ដោយៈ រ៉ាណេត
ភ្នំពេញៈ មួយរយៈចុងក្រោយនេះមានមនុស្សជាច្រើន បានសម្រេចចិត្តចូលមកប្រឡូក និងវិនិយោគនៅក្នុងវិស័យអចលនទ្រព្យ ក្នុងគោលបំណងទទួលបានប្រាក់ចំណេញត្រឡប់ទៅវិញ។ ប៉ុន្តែនៅក្នុងចំណោមអ្នក ដែលចូលប្រឡូកទាំងអស់នោះមិនប្រាកដថាទទួលបានជោគជ័យនោះទេ។
នៅលើទីផ្សារអចលនទ្រព្យ ការកើនឡើងនូវតម្រូវការ ឬអំណាចបញ្ជាទិញមិនមែនកើតមានជានិរន្តនោះទេ មានន័យថា វាអាចនឹងរាំងស្ទះនៅក្នុងតំណាក់កាលណាមួយ ឬឈានដល់ចំណុចឆ្អែត ដែលមិនអាចមានកំណើន។ ប្រសិនជាទីផ្សារកើតមានវិបត្តិ ឬទីផ្សារអចលនទ្រព្យទាំងមូលត្រូវជួបនឹងឱនភាព តើអ្នកដែលកំពុងតែស្ថិតនៅក្នុងដំណាក់កាលវិនិយោគមិនទាន់លក់ចេញ គួរធ្វើដូចម្ដេចដើម្បីបញ្ចៀសនូវហានិភ័យ ឬអាចកាត់បន្ថយអត្រាខាតបង់បាន?។
-->
ប្រធានបទមួយនេះ អ្នកវិភាគសេដ្ឋកិច្ចឯករាជ្យកម្ពុជា និងជាអ្នកវិនិយោគនៅក្នុងវិស័យអចលនទ្រព្យ លោក ង៉ែត ជូ បានសរសេរនៅលើគណនីផ្ទាល់ខ្លួននៃបណ្តាញទំនាក់ទំនងសង្គមថា ដំណោះស្រាយនៅតែមាន ប៉ុន្តែទាមទាឱ្យមានការអត់ធ្មត់ និងចេះសង្កេតពីស្ថានការណ៍។
នៅក្នុងសំណេរដដែល លោក ង៉ែត ជូបានលើកឡើងថា៖ ប្រសិនលោកអ្នកបានជួបនឹងស្ថានការណ៍បែបអវិជ្ជមានក្នុងវិស័យនេះគម្បី ដោយស្រាយដោយវិធីសាស្ត្រចំនួនបីរួមមាន ១) កុំបង្ខំលក់ចេញ : ភាពភ័យស្លន់ស្លោ ហើយបង្ខំលក់អចលនទ្រព្យ ឬហ៊ុនដែលអ្នកកាន់កាប់ធ្វើឱ្យអ្នកខាតបង់ខ្លាំង។ ដូច្នេះត្រូវមានចិត្តអំណត់ និងរស់នៅដោយសាមញ្ញ (ចំណាយតិច) បំផុតតាមដែលអាចធ្វើបាន។
ទី២ កុំតាមដានព័ត៌មានទីផ្សារស្អិតពេក : ការទទួលបានព័ត៌មានអវិជ្ជមានជាប់ជាប្រចាំក្នុងកំឡុងពេលទីផ្សារមានវិបត្តិ អាចធ្វើឱ្យអ្នកបាក់ទឹកចិត្ត និងហាមចិត្តមិនបានឈានដល់ដំណាក់កាលលក់ឡៃឡុង។ និងទី៣ កុំគិតខ្លី : មនុស្សដែលគិតវែងឆ្ងាយរមែងត្រៀមខ្លួនជានិច្ចសំរាប់តបនឹងកាលៈទេសៈដែលមានវិបត្តិ។
លោកបន្តថា “គេជឿថាវិបត្តិគ្រាន់តែជាព្រឹត្តិការណ៍ បណ្តោះអាសន្នប៉ុណ្ណោះ ហើយវិបត្តិរមែងនាំមកនូវឱកាសល្អ។
ជាក់ស្តែងមហាសេដ្ឋីហុងកុង លោក លី កាស៊ីង បានចំណាយទុនដ៏ច្រើនវិនិយោគលើអចលនទ្រព្យ ក្នុងខណៈដែលមានកុបកម្មនៅវាលធានអាមិន។ ពេលនោះតម្លៃអចលនទ្រព្យធ្លាក់ដល់ស្ទើសូន្យ ប៉ុន្តែ លោក លី កាស៊ីង មានជំនឿចិត្តថា អ្វីៗនឹងប្រសើរឡើង។ រូបខ្ញុំផ្ទាល់ក៏ធ្លាប់អនុវត្តដូច្នេះ ក្នុងកំឡុងពេលមានវិបត្តិអចលនទ្រព្យ ចន្លោះឆ្នាំ២០០៨-២០១៣៕
