ដោយ រ៉ាណេត
ភ្នំពេញ៖ ដោយសារក្រុងព្រះសីហនុ កំពុងមានសន្ទុះខ្លាំងទៅលើវិស័យសំណង់ ដែលសំណង់ស្ទើរទាំងអស់ មកពីក្រុមវិនិយោគចិនបាននិងកំពុងសាងសង់អគារ ខុនដូ និងលំនៅដ្ឋាន ដូច្នេះហើយទើបផ្លូវ និងប្រព័ន្ធលូ ប្រព័ន្ធបង្ហូរទឹក ត្រូវតែពង្រីក និងយកចិត្តទុកដាក់ខ្លាំងពីប្រមុខរាជរដ្ឋាភិបាលម្តេចអគ្គមហាសេនាបតីតេជោ ហ៊ុន សែន ។
ថ្ងៃនេះ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម និងសំណង់ បានចុះទៅពិនិត្យស្ថានភាពប្រព័ន្ធបង្ហូរទឹកនៅក្រុងព្រះសីហនុ ដែលកំពុងជួបការលិចលង់ក្រោយមានភ្លៀងធ្លាក់យ៉ាងខ្លាំង ធ្វើឲ្យលិចផ្លូវ និងផ្ទះសម្បែងប្រជាជនខ្លាំងជាងសព្វមួយដង ។ ក្នុងឱកាសនោះ លោកឧបនាយករដ្ឋមន្ត្រី ជា សុផារ៉ា ក៏បានដាក់ចេញផែនការដើម្បីបញ្ចប់គ្រោះទឹកជំនន់នៅក្នុងខេត្តព្រះសីហនុផង។
