ដោយ វុត្ថា
ភ្នំពេញៈ រាល់ពាណិជ្ជករ និងក្រុហ៊ុនពាណិជ្ជកម្មទាំងឡាយ ដែលមានគ្រឹះស្ថានរបស់ខ្លួន សាខា ការិយាល័យ តំណាងបុត្រសម្ព័ន្ធ ឬទីភ្នាក់របស់ខ្លួននៅប្រទេសកម្ពុជា មានកាតព្វកិច្ចចុះឈ្មោះក្នុងបញ្ជីពាណិជ្ជកម្ម នៅនាយកដ្ឋានចុះបញ្ជីពាណិជ្ជកម្មនៃក្រសួងពាណិជ្ជកម្ម។
យោងតាមសេចក្តីប្រកាសរបស់ក្រសួងពាណិជ្ជកម្ម ចុះថ្ងៃទី ២៩ ខែមករា ឆ្នាំ ២០១៥ កន្លងមកនេះបានឱ្យដឹង ស្ថាបនិក ឬអភិបាល ឬម្ចាស់ហ៊ុនត្រូវបំពេញពាក្យសុំចុះបញ្ជីពាណិជ្ជកម្មជាទំរង់ ដែលមានស្រាប់របស់នាយករដ្ឋានចុះបញ្ជីពាណិជ្ជកម្ម។ ពាក្យស្នើសុំចុះបញ្ជីពាណិជ្ជកម្ម ដែលបានបំពេញដោយស្ថាបនិក ឬអភិបាល ឬម្ចាស់ក្រុមហ៊ុន និងឯកសារតម្រូវសំរាប់តម្កល់ ត្រូវផ្តល់មកមន្ត្រីចុះបញ្ជីពាណិជ្ជកម្ម នៅបញ្ជរចុះពាណិជ្ជកម្ម។
តើត្រូវមានសំណុំឯកសារអ្វីខ្លះ?
សម្រាប់សំណុំឯកសារចុះបញ្ជីពាណិជ្ជកម្ម ដែលត្រូវតម្កល់នៅនាយកដ្ឋានចុះបញ្ជីពាណិជ្ជកម្ម នៃក្រសួងពាណិជ្ជកម្មមានដូចខាងក្រោមនេះ….
ក) សំណុំឯកសារដែលត្រូវតម្កល់សម្រាប់ការចុះបញ្ជីក្រុមហ៊ុន រួមមាន៖
១ ពាក្យស្នើសុំចុះត្រួតពិនិត្យនាមករណ៍ចំនួន ១ច្បាប់។ ២) ពាក្យសុំចុះឈ្មោះក្រុមហ៊ុនក្នុងបញ្ជីពាំណិជ្ជកម្ម ចំនួន ៣ច្បាប់។ ៣) លក្ខន្តិកៈក្រុមហ៊ុនយ៉ាងតិច ចំនួន ៣ច្បាប់។ ៤) រូបថត ៤x៦ ម្នាក់ ៣សន្លឹក។ ៥) ច្បាប់ចម្លងអត្តសញ្ញាណបណ្ណ ឬលិខិតឆ្លងដែនម្នាក់ ចំនួន ១ ច្បាប់។ ទី ៦) បង្កាន់ដៃបង់កម្រៃសេវាច្បាប់ដើម ចំនួន ១ច្បាប់ ។ ទី៧) ករណីម្ចាស់ហ៊ុនជានីតិបុគ្គល។
A ច្បាប់ចម្លងឯកសារគតិយុត្តិ នៃការចុះបញ្ជីពាណិជ្ជកម្មរបស់ក្រុហ៊ុនដើម ដោយមានការបញ្ជាក់ដែលទទួលស្គាល់ដោយច្បាប់ចំនួន១ច្បាប់។ B លិខិតតែងតាំងអ្នកតំណាងនីតិបុគ្គលជាម្ចាស់ហ៊ុនច្បាប់ដើមចំនួន១ច្បាប់។ ៨ក្រុមហ៊ុនត្រូវផ្តល់លិខិតបញ្ជាក់ច្បាប់ដើមពីការតម្កល់ដើមទុន ចុះបញ្ជីនៅធនាគារណាមួយចំនួន១ច្បាប់ ទៅអោយនាយកដ្ឋានចុះបញ្ជីពាណិជ្ជកម្មក្នុងអំឡុងពេល៣០ថ្ងៃ គិតចាប់ពីចេញវិញ្ញាបនបត្រចុះបញ្ជីក្រសួងពាណិជ្ជកម្ម។ ខ) សំណុំឯកសារដែលត្រូវតម្កល់សំរាប់ការចុះបញ្ជីសាខា ឬការិយាល័យតំណាង។
១) ពាក្យស្នើសុំចុះត្រួតពិនិត្យនាមករណ៍ចំនួន១ច្បាប់។ ២) ពាក្យសុំចុះឈ្មោះការិយាល័យតំណាងពាណិជ្ជកម្ម ឬសាខាក្រុមហ៊ុនចំនួន៣ច្បាប់។ ៣) ច្បាប់ចម្លងឯកសារគតិយុត្តិ នៃការចុះបញ្ជីពាណិជ្ជកម្មរបស់ក្រុហ៊ុនដើម ដោយមានការបញ្ជាក់ដែលទទួលស្គាល់ដោយច្បាប់ចំនួន១ច្បាប់។ ៤ លិខិតតែងតាំងអភិបាលការិយាល័យតំណាងឬសាខាចំនួន១ច្បាប់។
៥ ច្បាប់ចម្លងអត្តសញ្ញាណបណ្ណ ឬលិខិតឆ្លងដែនដែលនាយកការិយាល័យតំណាងឬសាខាចំនួន៣ច្បាប់។ ៦ រូបថត 4×6 ចំនួន ៣សន្លឹក។ ៧) បង្កាន់ដៃបង់កម្រៃសេវាចំនួន១ច្បាប់។ គ) សំណុំឯកសារដែលត្រូវតម្កល់ សំរាប់ការចុះបញ្ជីសហគ្រាសឯកបុគ្គល
១) ពាក្យស្នើសុំត្រួតពិនិត្យនាមករណ៍ ចំនួន ១ច្បាប់
២) ពាក្យសុំចុះឈ្មោះសហគ្រាសក្នុងបញ្ជីពាណិជ្ជកម្ម ចំនួន ៣ច្បាប់
៣)ច្បាប់ចម្លងអត្តសញ្ញាណបណ្ណ ឬលិខិតឆ្លងដែនរបស់ឯកកម្មសិទ្ធិករចំនួន ៣ច្បាប់
៤)រូបថត 4×6 របស់ឯកកម្មសិទ្ធិករ ចំនួន ៣សន្លឹក
៥) បង្កាន់ដៃបង់កម្រៃសេវា ចំនួន ១ ច្បាប់៕
