ដោយ វុត្ថា
ភ្នំពេញ៖ យោងតាមការចុះផ្សាយពីគេហទំព័រ Wikipedia ស្តីពីតារាងគារខ្ពស់បំផុតនៅកម្ពុជា (List of Tallest Building in Cambodia) បានឱ្យដឹងថា មានអគារខ្ពស់ចំនួន៦នឹងបញ្ចប់ការសាងសង់នៅក្នុងឆ្នាំ២០១៩នេះ ក្នុងចំណោមអគារជាច្រើនទៀតដែលបាននិងកំពុងដំណើរការសាងសង់នៅក្រុងភ្នំពេញ។
១) អគារ The Gateway
គម្រោងអភិវឌ្ឍន៍អគារស្នាក់នៅ និងអគារពាណិជ្ជកម្មរបស់ Gateway នឹងផ្ដល់ជូននូវការរស់នៅ ធ្វើការងារ និងប្រកបអាជីវកម្មងាយស្រួលបំផុត ។ អគារភ្លោះនេះមានទីតាំងតាមបណ្ដោយមហាវិថីសហព័ន្ធរុស្ស៊ី ដែលអភិវឌ្ឍន៍ ដោយក្រុមហ៊ុន TACC (C.R) Ltd ដោយរំពឹងថា នឹងបញ្ចប់ការសាងសង់នៅឆ្នាំ២០១៩។
គម្រោងអភិវឌ្ឍន៏នេះ រួមមាន ចំណតរថយន្តចំនួន៧ជាន់ ហើយមានហាងលក់ទំនិញចំនួន២ជាន់ អគារលំនៅដ្ឋានកំពស់៣៩ជាន់ និងអគារការិយាល័យកំពស់៣៦ជាន់។ គម្រោងនេះនឹងមានរួមបញ្ចូលទាំងជាន់សម្រាកលំហែកាយ និងចំណតរថយន្តនៅជាន់ផ្ទាល់ដីសម្រាប់ម្ចាស់លំនៅដ្ឋាននីមួយៗផងដែរ។ គម្រោងទាំងមូលនឹងមានការិយាល័យសរុបចំនួន២៩៩យូនីត និងលំនៅដ្ឋានសរុបចំនួន៥៧២យូនីត។
អាគារនេះមានទីតាំងនៅតាមបណ្តោយមហាវិថីសហព័ន្ឋរុស្ស៊ី ក្បែរស្ពានអាកាសតិចណូ។
២) អគារ The Penthouse Residence
The Penthouse Residence មានទីតាំងនៅទីប្រជុំជននៃតំបន់អភិវឌ្ឍសេដ្ឋកិច្ចនៃរាជធានីភ្នំពេញ។
The Penthouse Residence ជាអគារលំនៅស្ថានខ្ពស់ (Condominium) ដែលស្ថិតនៅមហាវិថីសុធារស និងមានទីតាំងនៅជិតផ្សារទំនើបAeon សណ្ឋាគារលំដាប់ផ្កាយប្រាំ (Sofitel)ស្ថានទូត, សាលារៀនអន្ដរជាតិ។ល។ ជាពិសេសអាគារកំពស់៣៦ជាន់នេះក៏មានទីតាំងស្ថិតនៅជិតមាត់ទន្លេ ចតុមុខនិង មជ្ឈមណ្ឌលពាណិជ្ជកម្មកោះពេជ្រផងដែល។
៣) អគារ SKYLINE
គម្រោងអភិវឌ្ឍចម្រុះ SKYLINE ជាអគារខុនដូលំដាប់ខ្ពស់ មានទីតាំងស្ថិតនៅចំកណ្តាលរាជធានីភ្នំពេញ គម្រោងនេះត្រូវបានសហការអភិវឌ្ឍរួមគ្នារវាងក្រុមហ៊ុន S.G.P.D និងក្រុមហ៊ុន HONG LIAN GROUP នៃប្រទេសចិន។ អគារខុនដូ SKYLINE ត្រូវបានផ្គុំឡើងពីសំណង់អគារពីរ ដែលមានកម្ពស់៣៨ជាន់ បែងចែកជាអគារ A និងអគារ B ដែលជាន់ផ្ទាល់ដីជាន់ទី១ ជាន់ទី២ ជាផ្សារទំនើប។ ចំនែកពីជាន់ទី២ ដល់ជាន់ទី៨ ជាចំណតឡាន ដែលផ្តល់ជូនចំណតគ្រប់គ្រាន់ ដោយមិនឲ្យអតិថិជនមានការព្រួយបារម្ភពីការលំបាកក្នុងការចតយានយន្តឡើយ។
