ដោយៈ រ៉ាណេត
ប៉ោយប៉ែតៈ ក្រៅពីគម្រោងសំណង់អគារធំៗដូចជា ខុនដូ អាផាតមិន ផ្សារទំនើប និងកាស៊ីណូ ពេលនេះនៅមានគម្រោងសំណង់លំនៅដ្ឋានទំនើបជាច្រើនទៀត ដែលមានទំហំវិនិយោគរាប់រយលានដុល្លារ កំពុងតែបន្តសម្រុកចូលក្រុងប៉ោយប៉ែត។ នេះបើតាមការបញ្ជាក់ប្រាបើឱ្យដឹងពីសំណាក់អ្នកវិនិយោគ ដែលកំពុងអភិវឌ្ឍវិស័យសំណង់នៅទឹកដីព្រំដែនមួយនេះ។
ប្រធានក្រុមប្រឹក្សាភិបាលក្រុមហ៊ុន Four Star Plus Four និងក្រុមហ៊ុន Sg Top Trust លោកសួង សុខហ៊ាង បានមានប្រសាសន៍ប្រាប់តាមទូរស័ព្ទនាកាលពីល្ងាចថ្ងៃទី២៨ ខែសីហា ឆ្នាំ២០១៩កន្លងមកថា បច្ចុប្បន្ននេះ វិស័យអចលនទ្រព្យនៅក្រុងប៉ោយប៉ែត កំពុងតែមានសន្ទុះយ៉ាងខ្លាំង ដោយស្ទើរតែទូទាំងក្រុង មានកំណើននៃសំណង់អាគារនានាកំពុងតែមានសកម្មភាព និងរីករាលដាលយ៉ាងខ្លាំង ដើម្បីបំពេញទៅតាមតម្រូវការជាក់ស្ដែង។
-->
ដោយសារតែមើលឃើញពីភាពល្អប្រសើរ នៃវិស័យអចលនទ្រព្យនៅក្នុងក្រុងប៉ោយប៉ែត ដែលកំពុងតែមានតម្រូវការខ្ពស់ បច្ចុប្បន្ននេះ ក្រុមហ៊ុន Four Star Plus Four បានបង្កើនការវិនិយោគដ៏ធំមួយបន្ថែមទៀត គឺគម្រោង Star Gold ទៅលើផ្ទៃដីទំហំ១០ហិកតា ក្នុងការអភិវឌ្ឍជាបណ្តុំសំណង់លំនៅដ្ឋាន និងជាមណ្ឌលកម្សាន្តកាស៊ីណូ ដែលមានទំហំទឹកប្រាក់ជាច្រើនលានដុល្លារ។
លោក សួង សុខហ៊ាង បានមានប្រសាសន៍បន្តទៀតថា គម្រោងអភិវឌ្ឍន៍ Star Gold គឺក្រុមហ៊ុនបានធ្វើការបែងចែកជា២ដាច់ដោយឡែកពីគ្នា។ ក្នុងទំហំដី១០ហិកតា ក្រុមហ៊ុននឹងអភិវឌ្ឍ៥ហិកតា ជាបណ្តុំសំណង់លំនៅដ្ឋានចំនួន១៦៨ ល្វែង ជាប្រភេទ Link House និង Shop House ដែលមានតម្លៃចាប់ពី២២ម៉ឺនដុល្លារឡើងទៅ ហើយបន្ថែមពីនេះ នៅមានគម្រោងអភិវឌ្ឍជាកាស៊ីណូចំនួន១គម្រោង។
