ដោយ ម៉ាណេត
ភ្នំពេញៈ អ្នកវិនិយោគចិន កូរ៉េ និងជប៉ុនជាប់លើកំពូលតារាង ក្នុងការវិនិយោគលើវិស័យអចលនទ្រព្យនៅកម្ពុជា ខណៈកម្ពុជាបានទាក់ទាញលំហូរនៃវិនិយោគិន និងអ្នកជំនួញមកពីបីប្រទេសទាំងនេះច្រើនជាងគេ ដែលបានជំរុញវិស័យអចលនទ្រព្យនៅកម្ពុជាមានរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។
យោងតាមក្រសួងរៀបចំដែនដី នគរូបនីយកម្ម និងសំណង់ពីឆ្នាំ២០០០ ដល់ឆ្នាំ ២០០៧ គម្រោងវិនិយោគនៅក្នុងប្រទេសកម្ពុជា លើវិស័យសំណង់មានតែ ៣.២០០លានដុល្លារអាមេរិកប៉ុណ្ណោះ ហើយពីឆ្នាំ២០០៨ ដល់ឆ្នាំ២០១១ បានកើនឡើងដល់ ១.២២៦លានដុល្លារអាមេរិកថែមទៀត និងរហូតមកដល់ឆ្នាំ ២០១២ ដល់ ២០១៨ ចាប់ផ្តើមឡើងកំហុក គឺឡើងរហូតដល់ ៥.៧៥៥លានដុល្លារអាមេរិក។
-->
លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងកាលពីពេលថ្មីៗមកនេះថា នៅក្នុងវិស័យសំណង់ក្រុមហ៊ុនចិនបោះទុនវិនិយោគជាង ២,៨ពាន់លានដុល្លារឈរនៅលំដាប់ទី១ លេខ២ ប្រទេសកូរ៉េមានជាង ១,៦លានដុល្លារ និងជប៉ុនមាន ៣៨២លានដុល្លារអាមេរិក។
លោករដ្ឋមន្ត្រី បានបន្ថែមថា “ការវិនិយោគលើវិស័យអចលនទ្រព្យនៅកម្ពុជានេះ គឺយើងបានបើកច្រក ឱ្យក្រុមហ៊ុនបរទេសចូលមកវិនិយោគទាំងអស់ ដែលបានចូលមកវិនិយោគជាង១៣ប្រទេស”។
ជនជាតិចិនចំនួន២លាននាក់ បានមកធ្វើទស្សនកិច្ចនៅកម្ពុជាកាលពីឆ្នាំមុន ដែលកើនឡើងប្រហែល ៦៧ភាគរយធៀបនឹងឆ្នាំ២០១៧។ ចំនួនអ្នកទេសចរចិន មានប្រហែលមួយភាគបីនៃចំនួនភ្ញៀវអន្តរជាតិ។ ជិតមួយភាគបួននៃជនជាតិបានមកកម្ពុជា ដើម្បីធ្វើអាជីវកម្ម។ នេះបើយោងតាមធនាគារពិភពលោក។
លោក Timothy McNally ប្រធានក្រុមហ៊ុនណាហ្គាខបដែលបានចុះបញ្ជីនៅហុងកុង ដែលជាសណ្ឋាគារ ប្រតិបត្តិករល្បែង និងកម្សាន្តធំជាងគេនៅកម្ពុជាបានមានប្រសាសន៍ថា “បរិយាកាសអាជីវកម្មមានលក្ខណៈអំណោយផល រួមជាមួយបរិយាកាសនយោបាយមានស្ថេរភាពបាននាំមកនូវវិនិយោគិន និងអ្នកធ្វើដំណើរមកប្រទេសកម្ពុជាកាន់តែច្រើន”។
ចិនគឺជាអ្នកផ្តល់ជំនួយ និងអ្នកវិនិយោគដ៏ធំបំផុតរបស់កម្ពុជា ដែលបានចំណាយទឹកប្រាក់រាប់ពាន់លានដុល្លារ ជាជំនួយអភិវឌ្ឍន៍ និងប្រាក់កម្ចីតាមរយៈគម្រោងគំនិតផ្តួចផ្តើមខ្សែក្រវ៉ាត់មួយផ្លូវមួយ ដែលមានគោលបំណងជំរុញការតភ្ជាប់ផ្លូវគោក និងសមុទ្រជាមួយអាស៊ីអាគ្នេយ៍ អាស៊ីកណ្តាល មជ្ឈឹមបូព៌ា អឺរ៉ុប និងអាហ្វ្រិក។
គំនិតផ្តួចផ្តើមនេះ បានជំរុញឱ្យអ្នកធ្វើជំនួញមួយចំនួនធំមកកម្ពុជា ដែលជាហេតុធ្វើឱ្យមានការរីកចម្រើនផ្នែកសំណង់នៅក្នុងទីក្រុងភ្នំពេញ និងកំណើនអាជីវកម្មនៅទូទាំងប្រទេសក្នុងរយៈពេលប៉ុន្មានឆ្នាំថ្មីៗនេះ។ ទីផ្សារការងារដែលរីកលូតលាស់ជាលទ្ធផលនៃសេដ្ឋកិច្ចរីកចំរើនបានជំរុញឲ្យមានតម្រូវការលំនៅដ្ឋាននៅកម្ពុជា។
អ្នកសង្កេតការណ៍ទីផ្សារបាននិយាយថា ប្រការនេះបានជំរុញឱ្យទិន្នផលជួលកើនឡើងដល់ ៨ ទៅ១០ភាគរយ ហើយការបង្កើនទ្រព្យដល់ ១៥ភាគរយក្នុងមួយឆ្នាំ ដែលធ្វើឱ្យវិស័យអចលនទ្រព្យរបស់ប្រទេសនេះ ក្លាយជាកន្លែងវិនិយោគដ៏ល្អបំផុតសម្រាប់វិនិយោគិនចិន ដែលកំពុងស្វែងរកទ្រព្យសម្បត្តិក្រៅប្រទេស ដែលជាការការពារប្រឆាំងនឹងការធ្លាក់ចុះប្រាក់យន់។
លោក McNally បានថ្លែងថា “ប្រសិនបើអ្នកថតរូបណាហ្គាវើល ក្នុងឆ្នាំ២០០៩ អ្នកនឹងឃើញអាគារមួយហើយ នៅពីក្រោយយើងត្រង់ចំណុចនោះ ពួកគេគ្រាន់តែជាការកសាងក្រសួងការបរទេស និងរដ្ឋសភាប៉ុណ្ណោះ។ អ្វីៗនៅជុំវិញយើងគឺគ្រាន់តែជាដីទំនេរតែប៉ុណ្ណោះ”៕
