ដោយៈ រ៉ាណេត
កោះកុងៈ ស្របពេលដែលមានគម្រោងអភិវឌ្ឍធំៗ បានតម្រង់ទិសឆ្ពោះចូលទៅកាន់ខេត្តកោះកុង ជាពិសេសវិស័យអចលនទ្រព្យ និងវិស័យទេសចរណ៍ ដែលជំរុញឱ្យខេត្តមួយនេះកាន់តែមានសក្ដានុពលនោះ ពេលនេះអជ្ញាធរក្នុងតំបន់បានរៀបចំបង្កើតសួនផ្កាសាគូរ៉ា ដែលមានប្រភពមកពីប្រទេសជប៉ុន ដើម្បីបង្កើនភាពទាក់ទាញ និងបម្រើដល់វិស័យទេសចរណ៍ផងដែរ។
ការបានចាប់ពីចំណុចគល់ស្ពានកោះកុង ត្រើយខាងលិចលាតសន្ធឹងតាមបណ្តោយផ្លូវជាតិ៤៨ រហូតដល់មុខសាលាស្រុកមណ្ឌលសីមា ត្រូវបានអជ្ញាធរចុះធ្វើសកម្មភាពដាំដើមផ្កាសាគូរ៉ាជាច្រើនដើម ដើម្បីបង្កើតជាសួនដ៏ស្រស់ស្អាត ដែលអាចបង្កើនភាពទាក់ទាញបណ្តាភ្ញៀវទេសចរជាតិ និងអន្តរជាតិចូលទៅទស្សនាកម្សាន្តនៅតំបន់នេះ។
អភិបាលស្រុកមណ្ឌលសីមា លោកហាក់ ឡេង បានមានប្រសាសន៍ថា បច្ចុប្បន្ននេះខេត្តកោះកុង កំពុងតែព្យាយាមកែប្រែមុខមាត់ជាខ្លាំង តាមរយៈសកម្មភាពនៃការអភិវឌ្ឍស្ទើរគ្រប់វិស័យ ជាពិសេស វិស័យសំណង់ និងអចលនទ្រព្យ ដើម្បីបង្កើនសេដ្ឋកិច្ចនៅក្នុងខេត្តឱ្យកាន់តែល្អប្រសើរ។
លោកបានបន្តទៀតថា “វត្តមាននៃសួងផ្កាសារ៉ាគូរ៉ាមួយនេះ វាគ្រាន់តែជាចំណុចចាប់ផ្ដើមជាជំហ៊ានដំបូងតែប៉ុណ្ណោះ”។ លោកបានបន្តទៀតថា “លទ្ធផលដែលនឹងលេចចេញជារូបភាពដ៏ទាក់ទាញនៃសួនច្បារ ដែលស្ថិតនៅតាមផ្លូវជាតិលេខ៤៨នេះ អាចនឹងបង្ហាញយ៉ាងយូរនៅត្រឹមរយៈពេល២បន្ទាប់ទៀត”។
លោកបញ្ជាក់ថា “ខ្ញុំជឿជាក់ថា វានឹងរួមចំណែកយ៉ាងសំខាន់ ក្នុងការទាក់ទាញ និងបម្រើដល់វិស័យទេសចរណ៍នៅក្នុងខេត្តមួយនេះ”។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានមានប្រសាសន៍បង្ហាញពីការគាំទ្រយ៉ាងពេញទំហឹង ចំពោះការបង្កើតសួនផ្កាសាគូរ៉ា នៅក្នុងតំបន់ខាងលើនេះ។ លោកបានមានប្រសាសន៍ទៀតថា កាលពីមុនខេត្តកោះកុងមានមណ្ឌលកម្សាន្តដ៏ធំមួយ គឺសាហ្វារីវើល ប៉ុន្តែដោយសារកាលពីប៉ុន្មានឆ្នាំមិ វិស័យហេដ្ឋារចនាសម្ព័ន្ធមិនទាន់មានភាពល្អប្រសើរ បានបណ្តាលឱ្យសួនមួយនេះសម្រេចចិត្តផ្អាក ហើយយកមកតាំងនៅជាយរាជធានីភ្នំពេញវិញ។
លោកបន្តទៀតថា “នៅពេលវត្តមានសួនផ្កាមួយនេះ ដំណើរការបានរលូន វានឹងក្លាយទៅជាអត្តសញ្ញាណថ្មីមួយសម្រាប់ខេត្តកោះកុង ហើយអាចស្រូបទាញភ្ញៀវទេសចរមកកាន់ខេត្តមួយនេះកាន់តែច្រើន” ៕
