ដោយ រ៉ាណេត
កណ្តាលៈ តម្លៃដីធ្លីនៅតាមតំបន់មួយចំនួននៃស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវបានហក់ឡើងលើសការរំពឹងទុក បន្ទាប់ពីរដ្ឋាភិបាលប្រកាសសាងសង់ព្រលានយន្តហោះអន្តរជាតិភ្នំពេញថ្មីនាពេលខាងមុខ ខណៈដំណើរការនៃការចាប់ផ្តើមសាងសង់ព្រលានយន្តហោះនេះ មិនទាន់កំណត់កាលបរិច្ឆេទច្បាស់លាស់នៅឡើយ។
នាពេលបច្ចុប្បន្ននេះ ជាទូទៅដីដែលស្ថិតនៅតំបន់ខាងក្នុងឆ្ងាយពីផ្លូវ (ដីស្រែ) គិតជាមធ្យមមានតម្លៃចាប់ពី ៤០- ៦០ដុល្លារក្នុងមួយម៉ែត្រការ៉េ ខណៈកាលពីពីរឬបីឆ្នាំមុន ដីនៅទីតាំងដដែលនេះ មានតម្លៃត្រឹមតែថ្លៃបំផុត៥ទៅ១៥ដុល្លារតែប៉ុណ្ណោះ។ ដោយ ឡែកដីដែលស្ថិតនៅគៀកនឹងគម្រោង មានតម្លៃក្នុងចន្លោះចាប់ពី១០០-១៥០ ដុល្លារក្នុងមួយម៉ែត្រការ៉េ ខណៈដែលកាលពីឆ្នាំកន្លង ទៅមានតម្លៃចន្លោះពី ២០ទៅ ៣០ដុល្លារអាមេរិកប៉ុណ្ណោះ។
-->
នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៨ សីហានេះថា ការសាងសង់ព្រលានយន្តហោះភ្នំពេញថ្មី វាគឺជារឿងដ៏ល្អប្រសើរសម្រាប់ជួយសម្រួល ដល់វិស័យដឹកជញ្ជូនទាំងក្នុង និងក្រៅស្រុក ហើយក៏ជួយបង្កើនលទ្ធភាព ក្នុងការជំរុញកំនើនសេដ្ឋកិច្ចកម្ពុជាឱ្យកាន់តែប្រសើរផងដែរ។
លោកស្រីបន្តទៀតថា “វត្តមាននៃព្រលានយន្តហោះមួយនេះ ក៏បានចូលរួមធ្វើឱ្យមានសក្ដានុពលដល់ទីតាំងមួយចំនួន ដែលស្ថិតនៅក្នុងតំបន់គ្រោងអភិវឌ្ឍនេះរីកចម្រើនផងដែរ។ លោកស្រីបន្ថែមថា “មិនថានៅតំបន់ណានោះទេ គម្រោងអភិវឌ្ឍតែងជំរុញឱ្យមានតម្រូវការខ្ពស់ ហើយតម្លៃក៏កើនឡើងដែរ ប៉ុន្តែចំពោះតម្លៃដែលហក់ឡើងថ្លៃខ្លាំងលើសពីតម្លៃទីផ្សារ វាក៏ជះឥទ្ធិពលអាក្រក់មកវិញដែរ។
លោកស្រីតាំង ហួរបានបញ្ជាក់ថា តំបន់ដែលស្ថិតនៅក្បែរព្រលានយន្តហោះ មិនត្រូវបានអនុញ្ញាតឱ្យអភិវឌ្ឍជាសំណង់អគារធំ និងខ្ពស់នោះទេ (អាចប៉ះពាល់ដល់ផ្លូវចុះ និងឡើងរបស់យន្តហោះ)។ ដោយឡែកចំពោះការសាងសង់ ជាសំណង់លំនៅដ្ឋានក៏មិនស័ក្ដិសមផងដែរ ដោយសារតែវាមិនមានផាសុកភាព ដោយសារតែមានសំឡេងរំខានពីការហោះហើរនៃជើងយន្តហោះទាំងយប់ទាំងថ្ងៃ ជាក់ស្ដែងដូចជាទីតាំងព្រលានយន្តអន្តរជាតិ – ភ្នំពេញ ដែលមានស្រាប់ជាគំរូ។
