ដោយ រ៉ាណេត
ភ្នំពេញៈ មន្ត្រីជាន់ខ្ពស់ក្រសួងទេសចរណ៍បានអះអាងថា វិស័យទេសចរណ៍កម្ពុជាបាននាំចំណូលចូលសេដ្ឋកិច្ចជាតិប្រមាណ ៤,៣៧៥លានដុល្លារ ស្មើនឹង ១២.៧%នៃផលិតផលក្នុងស្រុកសរុប (GDP) និងបានបង្កើតការងារផ្ទាល់ជាង៦២ម៉ឺននាក់ ស្មើនឹង១៣% នៃការងារសរុប។
លោក ហោ មុនីរ័ត្ន រដ្ឋលេខាធិការក្រសួងទេសចរណ៍ ឱ្យដឹងនៅក្នុងបិទវគ្គបណ្តុះបណ្តាលស្តីពី «ការអភិវឌ្ឍន៍ និងការគ្រប់គ្រងឧស្សាហកម្មទេសចរណ៍កម្ពុជា ឆ្ពោះទៅឧស្សាហកម្ម ៤.០» កាលពីថ្ងៃទី២៣ ខែសីហា ឆ្នាំ២០១៩ម្សិលមិញនេះថា ស្របតាមចក្ខុវិស័យ នៃផែនការយុទ្ធសាស្ត្រអភិវឌ្ឍន៍ធនធានមនុស្ស ក្នុងវិស័យទេសចរណ៍២០១៧-២០២៥ នៅឆ្នាំ២០២០ ក្រសួងទេសចរណ៍ ត្រូវជំរុញឲ្យអ្នកជំនាញយ៉ាងតិច៥០% ត្រូវមានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដាជាតិ និងអាស៊ាន តាមរយៈការបណ្តុះបណ្តាល ឬការវាយតម្លៃសមត្ថភាព។
នៅឆ្នាំ២០២៥ ត្រូវសម្រេចឲ្យបានយុទ្ធនាការ «បុគ្គលិកម្នាក់ ជំនាញមួយ» ពោលគឺជំរុញឲ្យអ្នកជំនាញទេសចរណ៍ទាំងអស់ ត្រូវមានវិញ្ញាបនបត្រ ឬសញ្ញាបត្របញ្ជាក់សមត្ថភាព។
លោកបន្ថែមទៀតថា “ការប្រើប្រាស់ប្រព័ន្ធបច្ចេកវិទ្យាឌីជីថល ក្នុងវិស័យទេសចរណ៍ បាននិងកំពុងរួមចំណែកយ៉ាងខ្លាំងក្នុងការជំរុញកំណើនទេសចរ ដែលទាមទារជាចាំបាច់ ក្នុងការបណ្ដុះបណ្ដាលបំប៉នសមត្ថភាពបន្ថែមដល់មន្ត្រី និងអ្នកពាក់ព័ន្ធក្នុងវិស័យទេសចរណ៍”។
លោកបញ្ជាក់ថា ទាំងនេះសុទ្ធតែជាបច្ចេកវិទ្យាថ្មីៗ ដែលពិភពលោកកំពុងប្រើប្រាស់នាពេលបច្ចុប្បន្ន និងទៅអនាគត ហើយបានក្លាយទៅជាកត្តាចម្បងចូលរួម ក្នុងការអភិវឌ្ឍឧស្សាហកម្មទេសចរណ៍ ប្រកបដោយការប្រកួតប្រជែងខ្ពស់។លោកថា ការបណ្ដុះបណ្ដាលធនធានមនុស្សជាភារកិច្ចចម្បង ដែលមិនអាចមើលរំលងបាន ក្នុងការឆ្លើយតបនូវកំណើន ២ខ្ទង់ នៃទេសចរណ៍អន្តរជាតិដែលមកកម្ពុជាជារៀងរាល់ឆ្នាំ ហើយក៏បានណែនាំឱ្យមន្ត្រីរាជការ និងប្រតិបត្តិករទេសចរណ៍ទាំងអស់ ត្រូវយកចិត្តទុកដាក់លើការប្រើប្រាស់បច្ចេកវិទ្យាឌីជីថលនេះឱ្យបានល្អប្រសើរ ធ្វើយ៉ាងដើរឱ្យទាន់ការរីកចម្រើនរបស់ពិភពលោកនាសម័យទំនើបនេះ៕
