ដោយ មនុប៊ី
ភ្នំពេញ៖ ការធ្វើពិពិធកម្មសេដ្ឋកិច្ចគឺជាដំណើរការនៃការផ្លាស់ប្តូរសេដ្ឋកិច្ចឱ្យឆ្ងាយពីប្រភពប្រាក់ចំណូលតែមួយទៅប្រភពជាច្រើនលើវិស័យ និងទីផ្សារជាច្រើនដែលកំពុងរីកចម្រើន។
ការធ្វើពិពិធកម្មសេដ្ឋកិច្ចត្រូវបានអនុវត្តជាយុទ្ធសាស្ត្រមួយដើម្បីជំរុញកំណើនសេដ្ឋកិច្ច និងការអភិវឌ្ឍវិជ្ជមាន។
ឧទាហរណ៍៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាចាំបាច់ត្រូវមានប្រព័ន្ធដឹកជញ្ជូនមួយដែលប្រសើរជាងមុន មានថ្លៃថោកជាងមុន និងមានប្រសិទ្ធភាពជាងមុន ទាំងតាមបណ្តាញដឹកជញ្ជូនផ្លូវគោក ផ្លូវទឹក ផ្លូវអាកាស និងផ្លូវដែក សំដៅបង្កើនសមត្ថភាពនាំចេញ ជំរុញការធ្វើពិពិធកម្មសេដ្ឋកិច្ច និងការទាក់ទាញវិនិយោគ នៅគ្រប់សកម្មភាពធុរកិច្ចគ្រប់ប្រភេទ។
រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោកវង្សី វិស្សុតបានថ្លែងក្នុងកិច្ចប្រជុំស្តីពីការរៀបចំផែនការមេស្តីពី ប្រព័ន្ធដឹកជញ្ជូននៅកម្ពុជា នៅទីស្តីការក្រសួងថ្ងៃទី២៨ ខែ វិច្ឆិកា ឆ្នាំ ២០១៨កន្លងមកថា ការរៀបចំផែនការមេស្តីពីប្រព័ន្ធដឹកជញ្ជូននេះ គឺជាការគិតគូរស្របតាមគោលនយោបាយរបស់រាជរដ្ឋាភិបាល ពិសេសយុទ្ធសាស្ត្រចតុកោណដំណាក់កាលទី៤ ដើម្បីសម្រេចឱ្យបាននូវប្រព័ន្ធដឹកជញ្ជូនមួយដែលមានភាពប្រទាក់ក្រឡា និងមានភាពប្រកួតប្រជែងខ្ពស់ ធៀបជាមួយប្រទេសជិតខាង ដើម្បីគាំទ្រដល់ការអភិវឌ្ឍសេដ្ឋកិច្ចរយៈពេលវែង ការតភ្ជាប់ប៉ូលសេដ្ឋកិច្ចសំខាន់ៗនៅក្នុងប្រទេស និងការបង្កើនល្បឿនសមាហរណកម្មសេដ្ឋកិច្ច ទៅក្នុងតំបន់និងពិភពលោកផងដែរ។
លោកបន្តថា “សម្រាប់ទស្សនវិស័យទៅថ្ងៃមុខ កម្ពុជាត្រូវភ្ជាប់ខ្លួនទៅនឹងបណ្តាញផលិតកម្មអន្តរជាតិ តាមរយៈការប្រើប្រាស់ជារបៀងដឹកជញ្ជូនផ្នែកខាងកើតប្រទេស ភ្ជាប់ពីភ្នំពេញទៅវៀតណាម និងច្រករបៀងដឹកជញ្ជូនខាងលិចភ្ជាប់ពីភ្នំពេញ ទៅប្រទេសថៃ ដោយសារប្រទេសទាំងពីរនេះ នឹងក្លាយទៅជាមូលដ្ឋានផលិតកម្មដ៏ធំនៅក្នុងតំបន់”៕
