ដោយ ម៉ាណេត
ក្រុងបាវិតៈ ទីផ្សារអចលនទ្រព្យនៅទីក្រុងបាវិត នៅបន្តមានសន្ទុះ និងចរន្តក្នុងទិញលក់ ខណៈតម្លៃជួលអចលនទ្រព្យនៅតំបន់នេះមានកំណើនគួរឲ្យកត់សម្គាល់។
ទីផ្សារទិញលក់អចលនទ្រព្យនៅក្រុងបាវិតនៅតែមានភាពវិជ្ជមានស្របពេលតម្លៃជួល មានកំណើនគួរឲ្យកត់សម្គាល់
លោក សោម កែវម៉ាលីដា (Andy) អ្នកជំនាញអចលនទ្រព្យអន្តរជាតិ និងជាអ្នកជំនាញអចលនទ្រព្យក្នុងតំបន់បាវិត បានឲ្យដឹងតាមប្រព័ន្ឋតេឡេក្រាម នាព្រឹកថ្ងៃទី៨ សីហានេះថា ទីផ្សារជួលអចលទ្រព្យនៅទីក្រុងបាវិត មានភាពចង្អៀតបន្តិចក្នុងការរកអចលន្រព្យជួល (ដី) ពិសេសនៅជាប់នៅផ្លូវជាតិលេខ១ ដោយសារបច្ចុប្បន្នតម្រូវការជួលអចលនទ្រព្យមានទីផ្សារខ្ពស់។
លោក Andy បានឲ្យដឹងទៀតថា “បើគិតចាប់ពីច្រកព្រំដែនប្រហែល៥គីឡូម៉ែត្រ ការជួលអចលនទ្រព្យមានទីផ្សារខ្លាំង។ ឧទាហរណ៍ ដីដែលមានទំហំ៣០ គុណ៤០ នៅជាប់ផ្លូវជាតិនៅទីក្រុងបាវិត អាចជួលបានក្នុងតម្លៃ ១៥,០០០ដុល្លារក្នុងមួយខែ។ ភាគច្រើនអ្នកវិនិយោគចិនជាអ្នកជួលអចលនទ្រព្យនៅទីក្រុងនេះ។
លោកបន្តថា ដោយឡែកទីផ្សារដីធ្លីក៏នៅតែមានសន្ទុះ និងចរន្តក្នុងទិញលក់ដោយថ្មីឃើញមានក្រុមហ៊ុនវិនិយោគិនជាច្រើន បានចុះមកទីក្រុងបាវិត ដើម្បីមើលស្ថានភាពវិនិយោគ។
លោក ហួត សុផាត ប្រជាជនរស់នៅទីក្រុងបាវិតបានឲ្យដឹងថា តម្លៃជួលអចលនទ្រព្យនៅបាវិតបច្ចុប្បន្ន មានកំណើនគួរឲ្យកត់សម្គាល់ ស្របពេលតម្លៃចលនទ្រព្យក៏មានការកើនឡើងផងដែរ។
លោកបន្តថា “កាលពីដើមឡើយបន្ទប់ជួលរបស់ខ្ញុំ ក្នុងមួយខែអាចជួលបានក្នុង ៦០ ដុល្លារប៉ុណ្ណោះ ប៉ុន្តែសម្រាប់ពេលបច្ចុប្បន្នវិញ បន្ទាប់ដាក់ជួលបានក្នុង ១០០ដុល្លារក្នុងមួយបន្ទប់ ខណៈការទិញលក់ឃើញកំណើនខ្លាំង ដោយសារមានគម្រោងធំៗជាច្រើនបាន និងកំពុងធើ្វសកម្មដាក់លក់ដោយមានអតិថិជនច្រើន មកពីគ្រប់ទិសទីបានទិញគម្រោងអចលនទ្រព្យនៅបាវិត។
លោកបានបន្តថា លោកមានដីកក្បាល៥ម៉ែត្រ នៅជាប់ផ្លូវជាតិលេខ១ ហើយមានអតិថិជនបានទាក់ទង ដើម្បីជួលធ្វើអាជីវកម្មរបស់ពួកគេ ដោយពួកគេទាក់ទងលោកជួលក្នុងតម្លៃ ២,៥០០ដុល្លារក្នុងខែ។
