរិក ចំពោះករណីដែលខ្លួនរកឃើញពីបទរំលោភបំពានសិទ្ធិឯកជន។
យោងតាមការចុះផ្សាយរបស់សារព័ត៌មានសិនហួរ ចុះផ្សាយនៅថ្ងៃទី ១៣ ខែកក្កដា ឆ្នាំ ២០១៩ នេះ បានឱ្យដឹងថាវានៅតែមិនទាន់ច្បាស់នៅឡើយទេ ចំពោះការរឹតបន្តឹងលើហ្វេសប៊ុកលើការរក្សាភាពឯកជនរបស់អ្នកប្រើប្រាស់ក្នុងការដោះស្រាយនោះទេ។
សារព័ត៌មាននេះចុះផ្សាយបន្តថា FTC និង Facebook បានបដិសេធមិនធ្វើអត្ថាធិប្បាយលើរឿងនេះ ប៉ុន្តែក្រុមហ៊ុន Facebook បានឱ្យដឹងកាលពីខែមេសាកន្លងកមកថាខ្លួននឹងបង់ប្រាក់ ៥ពាន់លានដុល្លារដើម្បីដោះស្រាយការស៊ើបអង្កេតនេះ។
FTC បានចាប់ផ្តើមការស៊ើបអង្កេតករណីនេះ បន្ទាប់ពីមានរឿងអាស្រូវពាក់ព័ន្ធនឹងក្រុមហ៊ុនពីគ្រោះយោបល់អង់គ្លេសមួយឈ្មោះថា Cambridge Analytica ដែលត្រូវបានចោទប្រកាន់ពីបទចូលប្រើប្រាស់ Facebook របស់អ្នកប្រើប្រាស់ចំនួនជាង ៨៧លាននាក់ដោយមិនបានដឹងមុន។
FTC បានស៊ើបអង្កេតថាតើការចែករំលែកទិន្នន័យរបស់ក្រុមហ៊ុន Facebook ជាមួយក្រុមហ៊ុនអង់គ្លេសបានរំលោភលើកិច្ចព្រមព្រៀងឆ្នាំ ២០១១ ដែលបានចុះហត្ថលេខារវាងក្រុមហ៊ុន Facebook និងនិយ័តកររបស់សហរដ្ឋអាមេរិក។
ការផាកពិន័យដើម្បីបញ្ចប់ចំពោះករណីនេះ វាមិនធំដុំទេសម្រាប់ក្រុមហ៊ុនបច្ចេកវិទ្យា Facebook ជូនដល់ FTC នោះទេ ព្រោះក្រុមហ៊ុននេះ រកចំណូលបានជិត ៥៦ពាន់លានដុល្លារនៅក្នុងឆ្នាំ ២០១៨ កន្លងទៅនេះ។
យោងតាមរបាយការណ៍ក្រុមហ៊ុន Facebook ចេញផ្សាយកាលពីថ្ងៃសុក្រនេះ បានឱ្យដឹងថា ភាគហ៊ុនរបស់ក្រុមហ៊ុន Facebook មានចំនួន ១,៨១ភាគរយ៕