សម្រាប់ដីចំនួន៥ហិកតា ដែលនៅសល់ពីការអភិវឌ្ឍ ក្រុមហ៊ុនបានសម្រេចពុះឡូតិ៍លក់ ដែលមានទំហំផ្សេងៗពីគ្នា ដូចជា ១៥ x ៦០ម៉ែត្រ, ២៥ x ២៥, ២០ x ៤០, ២០ x ៦០, ៣០ x៦០ និង ៤០ x ៤០ ម៉ែត្រ ដែលសមស្របទៅនឹងការសាងសង់អគារអាផាតមិន ខុនដូ មណ្ឌលកម្សាន្ត កាស៊ីណូ និងសណ្ឋាគារ ដែលមានទីតាំងស្ថិតនៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត តាមផ្លូវផ្កាយ៥។
សម្រាប់អ្នកដែលមានចំណាប់អារម្មណ៍ អាចទាក់ទងតាមទូរស័ព្ទ ០១២ ៥៥ ៧៧ ២២ / ០៧៧ ៦៦ ៨៨ ៨៧។
ជាមួយនឹងភាពរីកចម្រើននៃវិស័យសំណង់នៅក្រុងប៉ោយប៉ែត បច្ចុប្បន្ននេះក្រៅពីមានបណ្តុំសំណង់លំនៅដ្ឋានច្រើនជាង១០០គម្រោង រួមជាមួយនឹងសំណង់អគារអាផាតមិនស្អេកស្កះនោះ នៅមានសំណង់ខុនដូបែបទំនើប ដែលជាអាគាពាណិជ្ជកម្មចំរុះចំនួន៤ផ្សេងទៀត ដោយក្នុងខុនដូដែលបានបញ្ចប់ការសាងសង់ទាំងស្រុង មានចំនួន១គម្រោង ហើយចំនួន៣គម្រោងទៀត កំពុងតែបន្តសកម្មភាពសាងសង់យ៉ាងមមាញឹក ដើម្បីបញ្ចប់តាមគម្រោងដែលបានកំណត់។
នាយកក្រុមហ៊ុនអចលនទ្រព្យ Century21 Fortuna Investment លោក វ៉ា វីរៈ បានមានប្រសាសន៍ប្រាប់តាមទូរស័ព្ទថា ក្រុងប៉ោយប៉ែត គឺជាគោលដៅមួយដែលស្ថិតនៅក្នុងក្រសែភ្នែករបស់អ្នកវិនិយោគជាតិ និងអន្តរជាតិ ជាពិសេសជនជាតិចិន ដែលកំពុងតែកើនឡើងច្រើននៅទីនេះ។
លោកបានបន្តថា “ប៉ោយប៉ែតពេលនេះ បានកែប្រែមុខមាត់យ៉ាងល្អប្រសើរជាមួយនឹងសកម្មភាពដ៏រស់រវើក នៃវិស័យពាណិជ្ជកម្ម និងសំណង់ ដើម្បីឆ្លើយតបទៅនឹងកំណើនមនុស្សដែលចូលទៅរស់នៅ និងវិនិយោគលើវិស័យផ្សេងៗ”។
លោកបន្តថា ដោយសារតែវិស័យពាណិជ្ជកម្មក្នុងតំបន់នេះកើនឡើង បានជំរុញឱ្យតម្រូវការនៃវិស័យអចលនទ្រព្យ នៅទីក្រុងនេះមានភាពពុះកញ្ច្រោលខ្លាំង ហើយអ្នកវិនិយោគបានចំណាយទុនសាងសង់ជាផ្ទះល្វែង ជាបុរី ឬជាសណ្ឋាគារជាច្រើន ដើម្បីផ្គត់ផ្គង់តម្រូវការស្នាក់នៅរបស់អ្នកចំណូលថ្មី ដែលទៅបម្រើការងារ ក៏ដូចជាចំនួននៃកំណើនភ្ញៀវទេសចរផងដែរ។
លោកបន្តថា “សកម្មភាពទាំងនេះហើយ ដែលធ្វើឱ្យតម្លៃដីធ្លីនៅក្នុងក្រុងប៉ោយប៉ែត ក៏ដូចជាតំបន់ដែលស្ថិតនៅជាប់ជាយក្រុង មានការកើនឡើងខ្លាំងគួរឱ្យកត់សម្គាល់”៕
