ដោយ សារី
ក្រុងប៉ោយប៉ែតៈ CEO Master Club បានសហការគ្នាជាមួយរដ្ឋបាលក្រុងប៉ោយប៉ែត បង្កើតចលនាចូលរួមគ្នាដ៏ធំ១ គឺកម្មវិធីប៉ោយប៉ែតស្អាត ក្នុងការដាំដើមឈើ១០០០ដើម និងសួនច្បារហាត់ប្រាណ១កន្លែង តាមបណ្ដោយផ្លូវជាតិលេខ៥ ដើម្បីរួមចំណែកលើកស្ទួយសោភ័ណភាព ក្រុងជាប់ព្រំដែនអន្តរជាតិខ្មែរ-ថៃមួយនេះ ឱ្យក្លាយជាក្រុងស្រស់ស្អាតនិងមានភាពទាក់ទាញ។
កម្មវិធីប៉ោយប៉ែត ស្អាតដែលមានការគាំទ្រដោយ CEO Master Club នៃវិទ្យាស្ថានស៊ីអ៊ីអូនេះ មានការចូលរួមពីសំណាក់មន្ត្រីរដ្ឋបាលក្រុង ស្ថានប័ន អង្គភាពជុំវិញក្រុង ព្រមទាំងម្ចាស់អាជីវកម្មទាំងសមាជិក និងមិនមែនសមាជិក រួមទាំងសប្បុរសជនប្រហែលជាង១០០នាក់។
លោកអោម សេងបូរ៉ា ដែលបានដឹកនាំគ្រួសារសមាជិក CEO Master Club ចូលរួមដាំកូនឈើក្នុងកម្មវិធីនេះមាន ប្រសាសន៍ថា លោកពិតជាមានសេចក្តីសោមនស្សរីករាយយ៉ាងខ្លាំង ដែលចូលរួមសហការជាមួយរដ្ឋបាលក្រុង ធ្វើការងារជួយសង្គមមួយនេះ ដែលបានផ្តល់ប្រយោជន៍យ៉ាងច្រើន ជូនដល់ប្រជាពលរដ្ឋឱ្យទទួលបាននូវសុខភាពល្អ តាមរយៈបរិយាកាសល្អ ក៏ដូចជាលើកសោភណ្ឌភាពក្រុង ឱ្យកាន់តែស្រស់បំព្រង គួរជាទីមនោរម្យ និងទាក់ទាញភ្ញៀវទេសចរកាន់តែច្រើនផងដែរ។
ជាមួយគ្នានេះលោកគ្រូបង្វឹកម្ចាស់អាជីវកម្មកម្រិតកំពូលរូបនេះ ក៏បាននាំថវិកាមួយចំនួនដែរ ជាការចូលរួមរបស់ក្រុមគ្រួសារសមាជិក និងមិនមែនសមាជិក CEO Master Club ព្រមទាំងថវិកាលោកផ្ទាល់ ជូនដល់រដ្ឋបាលក្រុងប៉ោយបែត ដើម្បីរួមចំណែកធ្វើឱ្យកម្មវិធីនេះដំណើរការទៅមុខបន្តទៀត។
ឆ្លៀតក្នុងឱកាសនេះដែរ លោក គាត ហ៊ុលអភិបាលក្រុងប៉ោយប៉ែតក៏បានថ្លែងអំណរគុណយ៉ាងជ្រាលជ្រៅដល់ម្ចាស់អាជីវកម្ម និងសប្បុរសជនទាំងអស់ ពិសេស CEO Master Club ដែលបានជ្រោមជ្រែងបង្កើតឱ្យមានកម្មវិធីនេះឡើង ហើយលោកសង្ឃឹមថា សប្បុរសជនទាំងនេះ ទាំងសមាជិកនិងមិនមែនសមាជិក នឹងចូលរួមឧបត្ថម្ភបន្តទៀត ដេីម្បីធ្វើឱ្យប៉ោយប៉ែត ក្លាយជាទីក្រុងបៃតង និងស្រស់ស្អាត។
អ្នកសម្របសម្រួលកម្មវិធីប៉ោយប៉ែត ស្អាតរបស់ CEO Master Club ប្រចាំក្រុងប៉ោយប៉ែត លោកស្មុយ សុផលបានឱ្យដឹងថា ការចូលរួមគាំទ្រកម្មវិធីដាំកូនឈើ ១០០០ដើមនេះ ក្រុមការងារបាននាំយកថវិកាដែលទទួលបានពីសប្បុរសជន យកទៅជូនដល់រដ្ឋបាល ក្រុងចំនួន១ដងរួចមកហើយ ដែលស្មើនឹងដើមឈើជិត១៥០ដើម ដោយក្នុង ១ដើមតម្លៃ ៣៥ដុល្លារ។
លោកបន្ដថា កម្មវិធីនេះនឹងទទួលស្វាគមន៍សប្បុរសជន ទាំងអស់ ពីគ្រប់ទិសទី ក្នុងការចូលរួមចំណែកឧបត្ថម្ភថវិកាដើម្បីទិញដើមឈើបន្តទៀត ព្រោះថាបើតាមគម្រោងគឺមានគម្រោងរហូតដល់ ១០០០ដើម ហើយមិនត្រឹមតែដាំតាមបណ្តោយផ្លូវជាតិលេខ៥ទេ កម្មវិធីក៏នឹងដាំតាមផ្លូវសំខាន់ៗ និងទីកន្លែងសំខាន់ៗផ្សេងទៀតនៅក្នុងក្រុងផងដែរ៕
