ដោយ ម៉ាណេត
ភ្នំពេញ៖ ក្រុមហ៊ុន Hainan Airlines បានផ្តើមការហើរត្រង់ថ្មីមួយរវាងទីក្រុង Haikou ខេត្តហៃណាន (Hainan) និងខេត្តព្រះសីហនុកាលពីថ្ងៃចន្ទ។ នេះបើយោងតាមការចុះផ្សាយរបស់សារព័ត៌មានស៊ិនហួរ បានចុះផ្សាយកាលពីម្សិលមិញនេះ។
ជើងហោះហើរដំបូងរបស់ក្រុមហ៊ុន Hainan Airlines បានចាកចេញពីអាកាសយានដ្ឋានអន្តរជាតិ Haikou នៅម៉ោង៧ និង២០នាទីយប់។ ម៉ោងនៅក្រុងប៉េកាំងនាថ្ងៃចន្ទ ជើងហោះហើរដំបូងនេះ គ្រោងនឹងមកដល់អាកាសយានដ្ឋានអន្តរជាតិ ខេត្តព្រះសីហនុនៅម៉ោង៨ និង២០នាទីយប់ ដែលដូចម៉ោងក្នុងស្រុកក្នុងថ្ងៃតែមួយ។
ការហោះហើរចំនួនបីជើង ត្រូវបានកំណត់ជារៀងរាល់សប្តាហ៍នៅថ្ងៃច័ន្ទ ថ្ងៃពុធ និងថ្ងៃសុក្រ។
ខេត្តព្រះសីហនុ មានឆ្នេរល្បីល្បាញបំផុតនៅកម្ពុជា។ សេវាកម្មអាកាសចរណ៍ថ្មីនេះត្រូវបានរំពឹងថា នឹងជំរុញការផ្លាស់ប្តូរសេដ្ឋកិច្ច និងវប្បធម៌រវាងទីក្រុងទាំងពីរ។
បច្ចុប្បន្ន ខេត្តហៃណានមានផ្លូវអាកាសអន្តរជាតិជាង៨០ ហើយមានគោលបំណងបង្កើនផ្លូវអាកាសអន្តរជាតិដល់១០០ នៅត្រឹមឆ្នាំ២០២០។
នៅក្នុងរយៈពេល៦ខែដើមឆ្នាំ២០១៩កន្លងទៅនេះ វិស័យដឹកជញ្ជូនតាមផ្លូវអាកាសរបស់កម្ពុជា ទទួលបានលទ្ធផលល្អប្រសើរជាងឆ្នាំកន្លងទៅ ដោយចំនួនជើងហោះហើរបានកើនឡើង១៥ភាគរយ ហើយចំនួនអ្នកធ្វើដំណើរក៏មានការកើនឡើង២៥ភាគរយ។ នេះបើយោងតាម អ្នកនាំពាក្យ និងជារដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា។
ព្រលានយន្តហោះខេត្តព្រះសីហនុ មានការហោះហើរសរុបចំនួន៤១៥១លើក ក្នុងនោះការហោះហើរអន្តរជាតិមានចំនួន២៦៣៨លើក ហើយក្នុងស្រុកមានចំនួន១៥១៣លើក និងជើងហោះហើរជាលក្ខណៈជួល (charter flight)មានចំនួន៧២៨លើក។
ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីនបានឲ្យដឹងកាលពីពេលថ្មីៗនេះថា ; ដោយបង្ហាញពីភាពសាទរជាមួយនឹងសិទ្ធផល ដែលវិស័យអាកាសចរណ៍ស៊ីវិលកម្ពុជា ទទួលបាននៅពេលនេះ។
លោកស្រីបានបញ្ជាក់ថា “ពេលនេះកម្ពុជា កំពុងតែមានភាពទាក់ទាញលើវិស័យហោះហើរកាន់តែច្រើន ខណៈដែលបណ្តាប្រទេសនានានៅលើសាកលលោក ក៏កំពុងតែពិចារណាភ្ជាប់ជើងហោះហើរត្រង់មកកម្ពុជា”។
លោកស្រីបន្តទៀតថា “នៅពេលដែលវិស័យហោះហើរ កាន់តែមានភាពទូលាយ វានឹងជួយជំរុញឱ្យកម្ពុជា កាន់តែមានឱកាសអូសទាញបណ្តាភ្ញៀវទេសចរ ក៏ដូចជាអ្នកជំនាញអន្តរជាតិនានា ចូលមកស្វែងយល់ពីកម្ពុជា ដើម្បីរកឱកាសវិនិយោគទទួលយកផលប្រយោជន៍”៕
