ដោយនៅ វឌ្ឈនា
ក្រចេះ៖ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានអះអាងថា កម្ពុជានឹងស្នើប្រាក់កម្ចីសម្បទានពីរដ្ឋាភិបាលចិន នៅពេលខាងមុខនេះ ដើម្បីសាងសង់ស្ពានឆ្លងទន្លេមេគង្គមួយទៀត នៅខេត្តក្រចេះ ដែលមានប្រវែងសរុប១៧៦១ម៉ែត្រ។
លោករដ្ឋមន្រ្តីក្រសួងសាធារណការ បានអះអាងបែបនេះ ប្រាប់ដល់ក្រុមអ្នកសារព័ត៌មានខណៈដែលលោក បានដឹកនាំក្រុមការងារចុះពិនិត្យ រកទីតាំងសាងសង់ស្ពានឆ្លងទន្លេមេគង្គ នៅខេត្តក្រចេះ នាថ្ងៃទី២៣ ខែកក្កដា ឆ្នាំ២០១៩កន្លងមកនេះ។លោកបន្តថា បន្ទាប់ពីពិនិត្យនេះ លោកនឹងរៀបចំគម្រោងសំណើនៅឆ្នាំ២០២០ ហើយការសាង់សង់អាចនឹងធ្វើឡើងនៅឆ្នាំ២០២១។
លោកអះអាងថា “ស្ពាននេះនឹងផ្តល់ភាពងាយស្រួលដល់ប្រជាពលដ្ឋ ក្នុងការធ្វើដំណើរពីស្ទឹងត្រែង ទៅកាន់ខេត្តកំពង់ធំ ដែលចំណេញពេលវេលា និងថវិកាច្រើនជាងមុន”។
ពាក់ព័ន្ធនឹងរឿងស្នើហិរញ្ញប្បទានបរទេសនេះ លោក ស៊ុន ចាន់ថុល បានស្នើសុំដល់ជនទាំងឡាយ កុំឱ្យអ្នករិះគន់មកលើរាជរដ្ឋាភិបាលកម្ពុជា។ លោកអះអាងថា កម្ចីនេះ គឺដើម្បីចំណេញជាតិ ចំណេញប្រជាពលរដ្ឋ ហើយខ្ចីមកសាងសង់ហេដ្ឋារចនាសម្ព័ន្ធ។
លោកបញ្ជាក់ថា “ដោយសារតែរាចរដ្ឋាភិបាលកម្ពុជា មានភាពល្អប្រសើរមានទំនុកចិត្តខ្ពស់ ទើបប្រទេសដទៃឱ្យខ្ចីលុយ បើសិនជារាជរដ្ឋាភិបាលកញ្ជើធ្លុះ គេមិនឱ្យកម្ពុជាខ្ចីនោះទេ ហើយបើមិនចំណេញសេដ្ឋកិច្ចជាតិ ក៏គេមិនឱ្យខ្ចីទេ”។
លោកបានច្រានចោល នូវការរិះគន់ថាបំណុលចិនជាអន្ទាក់ ដោយពន្យល់ថា ចិនមិនបានហៅកម្ពុជាឱ្យខ្ចីលុយនោះទេ តែកម្ពុជាជាអ្នកស្នើសុំដើម្បីជំរុញការអភិវឌ្ឍសេដ្ឋកិច្ចជាតិ៕
