ដោយម៉ា ណេត
ព្រះសីហនុៈ ក្រសួងដែនដី នគរូបនីយកម្ម និងសំណង់ នឹងពង្រាយមន្ត្រីបច្ចេកទេសនៅតាមបណ្តាសង្កាត់ទាំងអស់ របស់ក្រុងព្រះសីហនុ ខណៈក្រសួងរៀបចំក្រុមជួយបងប្អូនក្នុងការគូសប្លង់ លិខិតសាងសង់ ដើម្បីបង្ខិតរយៈពេលឱ្យខ្លីស្របតាមអនុសាសន៍ដឹកនាំរបស់សម្តេចតេជោ ហ៊ុន សែន។
លោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់
លោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ បានថ្លែងបែបនេះ នៅក្នុងឱកាសបើកការដ្ឋានសាងសង់អគារពហុមុខងារមួយនៅខេត្តព្រះសីហនុកាលពីម្សិលមិញ។ជាមួយគ្នានេះ លោករដ្ឋមន្ត្រីបានលើកឡើងថា តើយើងត្រូវធ្វើយ៉ាងណា ដើម្បីឱ្យការគ្រប់គ្រងសំណង់នេះឱ្យបានល្អ? មុននឹងសាងសង់សំណង់ ត្រូវសិក្សាពីគម្រោងប្លង់ សិក្សាឱ្យហើយស្រេច និងមានប្លង់គ្រឹះ ប្លង់ទឹក ប្លង់ភ្លើងឱ្យចប់សព្វគ្រប់ ហើយសូមដាក់ពាក្យស្នើសុំសាងសង់។
-->
លោកបន្តថា “ការសាងសង់ បងប្អូនប្រជាពលរដ្ឋត្រូវរកដៃគូ សាងសង់ជាមួយក្រុមហ៊ុនដែលមានវិជ្ជាជីវៈលើការសាងសង់”។ លោកបន្យតថា ក្រុមហ៊ុនបានចុះបញ្ជីនៅក្រសួងដែនដី ដើម្បីឱ្យសំណង់នេះគោរពតាមបទដ្ឋានបច្ចេកទេសសំណង់។ សំណង់ដែលសាងសង់ត្រូវមានក្រុមហ៊ុនត្រួតពិនិត្យដឹកនាំការងារសាងសង់ពីដើមដល់ចប់។ នេះគឺជាលក្ខខណ្ឌនៃការគ្រប់គ្រងសំណង់។ ការសាងសង់ទាំងអស់ត្រូវតែមានវិស្វករ ស្ថាបត្យករនៅប្រចាំការនៅការដ្ឋាន”។
លោករដ្ឋមន្ត្រី ជា សុផារ៉ា មានប្រសាសន៍ថា ក្រសួងដែនដី នគរូបនីយកម្មនិងសំណង់ នឹងពង្រាយមន្ត្រីបច្ចេកទេស នៅតាមបណ្តាសង្កាត់ទាំងអស់របស់ក្រុងព្រះសីហនុ។ និងរៀបចំក្រុមជួយបងប្អូនក្នុងការគូសប្លង លិខិតសាងសង់ ដើម្បីបង្ខិតរយៈពេលឱ្យខ្លីស្របតាមអនុសាសន៍ដឹកនាំរបស់សម្តេចតេជោ ហ៊ុន សែន។ និងបំបាត់បញ្ហាអសកម្មទាំងឡាយ ហើយយើងមិនអនុញ្ញាតឱ្យសំណង់សាងសង់ហើយ គ្មានលិខិតអនុញ្ញាតឡើយ។
លោកបានបន្តថា “ត្រូវតែមានលិខិតអនុញ្ញាត ត្រូវចុះឆែកថាតើសំណង់នឹងនរណាជាអ្នកសាងសង់ បើក្រុមហ៊ុនមិនបានចុះបញ្ជីនៅក្រសួងដែនដី នោះមិនអាចសាងសង់បានទេ ហើយបើគ្មានវិស្វករនៅប្រចាំការដ្ឋាន មិនអនុញ្ញាតឱ្យសាងសង់បានឡើយ”។
អគារខ្ពស់ៗនៅព្រះសីហនុ
ទាក់ទងនឹងការគ្រប់គ្រងគុណភាពសំណង់នេះដែរ លោកគួច ចំរើន អភិបាលនៃគណៈអភិបាលខេត្តព្រះសីហនុ បានលើកឡើងថា ដើម្បីគ្រប់គ្រងការដ្ឋានសំណង់នៅខេត្តព្រះសីហនុ ឱ្យមានប្រសិទ្ធភាព រដ្ឋបាលខេត្តក៏បានបង្កើតក្រុមការងារចុះត្រួតពិនិត្យ តាមដាន ទប់ស្កាត់លើការដ្ឋានសាងសង់នៅក្នុងខេត្ត ដែលមិនទាន់មានលិខិតអនុញ្ញាត ឬការសាងសង់ខុសពីលិខិតអនុញ្ញាត និងបទដ្ឋានគតិយុត្តិសម្រាប់គម្រោងផ្សេងៗទៀត៕
