ដោយ វុត្ថា
ភ្នំពេញៈ នេះគឺជារឿងគួរឱ្យភ្ជាក់ផ្អើលមួយនៅលើពិភពលោក ដែលមានកុមារីជនជាតិកូរ៉េម្នាក់អាយុត្រឹមតែ៦ឆ្នាំប៉ុណ្ណោះ បានចំណាយលុយប្រមាណ៦,៤លានផោន ដែលស្មើនឹង ៩,៤លានវ៉ុន(លុយកូរ៉េ) ទិញអាផាតម៉ិនកំពស់ ៥ជាន់ នៅក្នុងទីក្រុងសេអ៊ូល ប្រទេសកូរ៉េ ដើម្បីនាំឱពុកម្តាយរបស់នាងទៅរស់នៅ។
យោងតាមព័ត៌មានអន្តរជាតិ Daily Mail ដ៏ល្បីល្បាញ បានចុះផ្សាយកាលពីថ្មីៗនេះថា យុវតីម្នាក់នេះឈ្មោះ Boram ជាអ្នកលេង Youtube ដ៏ល្បីល្បាញ កើតនៅក្នុងតំបន់ Gangnam របស់ប្រទេសកូរ៉េ កាលពីថ្ងៃទី៣ ខែមេសាកន្លងមកនេះ បានទិញអាផាម៉ិនកំពស់៥ជាន់ដើម្បីរស់នៅជាមួយក្រុមគ្រួសាររបស់នាង។
តាមសេចក្តីរាយការណ៍ដដែលថា យុវតីរូបនេះរកចំណូលបានប្រមាណ២,៥លានផោន ក្នុងមួយខែពីបណ្តាញ YouTube ចំនួន២។ បណ្តាញ YouTube ១ របស់នាងមានឈ្មោះថា Vlong ដែលមានអ្នកគាំទ្រប្រមាណ ១៧លាននាក់ និងមួយទៀតឈ្មោះថា Boram Tube Toy ដែលមានអ្នកគាំចំនួន១៣លាននាក់នៅទូទាំងពិភពលោក។
យុវតី Boramបានបង្កើតវីដេអូ សម្រាប់កុមារតូចៗ បង្ហាញពីជីវិតរស់នៅប្រចាំថ្ងៃរបស់នាង និងបានបង្ហាញពីតុកតាសម្រាប់លេងដល់កុមារា និងកុមារីផ្សេងទៀត។
វីដេអូមួយក្នុងចំណោមវីដេអូជាច្រើនផ្សេងទៀតរបស់នាង មានភាពល្បីល្បាញបំផុតនៅក្នុងបណ្តាញ YouTube របស់នាង ដែលមានចូលមើលប្រមាណ៣៧០លាននាក់ ។ វីដេអូនេះបង្ហាញពីក្មេងស្រីអាយុ៦ឆ្នាំឆុងមី ដោយប្រើប្រាស់របស់របរតុកតា ផ្ទះបាយ និងបានបង្ហាញពីការញាំមីនៅលើកញ្ចក់ Cam ផងដែរ។
កុមារីរូបនេះ ត្រូវបានចុះផ្សាយនៅលើសារព័ត៌មានល្បីៗជាច្រើនជុំវិញពិភពលោកចំពោះការចំណាយលុយយ៉ាងច្រើនសន្ធឹកសន្ធាប់ ក្នុងទិញអាផាតម៉ិនកំពស់៥ជាន់នៅក្នុងប្រទេសកូរ៉េនេះ៕
