ដោយ វុត្ថា
ភ្នំពេញៈ រដ្ឋាភិបាលតាមរយៈក្រសួងរៀបចំដែនដី នគរូបនីយកម្មនិងសំណង់ និងក្រសួងយុត្តិធម៌ បានសម្រេចចេញសេចក្តីប្រកាសអន្តរក្រសួងស្តីពីនីតិវិធី និងបែបនៃការធ្វើអធិការកិច្ចសំណង់នៅក្នុងប្រទេសកម្ពុជា។
យោងតាមប្រកាសលេខ ១១៨.ប្រក/ដ.ន.ស. កយ ដែលចុះហត្ថលេខាដោយរដ្ឋមន្ត្រីក្រសួងទាំងពីរ រួមមាន លោកឧបនាយករដ្ឋមន្ត្រីជា សុផារ៉ារដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ និងលោកអង្គវង្ស វឌ្ឍនារដ្ឋមន្ត្រីក្រសួងយុត្តិធ៌មកាលពីថ្ងៃទី២ ខែសីហា ឆ្នាំ ២០១៩ កន្លងមកនេះបានឱ្យដឹងថា ការចេញសេចក្តីប្រកាសនេះ គឺក្នុងគោលបំណង គ្រប់គ្រងការអភិវឌ្ឍន៍អចលនវត្ថុឱ្យមានប្រសិទ្ធិភាព គុណភាព សុវត្ថិភាព សណ្តាប់ធ្នាប់សង្គម និងបរិស្ថានសម្រាប់ការរស់នៅតាមរយៈការបង្ការ និងទប់ស្កាត់អំពើល្មើសបទប្បញ្ញត្តិស្តីពីនរូបនីយកម្ម និងសំណង់។
-->
សេចក្តីប្រកាសអន្តរក្រសួងនេះ មាន៦ជំពូក និង ២២មាត្រា ដែលចែកលំអិតពីនិតិវិធីរបស់សមត្ថកិច្ចរបស់មន្ត្រីអធិការដ្ឋកិច្ច អធិការកិច្ចសំណង់ និងបណ្តឹងតវ៉ាជាដើម។
ឧបនាយករដ្ឋមន្ត្រី លោកជា សុផារ៉ា កាលពីកន្លងទៅថ្មីៗនេះ បានស្នើអភិបាលនៃគណៈអភិបាលរាជធានី ខេត្ត ចាត់វិធានការចំពោះក្រុមហ៊ុនប្រកបអាជីវកម្មសាងសង់ និងម្ចាស់សំណង់ដែលមិនអនុវត្តតាមកាតព្វកិច្ច និងលក្ខខណ្ឌតម្រូវដោយបទដ្ឋានគតិយុត្ត និងបទដ្ឋានបច្ចេកទេស។
លោកឧបនាយករដ្ឋមន្ត្រី ក៏បានបញ្ជាឱ្យអជ្ញាធរ និងមន្ត្រីពាក់ព័ន្ធទាំងអស់ត្រូវដាក់ពាក្យបណ្តឹងទៅតុលា ឬព្រះរាជ្ញាបន្ទាន់ ដើម្បីដោះស្រាយតាផ្លូវច្បាប់ បន្ទាប់ពីពិនិត្យឃើញការដ្ឋានសំណង់ណាមួយ ដែលសាងសងគ្មានច្បាប់អនុញ្ញាតផងដែរ។
លោកឧបនាយករដ្ឋមន្ត្រីបន្តថា “គណៈកម្មការនឹងចុះធ្វើការងារ នេះដោយប្រាកដប្រជាបំផុតនិងព្រមទាំងបានរំលឹក ម្ចាស់សំណង់ទាំងអស់អោយត្រៀមឯកសារទាក់ទិន នឹងសំណង់របស់ខ្លួន និងកុំមានទម្លាប់ពេល គណៈកម្មការចុះទៅហុចស្រោមសំបុត្រ។
លោកឧបនាយករដ្ឋមន្ត្រីថា ការបំពេញបេសកកម្ម គឺអនុវត្តតាមជំនាញ និងវិជ្ជាជីវៈប្រកបដោយក្រមសីលធម៌ត្រឹមត្រូវ ដើម្បីទាក់ទាញវិនិយោគកាន់តែធំ កាន់តែច្រើន កាន់តែល្អថែមទៀត នៅក្នុងខេត្តព្រះសីហនុ តាមគោលបំណង និងការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លោករដ្ឋមន្ត្រី បានអំពាវនាវឲ្យវិនិយោគិនទាំងមានការនឹងនរចិត្ត ព្រោះគណៈកម្មការចុះទៅ មិនមែនបំភ័យបំភិត ដុតឲ្យខ្លោច រោលឱ្យឆៅនោះទេ។តែវាគឺជាការគាំទ្រឲ្យបងប្អូនអនុវត្តតាមបទដ្ឋានបច្ចេកទេសត្រឹមត្រូវ ធានាបរិមាណ និងគុណភាព កុំមានការ មន្ទិលសង្ស័យនិង ភិតភ័យ។
លោកថា “មុននឹងចាប់ផ្តើមសាងសង់ ត្រូវមានច្បាប់អនុញ្ញាត លិខិតបើកការដ្ឋាន ជាដើម។
ឧបនាយករដ្ឋមន្ត្រីជា សុផារ៉ា ក៏បានដាក់បញ្ជាឱ្យមន្ត្រីចុះត្រួតពិនិត្យការដ្ឋានសំណង់ទាំងអស់ និងដាក់ពាក្យប្តឹងទៅតុលានាពេលនេះ បន្ទាប់ពីមានឧប្បទ្ទវហេតុបាក់រលំអាគារកំពស់៧ជាន់នៅកណ្តាលក្រុងព្រះសីហនុ បណ្តាលអោយមានមនុស្សស្លាប់និងរបួសចំនួន៥៤នាក់ កាលពីរាត្រីទាបភ្លឺថ្ងៃទី២២ មិថុនា២០១៩កន្លងទៅថ្មីៗនេះ៕
