ដោយ វុត្ថា
ភ្នំពេញៈ ទសវត្សរ៍ចុងក្រោយនៃក្រុងភ្នំពេញ ត្រូវបានចាត់ទុកជាទសវត្សរ៍មាសសំរាប់កម្ពុជា ដោយសារប្រទេសនេះមានសេដ្ឋកិច្ចខ្លាំង ដែលជំរុញឲ្យវិស័យវិស័យសំណង់កាន់តែលេចត្រដែតនៅទីក្រុងភ្នំពេញ ដែលធ្លាប់់មានអតីតកាលដ៏កំសត់មួយនេះ។
ជាមួយគ្នានោះ អ្នកវិនិយោគជាច្រើន បាននិងក៏កំពុងចាប់យកលើការវិនិយោគវិស័យសំណងនេះផងដែរ ដោយក្នុងនោះមានគម្រោងសាងសង់អគារភ្លោះជាច្រើន ប៉ុន្តែ គេហទំព័រ Propertyarea.asia សូមលើកយកតែគំរោងអាគារភ្លោះកប់ពពកមួយចំនួនបាននិងកំពុងបញ្ចប់ការសាងសង់ និងកំពុងសាងសង់មកបង្ហាញជូន។
-->
គម្រោងអគារភ្លោះខ្ពស់កប់ពពកទាំងនោះ កំពុងធ្វើអោយប្រទេសកម្ពុជាជាពិសេសទីក្រុងភ្នំពេញ ក្លាយជាមជ្ឈមណ្ឌលពាណិជ្ជកម្ម វប្បធម៌ នយោបាយ និងសេដ្ឋកិច្ចកាន់តែមានភាពល្បីល្បាញ និងរីកមុខរីកមាត់ក្នុងតំបន់ និងពិភពលោកកាន់តែខ្លាំង។
1) អគារភ្លោះ Thai Boon Roong Twin Tower
អគារ THAI BOON ROONG TWIN TOWER មានចំនួន ១៣៣ជាន់ ស្មើនឹងកំពស់ ៥៦៨ម៉ែត្រ ស្ថិតនៅក្នុងរាជធានីភ្នំពេញប្រទេសកម្ពុជា។ វាជាអាគារភ្លោះខ្ពស់ជាងគេក្នុងពិភពលោក ខណៈអាគារភ្លោះខ្ពស់ជាងគេបច្ចុប្បន្នគឺ Petronas Tower មានកំពស់ត្រឹមជាង ៤០០ម៉ែត្រប៉ុណ្ណោះ។
គម្រោងដ៏មហាសាលនេះ គ្រោងចំណាយទឹកប្រាក់សាងសង់ និងធ្វើឲ្យអាគារនេះដំណើរការបានរលូនក្នុងតម្លៃទឹកប្រាក់ ៦០០០លានដុល្លារអាមេរិក។ មជ្ឈមណ្ឌលពាណិជ្ជកម្មដ៏ធំនេះ ត្រូវបានស្ថាបត្យករគូរគំរោងនេះអះអាងថា វានឹងជាមជ្ឈមណ្ឌលពាណិជ្មកម្មធំជាងគេក្នុងតំបន់អាស៊ាន។ អាគារនេះជាប្រភេទអាគារភ្លោះ និងមានអាគារកប់ពពកកំពស់ ៤៥ជាន់ចំនួន៤ទៀតនៅជុំវិញ។
អាគារនេះជាមជ្ឈមណ្ឌល ពាណិជ្ជកម្ម និងលំនៅដ្ឋានធំជាងគេក្នុងអាស៊ាន ដោយរួមបញ្ចូលផ្សារទំនើប អាគារការិយាល័យ អាផាតម៉ិន ខុនដូលំដាប់ អន្តរជាតិ សណ្ឋាគារកម្រិតផ្កាយ៦ និងសេវាកម្មកំសាន្តដ៏អស្ចារ្យជាច្រើនទៀត។
2) អគារភ្លោះ The Royal One
គម្រោងអគារភ្លោះ Royal One របស់ក្រុមហ៊ុន The Royal Group ដែលមានកម្ពស់៦២ជាន់ ដោយគ្រោងបោះទុនវិនិយោគ១៥០លានដុល្លារអាមេរិក។ គំរោងនេះគ្រោងនឹងសាងសង់នៅលើមហាវិថីមុនីវង្ស កែវនឹងមហាវិថីសហព័ន្ឋរុស្ស៊ី និងអគារកាណាឌីយ៉ា អគារភ្លោះនឹងមានកម្ពស់២៣០ ម៉ែត្រហើយសាងសង់លើផ្ទៃដីជាង៤០០០ម៉ែត្រការ៉េ។
អគារភ្លោះនឹងសាងសង់ជាខុនដូមួយអគារ និងការិយាល័យមួយអគារ។ អគារទាំងពីរនេះ នឹងមានចំណតរថយន្តក្រោមដីជាច្រើនជាន់ និងមានផ្សារទំនើបនៅជាន់ទី២ និងទី ៣ ដែលចំណុចពិសេសនៃគម្រោងដ៏ធំនេះ។
3) អាគារភ្លោះ Diamond Twin Tower
អគារភ្លោះ Diamond Twin Tower៣២ជាន់ កម្ពស់១៣៦ម៉ែត្រ តម្លៃជាង៦០ លានដុល្លារ បានសាងសង់ឡើងក្នុងទីតាំងយុទ្ធសាស្ត្រពិសេស របស់មជ្ឈមណ្ឌលសេដ្ឋកិច្ចកោះពេជ្រ នៃទីក្រុងភ្នំពេញ។ អគារភ្លោះ Diamond Twin Tower ត្រូវបានសម្ពោធការដ្ឋានសាងសង់ជាផ្លូវការ កាលពីព្រឹកថ្ងៃទី៨ ខែកញ្ញា ឆ្នាំ២០១៥នេះ។
4) អគារ Sky Villa
គម្រោងសាងសង់ខុនដូភ្លោះ Sky Villa ស្ថិតនៅតាមបណ្តោយមហាវិថីព្រះសីហនុ របស់ក្រុមហ៊ុន Crystal Orange Construction Plc ដែលមានលំនៅដ្ឋានសរុបចំនួន២៥៦យូនីត ក្រោមទុនវិនិយោគប្រហែល ១០០លានដុល្លារអាមេរិក បានបើកសម្ពោធការដ្ឋានសាងសង់កាលពីថ្ងៃទី១៧ តុលាកន្លងទៅនេះ។
5) អគារ The Bridge
អាគារThe Bridgeបានបញ្ចប់ការសាងសង់ និងបើកដំណើរការហើយ វាជាមជ្ឈមណ្ឌលពាណិជ្ជកម្មចម្រុះ ដែលរួមមាន ខុនដូ ការិយាល័យ សណ្ឋាគារ ផ្សារទំនើបជាដើម។ The Bridge មានកំពស់៤៥ជាន់ ស្មើនឹងកំពស់១៤៤ម៉ែត្រ ដែលវិនិយោគដោយក្រុមហ៊ុន World Bridge Land &Oxley Holding Group មានមូលដ្ឋាននៅប្រទេសសឹង្ហបុរី។
គំរោងនេះស្ថិតក្នុងសង្កាត់ទន្លេបាសាក់ ខ័ណ្ឌចំការមនក្រុងភ្នំពេញ ពិសេសស្ថិតនៅក្បែរទីក្រុងកោះពេជ្រ ដែលជាបណ្តុំនូវមជ្ឈមណ្ឌលពាណិជ្ជកម្ម លំដាប់អន្តរជាតិនៃទីក្រុងភ្នំពេញ៕
