ដោយ វុត្ថាស
ទីក្រុងឡុងប៊ិច៖ គណៈកម្មាការផែនការនៃទីក្រុងឡុងប៊ិច កាលពីសប្តាហ៍មុននេះ បានអនុម័តឱ្យក្រុមហ៊ុនមួយសាងសង់គម្រោងអគារ West Gateway ជាអគារប្រើប្រាស់ពហុមុខងារ ដែលមានកំពស់ខ្ពស់បំផុតនៅទីក្រុងឡុងប៊ិច សហរដ្ឋអាមេរិក។
យោងតាមការចុះផ្សាយរបស់ Longbeachize បានឱ្យដឹងថា គម្រោងអគារនេះត្រូវបានអភិវឌ្ឍន៍ដោយក្រុមហ៊ុន Trammell Crow Residential និងរចនាប្លង់ដោយក្រុមហ៊ុន Studio One Eleven ដែលមានកំពស់ ៤០ជាន់។ វានឹងជាអាគារខ្ពស់ជាងអគារ Shoreline Gateway មានកំពស់ត្រឹមតែ៣៥ជាន់ ដែលខ្លួនបាននឹងកំពុងសាងសង់នៅតាមបណ្តោយមហាវិថី Ocean Boulevard និង Shoreline Drive។
គម្រោងអគារ West Gateway មានចំនួនផ្ទះសរុប៧៥៦យូនីត និងមានចំណតរថយន្តធំមួយដោយផ្ទាល់ខ្លួននៅខាងជើងនៃ មជ្ឈមណ្ឌលពាណិជ្ជកម្មពិភពលោកនឡងប៊ិច (World Trade Centre in Log Beach) នៅជិត Broadway និង Magnolia ។
ការអភិវឌ្ឍគម្រោងអគារនេះ នឹងរួមបញ្ចូលទាំងកន្លែងលក់រាយ ដែលមានទំហំ ៣,០០០ហ្វីតការ៉េ និងកន្លែងចតរថយន្តជាង ១.៥០០កន្លែង ដែលភាគច្រើនត្រូវបានធ្វើឡើងនៅក្នុងយានដ្ឋានចំណតជាន់ទី៩។
នៅក្នុងបទបង្ហាញទៅកាន់គណៈកម្មការនេះ របស់ក្រុមហ៊ុន Studio One Eleven បានឱ្យដឹងថា“ គម្រោងនេះមិនត្រឹមតែជាដំណោះស្រាយរយៈពេលខ្លី ខាងផ្នែកសេដ្ឋកិច្ចប៉ុណ្ណោះទេ ប៉ុន្តែវាក៏អនុញ្ញាតឱ្យមានការផ្លាស់ប្តូរ រចនាសម្ព័ន្ធចតរថយន្តនាពេលអនាគតទៅជាការប្រើប្រាស់ ដែលមានផលិតភាពកាន់តែច្រើន ដូចជា ការិយាល័យ ឬលំនៅដ្ឋានផងដែរ”។
គម្រោង West Gateway គឺជាផ្នែកមួយនៃការអភិវឌ្ឍ ដែលបានគ្រោងទុកនៅតំបន់ទីប្រជុំជននៃទីក្រុងឡុងប៊ិច តែយ៉ាងណាក៏ដោយគម្រោងអគារនេះ មិនត្រូវបានគេបង្ហាញពីទំហំថវិការចំណាយលើការសាងសង់នោះទេ៕