កាលពីថ្មីៗនេះ រដ្ឋាភិបាលវៀតណាមក៏បានពន្លឿនការសាងសង់ ផ្លូវល្បឿនលឿនតភ្ជាប់ជាមួយក្រុងបាវិត ជាប់ព្រំប្រទល់ប្រទេសវៀតណាម ដែលគំរោងនេះនឹងតភ្ជាប់ជាមួយផ្លូវល្បឿនលឿនពីភ្នំពេញ ទៅកាន់ទីក្រុងបាវិតនាពេលអនាគត។
គំរោងផ្លូវល្បឿនលឿននេះ នឹងចែកចេញជាបីដំណាក់កាល ដោយគម្រោងដំណាក់កាលទី១ នៃគម្រោងផ្លូវទីក្រុងហូជីមិញ ម៉ុកបាយនឹងផ្តោតលើផ្លូវ៣៣គីឡូម៉ែត្រពីទីក្រុងហូជីមិញ ទៅខេត្តតៃនីង វៀតណាម។ បន្ទាប់ពីការបញ្ចប់ការសាងសង់ផ្លូវដែលអាចបើកបរ ក្នុងល្បឿនរហូតដល់១២០គីឡូម៉ែត្រក្នុងមួយម៉ោង។ គំរោងផ្លូវល្បឿនលឿន ដំណាក់កាលទី២នឹងមានប្រវែង២០,៥គីឡូម៉ែត្រពីតាយនីងទៅម៉ុកបាយ ដែលអាចបង្កើនល្បឿនបើកបររហូតដល់៨០គីឡូម៉ែត្រក្នុងមួយម៉ោង។ និងដំណាក់កាលទីបី នឹងរួមបញ្ចូលការពង្រីកទទឹងផ្លូវហាយវេពីផ្លូវ៦គន្លង ទៅ៨គន្លង។
អនុប្រធានក្រុមប្រឹក្សាភិបាល សមាគមអ្នកជំនាញអចលនទ្រព្យកម្ពុជា លោកយិន លាងគង់បានមានប្រសាសន៍ថា “ការវិនិយោគនៅក្នុងទីក្រុងបាវិតនឹងកើនឡើង ខណៈដែលក្រុមអ្នកវិភាគ អចលនទ្រព្យបានកំណត់រួចមកហើយថា វាជាមជ្ឈមណ្ឌលសេដ្ឋកិច្ចនាពេលអនាគត ដោយសារទីតាំងស្ថិតនៅកណ្តាលរបស់ខ្លួន រវាងប្រទេសទាំងពីរដែលមានសេដ្ឋកិច្ចលូតលាស់លឿនបំផុតលើពិភពលោក។
លោកបន្តថា “ក្រុងបាវិតត្រូវបានរៀបចំហេដ្ឋារចនាសម្ព័ន្ឋយ៉ាងល្អ និងមានទីតាំងភូមិសាស្ត្រដ៏មានអំណោយផល ក្នុងការដឹកជញ្ជូនឆ្លងកាត់ព្រំដែន ទៅកាន់កំពង់ផែទឹកជ្រៅរបស់វៀតណាម។ លោកបន្តថា “ដោយមើលឃើញនូវលក្ខខ័ណ្ឌអំណោយផលនេះហើយ ទើបរដ្ឋាភិបាលកម្ពុជាបានដាក់ក្រុងបាវិត ជាទីក្រុងមួយក្នុងចំណោមទីក្រុង២ទៀត ដើម្បីប្រែក្លាយតំបន់នេះ ជាតំបន់់ឧស្សាហកម្មពិសេស ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥។
ជាក់ស្តែងបច្ចុប្បន្នក្រុងបាវិត មានតំបន់សេដ្ឋកិច្ចពិសេសចំនួន១០ និងបានផ្តល់ការងារដល់កម្មករ និយោជិតរាប់ម៉ឺននាក់៕