គម្រោងសាងសង់ព្រលានយន្តហោះភ្នំពេញថ្មី ត្រូវបានកំណត់ទីតាំងស្ថិតនៅផ្ទៃដីទំហំ ២៦០០ហិកតា ដោយមួយចំណែកធំស្ថិតនៅក្នុងស្រុកកណ្តាលស្ទឹង ខេត្តកណ្តាល មួយចំណែកជាប់ជាយក្រុងតាខ្មៅ និងមួយចំណែកទៀតជាប់ស្រុកបាទី ខេត្តតាកែវ ជាមួយនឹងខ្ទង់ចំណាយថវិកាសាងសង់ចំនួន ១៥០០លានដុល្លារ។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសផងដែរថា នៅក្នុងបរិបថទីផ្សារសេរី ការឡើងឬចុះនៃតម្លៃដីធ្លី គឺអាស្រ័យទៅលើការកំណត់ពិម្ចាស់ទ្រព្យ។ សម្រាប់ទីតាំងដែលស្ថិតនៅក្បែរតំបន់គម្រោងសាងសង់ព្រលាន គឺមានការអភិវឌ្ឍលឿនរួចទៅហើយ ជាក់ស្ដែងដូចជាតំបន់ផ្លូវជាតិលេខ២ មកទល់នឹងតំបន់ ING CITY គឺភាគច្រើនត្រូវបានបំពេញទៅដោយគម្រោង និងសំណង់បុរីលំនៅដ្ឋានព្រោងព្រាត។
លោកឧកញ៉ាបានបន្តទៀតថា “តម្លៃដីដែលស្ថិតក្នុងតំបន់ដែលកំពុងមានការអភិវឌ្ឍវិស័យលំនៅដ្ឋានខាងលើនេះ អាច មានក្នុងចន្លោះជាង ១០០០ដុល្លាររួចទៅហើយ ហើយវាអាចនឹងបន្តឡើងបន្តិចទៀត នៅពេលថ្ងៃខាងមុខ ខណៈដែលការអភិវឌ្ឍកាន់តែមានភាពទូលំទូលាយជាងនេះ។
ពាក់ព័ន្ធទៅនឹងការកើនឡើងនូវតម្លៃដី ដែលស្ថិតនៅក្នុងគម្រោងគ្រោងសាងសង់ព្រលានយន្តហោះភ្នំពេញថ្មីនេះថា ប្រសិនតម្លៃដីឡើងថ្លៃខ្ពស់ពេក វាអាចជាបញ្ហា និងមានការប្រែប្រួលទៅលើគម្រោងសាងសង់ មានន័យថា តម្លៃដីថ្លៃបានផ្តល់ផលប៉ះពាល់ទៅលើការប្រមូលទិញដីដើម្បីសាងសង់ ដែលវាក៏ជាឧបសគ្គមួយផងដែរ។ ទោះជាយ៉ាងណា លោកឧកញ៉ាបានលើកឡើងថា ពេលនេះការកំណត់ទីតាំង ហាក់នៅក្នុងដំណាក់កាលសសិក្សានៅឡើយ ដោយមិនទាន់មានភាពប្រាកដនោះទេ ដូច្នេះការទិញឬការវិនិយោគ គឺស្ថិតក្នុងការផ្សងព្រេង។
រចនាសម្ព័ន្ធរបស់គណៈកម្មការរៀបចំទីតាំង គម្រោងសាងសង់អាកាសយានដ្ឋានអន្តរជាតិភ្នំពេញថ្មីនេះ ដឹកនាំដោយ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ជាអនុប្រធាន និងសមាជិកចំនួន ២១រូបផ្សេងទៀត។ គម្រោងព្រលានយន្តអន្តរជាតិភ្នំពេញ ជាការវិនិយោគរវាងក្រុមហ៊ុន OCIC អ្នកឧកញ៉ាពុង ឃាវសែ និងក្រុមហ៊ុនចិន។
ដើម្បីសាងសង់ព្រលានយន្តហោះភ្នំពេញថ្មីនេះ រាជរដ្ឋាភិបាល និងក្រុមហ៊ុន OCIC របស់អ្នកឧកញ៉ាពុង ឃាវសែ ត្រូវបង្កើតក្រុមហ៊ុនថ្មីមួយ ដែលមានឈ្មោះថា “ក្រុមហ៊ុន ខេមបូឌា អ៊ែរផត អ៊ិនវេសមិន ឬ Cambodia Airport Investment” ដោយក្នុងនោះរាជរដ្ឋាភិបាល កាន់កាប់ភាគហ៊ុន ១០ភាគរយ និងក្រុមហ៊ុនរបស់ឧកញ៉ា ពុង ឃាវសែ កាន់កាប់ភាគហ៊ុន ៩០ភាគរយ ដោយវិនិយោគទឹកប្រាក់ចំនួន ១.៥០០លានដុល្លារអាមេរិក ក្នុងនោះទឹកប្រាក់ ១.១០០លានដុល្លារ ជាកម្ចីពីធនាគារបរទេស និង២៨០លានដុល្លារជារបស់ក្រុម OCIC និង ២៨០លានដុល្លារទៀត ជាដើមទុនចុះបញ្ជី៕
