ដោយ វុត្ថា
ភ្នំពេញៈ ទេសដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូបានប្រកាសថា ក្រសួងនឹងដាក់ឈ្មោះក្រុមហ៊ុនណា ដែលទទួលបានសិទ្ធិកសាងផ្លូវរួចហើយលួចស៊ីផ្លូវ ខណៈក្រសួងលែងត្រូវការផ្លូវដែលខ្វះគុណភាព និងខុសលក្ខណៈបច្ចេកទេសតទៀត។
លោកទេសរដ្ឋមន្ត្រីឱ្យដឹងនៅក្នុងពិធីការជិះកង់ពិនិត្យស្ថានភាព ផ្លូវជាតិលេខ៧ ចម្ងាយ១០គម ចាប់ពីចំណុចបង្គោល គម ១៧៦-១៦៦ ខេត្តត្បូងឃ្មុំ ដើម្បីពិនិត្យគុណភាព និងស្ថានភាពផ្លូវគម្រោង RAMP II ដែកំពុងដំណើរការស្ថាបនាឡើងវិញពង្រីកពីទំហំ៧ម ទៅជា១១ម ក្រាលបេតុងកៅស៊ូ ១១ម នៅថ្ងៃទី២៤ ខែកក្កដា ឆ្នាំ ២០១៩នេះថា ចំពោះក្រុមហ៊ុនណាដែលលួចកេញប្រវ័ញ្ញ ដោយតម្រូវឱ្យចាក់៥ហ៊ុនតាមគម្រោង តែចាក់បានតែ៤ហ៊ុន ក្រុមហ៊ុននោះនឹងត្រូវដាក់នៅក្នុងបញ្ជីខ្មៅ លែងឱ្យមានការដេញថ្លៃ សាងសង់ផ្លូវនៅក្នុងប្រទេសកម្ពុជាតទៅទៀត។
តែយ៉ាងណាក៏ដោយ លោកស៊ុន ចាន់ថុល បញ្ជាក់ទៀតថា ចំពោះក្រុមហ៊ុនណាដែលសាងសង់រួចហើយ មានការខុសក្នុងកម្រិតបច្ចេកទេសឬគុណភាព ក្រុមហ៊ុននោះ អាចមានលទ្ធភាពក្នុងការពិភាក្សាឡើងវិញបាន។ តែបើខុសហើយខុសទៀត ពេលដាក់ដេញថ្លៃ យើងនឹងប្រាប់ដៃគូអភិវឌ្ឍន៍របស់យើង កុំអោយក្រុមហ៊ុននោះដាក់ដេញថ្លៃតទៅទៀត។ ម្យ៉ាងទៀតបើលួចកេញប្រវ័ញ្ញវិញ គឺក្រុមហ៊ុននោះនឹងត្រូវដាក់ឈ្មោះក្រុមហ៊ុននោះនៅក្នុងបញ្ជីខ្មៅ។
លោកស៊ុន ចាន់ថុល បានជិះកង់ត្រួតពិនិត្យស្ថានភាពគុណភាព និងលក្ខណៈ បច្ចេកទេស នៃការស្ថាបនាធ្វើឱ្យប្រសើរឡើងកំណាត់ផ្លូវ នៃការសាងសង់កំណាត់ផ្លូវជាតិលេខ៧ ដើម្បីធានាគុណភាពរឹងមាំតាមស្តង់ដា អាចប្រើប្រាស់ជាប់បានយូរអង្វែង។
លោករដ្ឋមន្ត្រីពិនិត្យឃើញជាក់ស្តែងនូវផ្លូវនេះ មានជង្ហុកសំបុកមាន់ ផ្លូវមានទឹកដក់ ស្រកានាគ និងបញ្ហាផ្សេងៗ។ សកម្មភាពនេះ គឺជាគម្រូសម្រាប់មន្ត្រីអនុវត្តគម្រោង និងថ្នាក់ដឹកនាំត្រូវមានការយកចិត្តទុកដាក់ខ្ពស់ លើការពិនិត្យគុណភាពផងដែរ។
ផ្លូវនេះមានប្រវែងសរុបចំនួន ៤៦០,៨៣០គីឡូម៉ែត្រ ជាប្រភេទបេតុងកៅស៊ូ (AC) ចាប់ពីស្គន់ ផ្លូវជាតិលេខ៦ (PK ៧៥+០០០) ដល់ត្រពាំងគ្រៀល (ព្រំដែនកម្ពុជា-ឡាវ) ក្នុងនោះប្រវែងចំនួន២៧៥,៥៦០គីឡូម៉ែត្រ ត្រូវបានជួសជុលធ្វើឱ្យប្រសើរឡើងវិញចាប់ពីបង្គោលគីឡូម៉ែត្រលេខ១៣៦ ដោយប្រើប្រាស់ថវិកាអន្តរជាតិសរុបចំនួន៦៩,៨២លានដុល្លារអាមេរិក ពោលគឺ៖ចាប់ពីបង្គោលគីឡូម៉ែត្រលេខ១៣៦ -៣០០ ជាគម្រោង RAMP II ក្រោមហិរញ្ញប្បទានពីធនាគារពិភពលោក ក្នុងទឹកប្រាក់ចំនួន៣៦,៤៥លានដុល្លារអាមេរិក និងចាប់ពីបង្គោលគីឡូម៉ែត្រលេខ៣៣២ ១២៥ -៤២៤,៦៩០ជាជំនួយឥតសំណងរបស់រដ្ឋាភិបាលចិនក្នុងទឹកប្រាក់ចំនួន៣៣,៣៧ លានដុល្លារអាមេរិក៕
