ដោយ វុត្ថា
ភ្នំពេញ៖ ច្បាប់ប្រកួតប្រជែង ត្រូវបានរៀបចំឡើងដើម្បីលើកទឹកចិត្តឱ្យមានទំនាក់ទំនងធុរកិច្ចដោយស្មើភាពនិងស្មោះត្រង់ បង្កើនប្រសិទ្ធភាពសេដ្ឋកិច្ច ជំរុញឱ្យមានការបង្កើតធុរកិច្ចថ្មីៗ ការពារសេដ្ឋកិច្ចជាតិពីផលប៉ះពាល់ដែលបណ្ដាលមកពីសកម្មភាពប្រកួតប្រជែងបំពានច្បាប់ និងជួយអ្នកប្រើប្រាស់ឱ្យទទួលបានទំនិញនិងសេវាដែលមានគុណភាពខ្ពស់ តម្លៃទាប សម្បូរបែប និងមានជម្រើសច្រើន។
ច្បាប់ប្រកួតប្រជែងនឹងដោះស្រាយបញ្ហានានាពាក់ព័ន្ធដល់សកម្មភាពឃុបឃិតគ្នារវាងធុរកិច្ច ការកំណត់ថ្លៃ ការកំណត់បរិមាណទំនិញសម្រាប់លក់ ការកំណត់ទីតាំងភូមិសាស្ត្រសម្រាប់លក់ផលិតផលនិងសេវា សកម្មភាពប្រើប្រាស់អំណាចដោយបំពានរបស់ធុរកិច្ចដោយអំណាចលើទីផ្សារ ព្រមទាំងរារាំងការរួមបញ្ចូលគ្នា នៃធុរកិច្ចដែលធ្វើឱ្យប៉ះពាល់ដល់ដំណើរការប្រកួតប្រជែង ហើយអាចនាំទៅរកឯកាធិភាព។
ប្រទេសកម្ពុជា បានរៀបចំសេចក្តីព្រាងច្បាប់ប្រកួតប្រជែងរបស់ខ្លួន ប្រកបដោយការយកចិត្តទុកដាក់ និងប្រុងប្រយ័ត្នខ្ពស់ ព្រោះថាក្នុងដំណើរការតាក់តែងនេះ ក្រសួងពាណិជ្ជកម្ម បានធ្វើកិច្ចពិគ្រោះយោបល់ជាច្រើនលើកច្រើនសារជាមួយភាគីពាក់ព័ន្ធ និងដោយមានការចូលរួមពីជំនាញការអន្តរជាតិជាច្រើននាក់ផងដែរ។
បច្ចុប្បន្នសេចក្តីព្រាងច្បាប់ប្រកួតប្រជែងកម្ពុជា បានបញ្ចប់កិច្ចប្រជុំកម្រិតអន្តរក្រសួង នៅទីស្តីការគណៈរដ្ឋមន្ត្រី រួចរាល់ហើយ នៅឡើយតែជំពូកទី ៤ និងជំពូកទី ៦ ដែលចែងអំពីនីតិវិធីនៃការប្តឹងនិងការស៊ើបអង្កេត និងទោសប្បញ្ញត្តិ ដែលតម្រូវឱ្យក្រុមការងារតាក់តែងច្បាប់នៃក្រសួងពាណិជ្ជកម្ម ត្រូវប្រជុំពិភាក្សាចង្អៀតជាមួយក្រសួងយុត្តិធម៌ មុននឹងសេចក្តីព្រាងច្បាប់នេះត្រូវបានបញ្ជូនទៅពិភាក្សាក្នុងកិច្ចប្រជុំពេញអង្គគណៈរដ្ឋមន្ត្រី៕