ជាន់ទី៩ ជាជាន់លំហរ មានអាងហែលទឹក ក្លឹបហាត់ប្រាណ បន្ទប់អានសៀវភៅ កន្លែងអាំងសាច់ BBQ និងកន្លែងលំហែរកាយផ្សេងទៀត។
៤) អគារ Diamond Twin Tower
អគារភ្លោះ Diamond Twin Tower មានតម្លៃវិនិយោគ៦០លានដុល្លារ ស្ថិតនៅក្នុងមជ្ឈមណ្ឌលពាំណិជ្ជកម្ម ជាអគារភ្លោះមានកម្ពស់១៣៦ម៉ែត្រ។ អាគារនេះសាងសង់លើផ្ទៃដីសរុប ៥,២២៤ ម៉ែត្រការ៉េ ដែលក្នុងនោះអគារការិយាល័យលំដាប់ខ្ពស់មាន៣០ជាន់ ស្មើនឹង ៤៨២យូនីត។
ដោយឡែកអាគារពាណិជ្ជកម្មអន្តរជាតិមាន៣២ជាន់ ហើយថែមទាំងមានកន្លែងចតរថយន្តបាន៤០៦រថយន្ត ភោជនីយដ្ឋាន អាងហែលទឹក កន្លែងហាត់ប្រាណ និង Sky Bar ជាដើម។
៥) អគារ Gold Tower 42
គម្រោងសាងសង់អគារ Gold Tower 42 ដែលមានទុនវិនិយោគជាង២៤០លានដុល្លារស្ថិតនៅចំណុចប្រសព្វរវាងមហាវិថីព្រះមុនីវង្ស ជាមួយមហាវិថីព្រះសីហនុ។
គម្រោងអគារនេះជាគម្រោងអគារខ្ពស់ជាងគេនៅកម្ពុជា ដែលបានចាប់ផ្ដើមដំនើរការសាងសង់ កាលពីខែមីនា ឆ្នាំ២០០៨តែត្រូវផ្អាកវិញ នៅឆ្នាំ២០០៩ បន្ទាប់ពីជួបវិបត្តិហិរញ្ញវត្ថុ ដែលធ្វើឲ្យអគារនេះស្ទើរតែក្លាយជាអគារនិងជានិមិត្តរូបមិនល្អមួយ នៃការអភិវឌ្ឍវិស័យសំណង់នៅកម្ពុជា។
៦) អគារ Sky Villa
គម្រោងសាងសង់ខុនដូភ្លោះ Sky Villa ស្ថិតនៅតាមបណ្តោយមហាវិថីព្រះសីហនុ របស់ក្រុមហ៊ុន Crystal Orange Construction Plc ដែលមានលំនៅដ្ឋានសរុបចំនួន២៥៦យូនីត ក្រោមទុនវិនិយោគប្រហែល ១០០លានដុល្លារអាមេរិក បានបើកសម្ពោធការដ្ឋានសាងសង់កាលពីថ្ងៃទី១៧ តុលាកន្លងទៅនេះ។
អគារ Sky Villa នេះមានកម្ពស់ពីលើដីឡើងលើ១៣៩ម៉ែត្រ ស្មើនិង៣៥ជាន់ និងមាន៤ជាន់នៅក្រោមដី សម្រាប់ធ្វើជាចំណតយាន្តយន្តផងដែរ។ ការសាងសង់អគារទាំង២គ្រោងនឹងប្រើពេលសាងសង់ចំនួន៣៦ខែ លើផ្ទៃដីសាងសង់ទំហំ៦០០០ពាន់ម៉ែត្រការ៉េ ; ក្នុងនោះមានកន្លែងហាត់ប្រាណអាងហែលទឹក និងមានសួនច្បារយ៉ាងធំទៀតផង៕
